1 Ninfɛ di SAATE nwu latɔkɔ Yosua alɛ, "Tanyɛkɛ; tanta nnɛɛ lafee fɔ. Kpaa bakpɛtɛ bamuu fasifiko falaakpɛko Ai. Diekye ntɔɔyɔ Ai ɔka, batii nɔɔ ku okpoo nɔɔ ku kasɔ nɔɔ lekpee di nnɛɛ lɛfɔ. 2 Fababla Ai ku ɔka nɔɔ fɛ mmle faabla ni Yeriko ku ɔka nɔɔ. Kafɔɔ bibayɔ kakpɛ kamɛ asaa ku babɔkɛɛ sele lɛma minta suoto lee. Ta batii baate kalá di okpoo kplɛ nwu sɛmaa."

3 Nioso Yosua ku bakpɛtɛ bamuu ladie baakyɛ baalaakpɛko Ai. Aadiki basuɔtɔ ba nin-ye ni kakpɛ nwaa nkpe afosi-atiɛ aakpee ku kakyɛ nwu 4 ku sɛlaa se mmle alɛ: "Bilolaa binu nwaa. Bita batii baate kalá di okpoo kplɛ nwu sɛmaa. Bitantɛ biakyo nwu. Bamuu lee bita atoko lee ate kaayi. 5 Ami ku mba bamuu ninkpe ni di ɔkyɛ nii kamakpɛ muntɔɔkyɛ okpoo kplɛ nwu, nse kafɔɔ basuɔtɔ nwu ledie bɛɛwa wo ɔkpɛko, fɛ mmle baabla ni obe nwu yi, bubatoso mundiɛ ma. 6 Babatikanko wo ninaase di obe wɔ bubakyɔnkyɔ ma mundiɛko ni di okpoo kplɛ nwu, diekye bababuɛ alɛ, ‘Bootoso wo fɛ mmle baabla ni obe nwu.’ Nioso nse buotoso buodiɛ ma, 7 biɛtaka di nfũ bite ni kalá biɛlaafũ okpoo kplɛ nwu. SAATE Yaa lee nwu kamayɔ nwu ankpee di nnɛɛ lee. 8 Nse bitoofũ okpoo kplɛ nwu, biekpee nwu ɔtɔ. Bibla nle di SAATE nwu latɔkɔ ye ni. Binyu bilɛ; bienu mi ɔlaa."

9 Ninfɛ di Yosua ladiki ma osuku, ni baasifi lɛba le babate ni kalá nɛ. Ni baalate kala baasoko ma di Betel ku Ai obo diofe ni Ai kufĩ kamɛɛkɔ- kafɔɔ Yosua lawɛ di batii nwu ɔkyɛ ku kakyɛ nwu.

10 Kaleesɛ kuyitatũ, Yosua lalɛɛ bakpɛtɛ nɔɔ aasiisa, ni di nnwɔɔ ku Israel batunletɛ nwu lanafu baalaadu ma di Ai nɛ. 11 Bakpɛtɛ ba bamuu niawɛ ni di ɔkyɛ nɔɔ lanafu baakyɛ okpoo kplɛ nwu baalaadu nwu sitũ. Baasiɛ di Ai katoo-kasɔ, ku ɔtaata wɔ niate ma ni nintɛɛ ku okpoo kplɛ nwu. 12 Yosua lakpaa basuɔtɔ fɛ nkpe nnɔɔ, ni aata ma baate kalá di Betel ku Ai obo, diofe ni okpoo nwu kufĩ kamɛɛkɔ nɛ. 13 Baata bakpɛtɛ nwu nyilakɔ lɛma- mba bamuu di kasiɛkɔ nwu kamɛ diofe ni okpoo kplɛ nwu katoo-kasɔ ku mba niate ni kalá diofe nwu ni kufĩ kamɛɛkɔ. Kakyɛ nwu nkpo Yosua lasifi aalaawɛ di ɔtaata nwu.

14 Obe wɔ di Ai ɔka lanya ni nle mmle, nnwɔɔ ku okpoo kplɛ basuɔtɔ bamuu lapɛsɛwa baadie ku kolesɛtũ baalaakyakako Israel batii ku kakpɛ di lɛba ninwii ninte diɛkyɔɔ ni Araba anu. Kafɔɔ atatofo alɛ bɛɛtɛ nwu kalá di okpoo kplɛ nwu sɛmaa. 15 Yosua ku Israel batii bamuu lata baakplesa ma sɛmaa di Ai batii anu, ninfɛ baatoso baatoofe ɔfaafuu nwu nɛ. 16 Ni baalɛɛ Ai basuɔtɔ bamuu alɛ bati ma nɛ. Nioso baatikanko Yosua, ni aakyɔnkyɔ ma aadieko di okpoo kplɛ nwu nɛ. 17 Osuɔtɔ kuonwii ditabu di Ai ee Betel atadie aati ni Israel batii. Baadiɛ okpoo kplɛ nwu baatɛ foee, baasifi baalaatikanko Israel batii.

18 Ninfɛ di SAATE nwu latɔkɔ Yosua alɛ, "Bɔkɔtɛ lɛkplɔ le di kɔnɛɛ lɛfɔ fakyɔɔ Ai, diekye nnɛɛ lɛfɔ kamayɔ okpoo kplɛ nwu nkpee." Nioso Yosua labɔkɔtɛ lɛkplɔ nɔɔ nwu aakyɔɔ Ai. 19 Nfanwu aabla ni ɔbla nkpo, ni di basuɔtɔ ba niate ni kalá lataka wla di kawofakɔ lɛma baakusa baawa sitũ nɛ. Baabuo okpoo kplɛ nwu, baafũ nwu ni baakpee nwu ɔtɔ wla nɛ.

