1 Ninfɛ di Yosua lasiisa Israel ana nwu amuu di Sekem nɛ. Aalɛɛ banɔɔfo, batunletɛ, bakantɛ ku Israel banɔɔfotii, ni baawa di Yaa anu nɛ.

2 Ni di Yosua latɔkɔ batii nwu bamuu alɛ, "Nnya ɔlaa wɔ di SAATE Israel Yaa nwu kobuɛ ni: ‘Saa yi, bawa lee, di Abraham ku Nahor ote Tera nkyakaa nii, lasiɛ di Okle* kamaa baasumu bayaa bamba kafɔɔ. 3 Kafɔɔ lakpaa teeye Abraham ladieko di kasɔ nwu di Okle kamaa, laleko nwɔ katũ lafenko di Kanaan, ni latɔɔ banantii kpinwu nɛ. Latɔɔ Isak, 4 Isak kafɔɔ latɔɔ Yakob ku Esau. Layɔ Seir lekpenkpe kale nwu lata Esau, kafɔɔ Yakob ku babisuɔtɔbi nɔɔ lasifi Egipte.

5 "‘Ninfɛ lakpee Mose ku Aron, ni lata nimiina lawa di Egipte batii suoto di nle labla ni ninfa, ni lakpaa ye ladieko nɛ. 6 Lakpaa bate lee ladieko ni di Egipte, baawa lekpo nwu katũ, ni di Egipte batii latikanko ma ku bakeke ba di bapɔnkɔ nnaanfi ni ku bapɔnkɔ basiɛtɛ babadu bia Lekpo Sɛɛle. 7 Kafɔɔ baalɛɛ SAATE nwu alɛ akyakaako ma, ni aakpee ditunu di aye ku Egipte batii ntɛɛ nɛ; aakpaa lekpo nwu aakpete ma di suoto diatĩi ma. Bianya lɛsaa le labla ni Egipte batii ku anu lee amu. Ninfɛ biasiɛ di ɔfaafuu kamɛ obe kpinwu nɛ.

8 "‘Ni Lakpaa ye lawako Amori batii ba niasiɛ ni di Yordan kufĩ-katunkɔ kasɔ suoto nɛ. Baakpɛko ye, kafɔɔ layɔ ma lakpee di nnɛɛ lee. Lawɔɔsa ma di anu lee, ni biayɔ kasɔ lɛma nɛ. 9 Obe wɔ di Moab ɔka Sipor obisuɔtɔbi Balak, lalolaa suoto alɛ ɔɔbakpɛko ni Israel, aakpee Beor obisuɔtɔbi Bileam alɛ akpaani ye. 10 Kafɔɔ namanu Bileam ɔlaa, nioso aata ye lɛtɔtrɔ aakyakaa, aakple aakyakaa ni, ni ladiki ye di nnɛɛ nɔɔ nɛ.

11 "‘Ninfɛ biawaalɛ Yordan ni biawa Yeriko nɛ. Yeriko batii lakpɛko ye, fɛ mmle kafɔɔ di Amori batii, Perisi batii, Kanaan batii, Heti batii, Girgasi batii, Hewi batii ku Yebusi batii labla ye nii. Kafɔɔ layɔ ma lakpee di nnɛɛ lee. 12 Lakyesee batɔntɔ lalesa ye katũ baabatososa ma baadiki, ni di anu lee-ku Amori batii baka nwu banyɔ kafɔɔ. Bitabla nle mmle ku aye bamu kapamii ee kɔtaa. 13 Nioso lata ye kasɔ ka suoto ditabuo ye nii, ku sekpoo se bitabudi nii; ni biasiɛ sĩ kaamɛ biale di nta awosobi afe ku nnɔnyi awosobi ya bita pɛ ni nɛ.’

14 "Nunua biyɛkɛ SAATE nwu, biesumu nwɔ ku onukwale omuu. Bifuki bayaa ba di bawa lee lasumu ni di Okle kamaa ku Egipte biyu, biesumu SAATE nwu. 15 Kafɔɔ nse SAATE nwu osumu kamakpɛ ye nkyɔkɔ yi, ni miɛ dii le mmle bidiki nnwɔ bibasumu ni bita suoto lee, nse bayaa ba di bawa lee lasumu ni di Okle kamaa, ee Amori batii ba kasɔ bisi ni afiɔ. Kafɔɔ ami ku leyo nii batii, bubasumu SAATE nwu."

