1 Di kolesɛtũ Yosua ku Israel batii bamuu ladie di Sitim baasifi Yordan, nfũ baasiɛ ni fiɛ baawaalɛ nii. 2 Di ayi atiɛ sɛmaa banɔɔfotii nwu lafenfe di kasiɛkɔ nwu kamɛ, 3 baatɔɔta batii nwu letofo alɛ: "Nse biɛnya SAATE Yaa lee nwu kanya niniii lɛlakaa, ku olebatatɛ ba ninle ni Lewi batii ntuka ni yi, ni, ayee biedie di nsiɛkɔ lee bitikanko ni. 4 Ni bibatofo osuku wɔ biafe nii, diekye biikyɛ di osuku wɔ mmle binya diidii. Kafɔɔ bita obo fɛ nnɛɛ ditika kakpe disiɛ di aye ku lɛlakaa nwu ntɛɛ; batantɛɛtɛɛ ni."

5 Yosua latɔkɔ batii nwu alɛ, "Bikleklesa suoto lee, diekye kɔsɛɛ SAATE nwu kamabla asaa ya niɛbla ni ɔkpɛ di kamɛ lee."

6 Ninfɛ di Yosua latɔkɔ olebatatɛ nwu alɛ, "Biyɔ kanya ninii lɛlakaa nwu biefe bile batii nwu katũ." Nioso baakɛnkɛ ni, ni baafe baale ma katũ nɛ.

7 Ni di SAATE nwu latɔkɔ Yosua alɛ, "Miɛ kamakye kasɔ ntɔɔtakatɛsa fɔ katoo di Israel batii bamuu anu, mmle baatofo alɛ nsiko fɔ ni, fɛ mmle lasiɛko ni Mose. 8 Tɔkɔ olebatatɛ ba nintuka ni kanya ninii lɛlakaa nwu falɛ: ‘Nse biedu Yordan ntu kotoko yi, biɛkyɛ bilaayila di okle nwu kamɛ.’"

9 Ni di Yosua latɔkɔ Israel batii nwu alɛ, "Biwa ninfũ biɛbanu SAATE Yaa lee nwu sɛlaa. 10 Nnya nle mmle bibayɔ mintofo bilɛ Yaa wɔ ninkpe ni nkpa nsi ye ni kaamɛ, alɛ nwaako abatososa ni Kanaan batii, Hiti batii, Hiwi batii, Peris batii, Girgasi batii, Amori batii ku Yebusi batii andiki ni di anu lee. 11 Binyu, kasɔ kamuu SAATE nwu kanya ninii lɛlakaa nwu kamale ye katũ ninfe di Yordan okle kamɛ. 12 Nioso nunua, diki basuɔtɔ lefosi-banyɔ fakyeko Israel ana nwu kamɛ, onwii akye kɔna biala kamɛ. 13 Nfanwu, nfanwu di olebatatɛ ba nintuka ni SAATE nwu lɛlakaa- kasɔ kamuu SAATE nwu- lekpee kɔkpaa di Yordan okle yi, ntu nɔɔ be nikobiɛ ninfe ni kala kamabudi, nintaka ninyila fɛ ditii."

14 Nioso obe wɔ di batii nwu ladie ni di kasiɛkɔ lɛma alɛ bɔɔlaawaalɛ ni Yordan okle, olebatatɛ ba nintuka ni kanya ninii lɛlakaa nwu lafe baale ma katũ. 15 Obe nwu kamɛ Yordan ntooyii di ofiɛlɛbee kamɛ. Kafɔɔ nfanwu, nfanwu di olebatatɛ ba niatuka ni lɛlakaa nwu ladu ni Yordan okle di nkpaa lɛma lakpanko ni ntu nwu kotoko, 16 ntu be nikobiɛ ninkye ni katoo ladiɛ ofe. Ntu lapɛ lɛboo diabla ditii obo kplɛ late fanfa, di okpoo onwii bɔɔlɛɛ ni Adam di Saretan ɔlɔɔkɔ. Obe wɔ di ntu be nikobiɛ ninfe ni kala nimbuo ni di Araba Lekpo (Mmba Lekpo) latɛ diabudi. Nioso batii nwu lawaalɛ baasifi Yeriko kakyɛ nyɔɔfa. 17 Olebatatɛ ba niatuka ni SAATE nwu kanya ninii lɛlakaa layila kpinkpĩ di kasɔ kosole suoto di Yordan ntɛɛntɛɛ, ni di Israel batii bamuu lafe dialaase di obe wɔ di kale nwu kamuu laloo ni ɔwaalɛ fɛɛ di kasɔ kosole nwu suoto.