1 Ninfɛ di Nun obisuɔtɔbi Yosua lakpee batii banyɔ baadie ni Sitim di lewofa kamɛ alɛ balaala: aatɔkɔ ma alɛ, "Bikyɛ, biɛlaanyu kasɔ nwu, kyenkye Yeriko." Nioso baakyɛ baalaabuo sɔnɔkpeetɛ onwii leyo, leyooto nɔɔ niale Rahab, ni baasiɛ ninfa nɛ.

2 Ni baatɔkɔ Yeriko ɔka alɛ, "Nyu lo! Israel batii bawo ntɔɔwa nfũ kakyɛ ka mmle alɛ bɔɔbala kasɔ nwu." 3 Nioso Yeriko ɔka lata Rahab kanya ka mmle alɛ, "Diki basuɔtɔ ba niababuo ni leyo lɛfɔ fawako, diekye bɛɛwa alɛ bɔɔbala kasɔ nwu kamuu."

4 Kafɔɔ ɔsanko nwu layɔ basuɔtɔ nwu banyɔ aawofasa. Ni aabuɛ alɛ, "Nwaako, basuɔtɔ nwu lawa ɔkyɛ nii, kafɔɔ nin-ye ɔfɛ beekye. 5 Di kɔtɔɔfɔ, di obe lawo alɛ baasɛɛ ni okpoo nwu kayoko, basuɔtɔ nwu lasifi. Nin-ye ɔmɛnsuku beefe. Bitikanko ma wla. Bibawɛ ma." 6 (Kafɔɔ Rahab lakpaa ma aasifiko lɛkya osi aalaawofasa ma di seleteku sɛkpaalɛ se aatɛ ni kalɔ di lɛkya nwu.) 7 Nioso basuɔtɔ ba di ɔka lakpee ni ladie baati batii ba niakyɛ ni kasɔ nwu ɔla di osuku wɔ niafe ni Yordan kawaalɛkɔ. Obe wɔ di mba niati ni kasɔ nwu balantɛ ladie ni odie, ni baasɛɛ kayoko nwu nɛ.

8 Fiɛ di kasɔ nwu balantɛ kamate ni ku kakyɛ nwu yi, Rahab lakyɛ lɛkya nwu osi 9 ni aatɔkɔ ma alɛ, "N-ye nlɛ SAATE nwu ntɔɔyɔ kasɔ ka mmle ɛɛta ye, nioso aye lɛyɛkɛ kplɛ nwu ntɔɔpɛ wo, alɛ mba bamuu ninsi ni di kale ka mmle kotũtũkũ ku lɛyɛkɛ ta aye oso. 10 Butoonu mmle di SAATE nwu lasɔɔsa ni Lekpo Sɛɛle ntu aata ye ni di obe wɔ biadiɛ ni di Egipte, ku nle biabla ni Sihon ku Og, Amori batii baka nwu banyɔ di Yordan kufĩ katunkɔ, nnwɔ faawɔɔsa ni fɛɛ. 11 Obe wɔ buanu nwu ni ole, situ loo lakpa, nnɛɛ kafɔɔ lafee obiala ta aye oso. Diekye SAATE, Yaa lee nle Yaa di osi kaatoo ku kasɔ kaalɔ. 12 Nioso nunua, lekoto bika ntam di SAATE nwu suoto bitɛɛ bilɛ bibale leyo nii batii sifutulɛ, diekye ntoole ye sifutulɛ. Bituo mi nwaako dituosaa 13 alɛ bibafũ teemi ku yaami ku babiloo-suɔtɔbi ku babiloo-sankobi ku mba bamuu ninle ma ni bale nkpa, alɛ biadiki wo minkyeko kukpi kamɛ."

14 Basuɔtɔ nwu labuɛ baatika difuɔ baatɔɔ alɛ, "Nkpa loo ninle nkpa lee! Nse faabuɛ lɛsaa le buɔbla nii, ni bubale ye sifutulɛ ku onukwale nse SAATE nwu lɛta wo kasɔ nwu."

15 Nioso Rahab lata ma baafe di sɛfle baasoo di okũ suoto, diekye leyo nɔɔ le aasiɛ ni lale okpoo nwu oyoyiɛ owo. 16 Aatɔkɔ ma aatɛ alɛ, "Bisifi akpenkpe nwu alɛ mba nikoti ye ni dilɔbanya ye. Biwofasa suoto lee ninfa ayi atiɛ dilaase di obe wɔ beekple ni, fiɛ nfɛ bieyefe osuku lee."

17 Ni di basuɔtɔ nwu latɔkɔ Rahab alɛ, "Ntam be mmle fɛɛta wo buɔka ni dilɔbawa kaanya dita wo, 18 diediki, buobuo kasɔ ka faanii ni okpilakpi sɛɛle wɔ mmle di sɛfle wɔ faata wo buafe buasoo nii. Diediki fatɔɔkpaa kafɔɔ teefɔ ku yaafɔ ku babilee-suɔtɔbi ku leyo lɛfɔ batii bamuu fɛɛwako leyo lɛfɔ fiɛ. 19 Nse otii lele niedie di leyo lɛfɔ eesifi lɛkpaka, ni ntɔ nɔɔ kamatika di nnwɔɔ omu disi; kulɔbale wo ɔlaa. Kafɔɔ otii lele ninkpe di leyo ku afɔ yi, ntɔ nɔɔ kamatika di disi loo nse kɔnɛɛ loo lɛkpanko nwɔ. 20 Kafɔɔ nse feebuɛ lɛsaa le buɔbla nii, ni bubadie di ntam be faata wo buaka ni kamɛ."

21 Ni di Rahab latuna alɛ, "Lenu, bita kute fɛ mmle biebuɛ ni." Nioso aadiki ma osuku, ni baasifi nɛ. Ni aanii okpilakpi sɛɛle di sɛfle nwu nɛ.

22 Obe wɔ baasifi nii, baalaasiɛ di akpenkpe nwu ninfa ayi atiɛ, dialaase di obe wɔ di mba nikoti ma ni lawolaa osuku omuu baafenko batanya ma ni, baakple baasifi nii. 23 Ninfɛ di basuɔtɔ nwu banyɔ lakple baatoosifi nɛ. Baasoo baakye akpenkpe nwu, baawaalɛ okle baawa Nun obisuɔtɔbi Yosua nfũ baabatɔkɔ nwɔ lɛsaa biala niawa ni di suoto lɛma. 24 Baatɔkɔ Yosua alɛ, "Nwaako SAATE nwu ntɔɔyɔ kasɔ nwu kamuu eekpee wo ninnɛɛ; batii nwu bamuu kotũtũkũ ku lɛyɛkɛ ta awo oso."