16 Ninfɛ di batii nwu ladiki kanya alɛ, "Dikyɛ diokyo di suoto loo, alɛ buasĩ SAATE nwu, munaasumu bayaa bamba! 17 SAATE Yaa loo nwu omu niakpaa wo ku bate loo aadieko di Egipte, di sɛlanle kasɔ, ni aabla atuosaa kplɛ nwu di anu loo nɛ. Aatĩtĩi wo di osuku loo omuu ɔkyɛ ku nnle be mmuu kamɛ buakyɛ buafe nii. 18 Ni di SAATE nwu latososa nnle nwu mmuu di anu loo, di Amori batii ba niasiɛ ni di kasɔ nwu suoto nkyakaa nii. Awo kafɔɔ bubasumu SAATE nwu, diekye Yaa loo ale."

19 Kafɔɔ Yosua latɔkɔ batii nwu alɛ, "Bilɔbafuo SAATE nwu osumu. Yaa klekle ale; Yaa wɔ ninkpɛ ni sɛsɔfɔwo ale. Ɔlɔbayɔ otokopĩ lee ku sikpile lee akyɛ ye. 20 Nse biesĩ SAATE nwu, biɛlaasumu bafɔɔ bayaa yi, abamunikĩi an-yɔ nimiina anwako ye, anta kunloo ye, di dibiene le atɔɔbla ɛɛta ye ni sɛmaa."

21 Kafɔɔ batii nwu latɔkɔ Yosua alɛ, "Oowo! Bubasumu SAATE nwu."

22 Ninfɛ di Yosua labuɛ alɛ, "Aye bamu ninle kamaabayilatɛ di suoto lee, bilɛ bietuna bilɛ bibasumu SAATE nwu."

Ni baatuna alɛ, "Yii, kamaabayilatɛ bule."

23 Ni di Yosua labuɛ alɛ, "Ni nunua, bifuki bafɔɔ bayaa nwu kaamɛ lee biyu, biɛyɔ situ lee bita SAATE Israel Yaa nwu."

24 Ninfɛ di batii nwu latɔkɔ Yosua alɛ, "Bubasumu SAATE Yaa loo, munkyɔɔ nwɔ atoko kafɔɔ."

25 Di dii nwu nkpo Yosua labla kanya ninii aata batii nwu, ni aatɛ sɛsaabla ku afiofa nsũ aata ma di Sekem ninfa nɛ. 26 Ni di Yosua lakpana asaa ya mmle di Yaa Kufiofa Kukũ kamɛ nɛ. Ninfɛ aayɔ difuɔ kplɛ ninwii aase ninfa di kowoso kplɛ nwu kalɔ di SAATE nwu kakleklekɔ nwu ɔlɔɔkɔ nɛ.

27 Ninfɛ di Yosua latɔkɔ batii nwu bamuu alɛ, "Binyu! Difuɔ le mmle kamale kamaayilatɛ di suoto loo. Ditoonu sɛlaa se simuu di SAATE nwu ntoobuɛ ɛɛtɔkɔ wo nii. Dibale kamaayilatɛ di suoto lee nse biele onukwale bita Yaa lee."

28 Ninfɛ di Yosua lata batii nwu lasifi, obiala ku atesaa nɔɔ amu nfũ nɛ.

29 Di asaa ya mmle sɛmaa, Nun obisuɔtɔbi Yosua, SAATE nwu kpɛmblatɛ lakpi, aafũ kɔlafa alɛɛ lefosi. 30 Ni baakookaa nwɔ di atesaa nɔɔ kasɔ, di Timnat Sera di Efraim kale lekpenkpe, di Gaas Kobokote katoo-kasɔ nɛ.

31 Israel lasumu Saate nwu di Yosua nkpa osiɛbee omuu kamɛ ku banɔɔfo ba niabu baasiɛ ni nkpa baalenkee nwɔ nii, baanya ni kafɔɔ lɛsaa biala le di Saate nwu labla aata ni Israel.

32 Ni baakookaa Yosef akufi ya di Israel batii layɔ baakyeko ni Egipte di Sekem kasɔ nɛ. Di lɛba le di Yakob laya ni ku koto fututu kɔlafa aakyeko ni Sekem ote Hamor babisuɔtɔbi nfũ. Kasɔ ka mmle labakple Yosef banantii atesaa.

33 Ninfɛ di Aron obisuɔtɔbi Eleasar lakpi baakookaa nwɔ di Gibea, kasɔ ka baata ni obisuɔtɔbi nɔɔ Finehas di Efraim kale lekpenkpe nɛ.