20 Ai basuɔtɔ nwu lamunikĩi baanyu sɛmaa, ni baanya okpoo kplɛ nwu kɔyɔ kɔtaka kunfe kolo nɛ, kafɔɔ lɛbla le kuninwii nnaa ma baatoso manfe ni di osuku owo suoto. Diekye Israel batii nwu niatootoso baatoofe ni ɔfaafuu ntoomunikĩi bɛɛkyɔɔ batikankotɛ lɛma nwu anu. 21 Diekye obe wɔ di Yosua ku Israel batii bamuu lanya alɛ mba niate ni kalá ntoofũ ni okpoo kplɛ nwu, di kɔyɔ kafɔɔ kodie ni di okpoo kplɛ nwu kunfe ni osi yi, baamunikĩi baatu baabuo di Ai basuɔtɔ nwu suoto. 22 Basuɔtɔ ba niate ni kalá kafɔɔ ladie di okpoo kplɛ nwu bababuo ma di suoto, diata alɛ Ai batii laka nintɛɛ, di Israel batii lawɛ ni di sitũ ku sɛmaa lɛma. Israel batii lalo ma, batabu bia mba ninkpe ni nkpa ee mba nikotososo nii. 23 Kafɔɔ baamufũ Ai ɔka ku nkpa, ni baakpaa nwɔ baawako Yosua nɛ.

24 Obe wɔ di Israel batii laloo ni Ai batii bamuu olo di afe ku ɔfaafuu wɔ kamɛ baati ma nii, di obe wɔ kafɔɔ baalo ni obiala ku kapamii yi, Israel batii bamuu lakple baasifi Ai baalaalo mba niawɛ ni ninfa. 25 Batii ba bamuu nianɔɔ ni di Ai dii nwu nkpo- basuɔtɔ ku basanko labla lefosi nkpe nnyɔ. 26 Diekye Yosua ditakplesa kɔnɛɛ ko niananfi ni lɛkplɔ nɔɔ dialaase di obe wɔ aawɔɔsa ni batii ba bamuu niasiɛ ni di Ai. 27 Kafɔɔ Israel batii layɔ babɔkɛɛ sele ku kakpɛ asaa di okpoo kplɛ wɔ mmle baata suoto lɛma, fɛ mmle di SAATE nwu latɔkɔ ni Yosua.

28 Nioso Yosua lafiɛ Ai aabla nwu kawɔɔ ditii ninamayɛ ni diidii, lɛba le ninte ni fooo, bia miɛ. 29 Ni di Yosua layɔ Ai ɔka aasaka di kowoso suoto, aadiɛ nwɔ ninfa dialaadu kɔtɔɔfɔ nɛ. Di kufĩ lamɛɛ nii, Yosua latɔkɔ ma alɛ balaasakatɛ kpi nɔɔ di kowoso nwu suoto, baalaafuki nwɔ batɛ di okpoo nwu kasũkunya. Ni baasiisa afuɔ kplɛ ditii di suoto nɔɔ, diɛka dite ninfa bia miɛ.

30 Ninfɛ di Yosua lapɛ oleɔta akyikye di Ebal Kobokote osi aata SAATE, Israel Yaa nwu, 31 fɛ mmle di SAATE nwu tɔkyɛntɛ Mose latɔkɔ ni Israel batii nɛ. Aapɛ nya di mmle kanya bɛɛkpana ni di Mose Kufiofa Kukũ kamɛ alɛ- oleɔta akyikye afuɔ ya suoto batayɔ lɛbɔɔsaa lɛkpɛnsaa baablako ni ɔkpɛ. Nnya suoto baata SAATE nwu ofiɛ asaaɔta ku atoko ɔkyɛ ole oleɔta asaaɔta nɛ. 32 Nfa, di Israel batii nwu anu, di Yosua lase Mose kufiofa nwu lɛkpana otika di afuɔ nwu suoto, nko di Mose lakpana nii. 33 Ninfɛ di Israel batii bamuu, bafɔɔ ku okpoo batii bamuu ku okpoo banɔɔfo, banɔɔfotii ku bakantɛ lɛma layila di SAATE nwu kanya ninii lɛlakaa kakyɛka ku kakyɛka, baakyɔɔ mba niatuka ni ni anu- olebatatɛ ba niale ni Lewi batii. Batii nwu kakyɛ layila di Gerisim Kobokote katũ, kakyɛ lɛma bule kafɔɔ di Ebal Kobokote katũ, fɛ mmle di SAATE nwu kpɛmblatɛ Mose labuɛ ni saa, di obe wɔ aakaalɛ ni lɛtɔtrɔ aata ni Israel batii.

34 Nni sɛmaa, Yosua laka kufiofa nwu sɛlaa simuu- lɛtɔtrɔ ku akpaani- fɛ mmle bɛɛkpana ni di Kufiofa Kukũ nwu kamɛ. 35 Ɔlaa kuonwii ditabu di nse simuu di Mose labuɛ ni di Yosua ditaka aata ni Israel dikudi nwu nimuu, di basanko ku babisɔ ku bafɔɔ ba ninsi ni kaamɛ lɛma nkyakaa nii.