1 Ninfɛ di Yosua lalɛɛ Ruben batii, Gad batii ku Manase kɔna-kakyɛ nwu 2 ni aatɔkɔ ma alɛ, "Bitɔɔbla asaa ya amuu di SAATE nwu kpɛmblatɛ Mose latɔkɔ ye nii, bitɔɔkyɔɔ mi atoko kafɔɔ di lɛsaa biala latɔkɔ ye nii. 3 Obe kpinwu nfɛ nɛ- diɛbadu ni miɛ dii le mmle- biisĩ babilee-suɔtɔbi, kafɔɔ bitɔɔbla ɔsaabla wɔ di SAATE, Yaa lee nwu lata ye nii. 4 Kanunua ka mmle di SAATE, Yaa lee ntɔɔta ni babilee-suɔtɔbi ɔnyɛɛ ɔtɛ fɛ mmle aaka ni ntam yi, bikple bisifi sekpoo lee di kasɔ ka di SAATE nwu kpɛmblatɛ Mose lata ye ni di Yordan okle kamaa. 5 Kafɔɔ bilolaa binyu nwaa bilɛ biemufũ sɛsaabla ku kufiofa nwu di SAATE nwu kpɛmblatɛ Mose lata ye ni biklee: alɛ biabɔmbɔ SAATE, Yaa lee nwu, minkyɛ di sisuku nɔɔ simuu, minkyɔɔ afiofa nɔɔ atoko, mimmufũ nwɔ minklee kpinkpĩ, minsumu nwɔ kafɔɔ ku otu lee omuu ku ɔkla lee omuu."

6 Ninfɛ di Yosua lata ma lɛtɔtrɔ aadiki ma osuku, ni baasifi sekpoo lɛma nɛ. 7 (Mose lata Manase kɔna-kakyɛ nwu kasɔ di Basan, kakyɛ nyɔɔfa nwu kafɔɔ, Yosua lata ma kasɔ ku babilɛma-suɔtɔbi di Yordan kufĩ kamɛɛkɔ lɛkyɛ.) Obe wɔ di Yosua ladiki ma ni osuku baasifi ni sekpoo lɛma yi, aata ma lɛtɔtrɔ, 8 aabuɛ alɛ, "Bikple bisifi sekpoo lee ku lɛsaawɛ kplɛ lee- ku babɔkɛɛ sele sɛlambu kplɛ, ku koto fututu, koto sɛɛle, kɔbri ku abɔɔsaa ku abula kpinwu- biɛsɛ kafɔɔ kakpɛ kamɛ asaa ya biɛwɛ biekyeko ni balo lee nfũ minko babilee-suɔtɔbi." 9 Nioso Ruben batii, Gad batii ku Manase kɔna-kakyɛ nwu ladiɛ Israel batii di Silo di Kanaan, baakple baasifi Gilead, di kasɔ lɛma kamu suoto, nka baafũ ni, di SAATE nwu ladiki ni kanya aafenko ni di Mose suoto.

10 Obe wɔ baabadu ni Gelilot ninkaako ni Yordan di Kanaan kasɔ suoto yi, Ruben batii, Gad batii ku Manase kɔna-kakyɛ nwu lapɛ oleɔta akyikye ya niatɛ aamuɔ ni ninfa di Yordan Okle ɔlɔɔkɔ. 11 Ni di obe wɔ di Israel batii lanu alɛ batɔɔpɛ ni oleɔta akyikye di Kanaan kɔmɛ di Gelilot, dikaako ni Yordan di Israel batii lɛkyɛ yi, 12 Israel batii dikudi nimuu lasi di Silo alɛ bɔɔlaakpɛko ma.

13 Nioso Israel batii lakpee oletatɛ Eleasar obisuɔtɔbi Finehas alɛ akyɛ Ruben, Gad ku Manase kɔna-kakyɛ nwu nfũ- di Gilead kasɔ suoto. 14 Baakpee ɔka basuɔtɔ lefosi ku nnwɔɔ, osuɔtɔ onwii, onwii di Israel kɔna biala kamɛ, leyo kamɛ biala ɔnɔɔfo di Israel batii nfaabi kamɛ.

15 Obe wɔ baakyɛ ni Ruben, Gad ku Manase kɔna-kakyɛ nwu nfũ- di Gilead yi- baatɔkɔ ma alɛ: 16 "SAATE nwu dikudi nimuu kobuɛ alɛ: ‘Lɛ oso biɛlalaasa ofũ onu ku Israel Yaa nwu nkpo? Lɛ oso nfɛ biedie di SAATE nwu kamaa, biɛlaapɛ oleɔta akyikye biɛta suoto lee, biɛtaka biyɛ nwɔ di suoto nunua? 17 Ni Peor okpile nwu diipɔ wo? Diɛbase bia miɛ dii le mmle buukleklesa suoto loo di okpile nwu suoto, nu bia di ɔfiɛ kpile lapɛ SAATE nwu batii! 18 Nunua nfɛ biokple di SAATE nwu kamaa?

"‘Nse biɛtaka bieyila di SAATE nwu suoto miɛ, kɔsɛɛ abanya ɔblɔ ankpeeko Israel batii bamuu. 19 Nse kasɔ ka biefũ ni ntɔɔlalaa yi, bisifi biwa SAATE nwu kasɔ suoto, lɛba le di SAATE nwu lɛkpaayo klekle n-yɛ ni, biɛbasɛ kasɔ nwu ku awo. Kafɔɔ bitantaka biayila di SAATE nwu suoto ee suoto loo alɛ biapɛ oleɔta akyikye minta suoto lee, ninlenkee SAATE, Yaa loo oleɔta akyikye nwu sɛmaa. 20 Obe wɔ di Serah obisuɔtɔbi Akan ditale ni onukwale di asaa ya bɛɛyɔ bɛɛta ni SAATE nwu suoto, diele letoko nanfi niawa di Israel batii bamuu suoto? Ditale lete nɔɔ niakpi ta okpile nɔɔ oso.’"

21 Ninfɛ di Ruben, Gad ku Manase kɔna-kakyɛ nwu latɔkɔ Israel nfaabi nwu banɔɔfo alɛ: 22 "Sientɛ Nwu, Yaa, SAATE nwu! Sientɛ Nwu, Yaa, SAATE nwu! Aye! Bita Israel atofo! Nse nle mmle ninle ɔtaka oyila di suoto ee otokopĩ ɔwɛ di SAATE nwu suoto, ni tanta wo buasiɛ nkpa miɛ dii le mmle. 23 Nse ɔpɛ buɔpɛ oleɔta akyikye loo amu bulɛ buokple nkpaamaa di SAATE nwu suoto, munta ɔfiɛ asaaɔta ku alesaa asaaɔta ee atoko ɔkyɛ ole oleɔta asaaɔta di nnya suoto yi, ni SAATE nwu omu akaalɛ wo ɔlaa.

24 "Oowo! Buabla ni di lɛyɛkɛ kamɛ bulɛ dii lewo banantii lee katɔkɔ bale wo alɛ, ‘Obe biɔblako SAATE, Israel Yaa nwu? 25 SAATE nwu ntɔɔyɔ Yordan eetika kɔmɛ di awo ku aye ntɛɛ- aye Ruben batii ku Gad batii! Binaa kalekɔ kukanwii di SAATE nwu kamɛ.’ Nioso banantii lee kata bale wo ndiɛ SAATE nwu ɔyɛkɛ.

26 "Nkpo oso buabuɛ bulɛ, ‘Bita bulolaa suoto buɔpɛ oleɔta akyikye- kafɔɔ diele ofiɛ asaaɔta ee oleɔta oso.’ 27 Kafɔɔ, dibale kamaadiyilasaa di awo ku aye ku ana ya nikɔwa ni ntɛɛ, alɛ buasumu SAATE nwu di lɛkpaayo klekle nɔɔ ku ofiɛ asaaɔta ku seleɔta ku atoko ɔkyɛ ole asaaɔta loo. Ni dii kaamaa, banantii lee dilɔbafuo bale wo ɔtɔkɔ alɛ, ‘Binaa kalekɔ kukanwii di SAATE nwu kamɛ.’

28 "Ni buabuɛ bulɛ, ‘Nse bɛɛnwaanii beebuɛ nnwɔ mmle bɛɛtɔkɔ wo ee banantii loo yi, bubatɔkɔ ma bulɛ: Binyu SAATE nwu oleɔta akyikye nwu okle, di bate loo lapɛ ni, diele alɛ baata ni ofiɛ asaaɔta ku oleɔta oso, kafɔɔ kamaadiyilasaa di awo ku aye ntɛɛ.’

29 "Dikyɛ diokyo di suoto loo alɛ buayila di SAATE nwu suoto, munkple nkpaamaa di suoto nɔɔ miɛ alɛ buapɛ oleɔta akyikye munta ɔfiɛ asaaɔta ku alesaa asaaɔta ku oleɔta, ninlenkee SAATE, Yaa loo oleɔta akyikye nwu sɛmaa, n-ya nin-yɛ ni di lɛkpaayo klekle nɔɔ anu."

30 Obe wɔ di oletatɛ Finehas ku okpoo batunletɛ- Israel batii nfaabi banɔɔfo-lanu ni ɔlaa wɔ di Ruben, Gad ku Manase labuɛ nii, suoto layɔɔ ma. 31 Ni di oletatɛ Eleasar obisuɔtɔbi Finehas latɔkɔ Ruben, Gad ku Manase alɛ, "Miɛ buotofo bulɛ SAATE nwu nsiko wo, diekye biediki kɔkpaa kpile di SAATE nwu suoto di ɔlaa wɔ mmle suoto. Kanunua bitoodiki Israel batii di SAATE nwu nnɛɛ."

32 Ninfɛ di oletatɛ Eleasar obisuɔtɔbi Finehas ku batunletɛ nwu lakple baasifi Kanaan di nfũ baakpee ni asi baawo ku Ruben batii ku Gad batii di Gilead kasɔ suoto ni baalaatɔkɔ Israel batii nle baanya ni nɛ. 33 Baanu ni ɔlaa nwu suoto layɔɔ ma, ni baatansa Yaa nɛ. Nioso batasintɔkɔ alɛ bɔɔlaadieko ma kakpɛ munwɔɔsa kale ka di Ruben batii ku Gad batii nsi nii.

34 Ninfɛ di Ruben batii ku Gad batii lata oleɔta akyikye nwu leyooto le mmle alɛ: Kamaayilatɛ di Awo Ntɛɛ alɛ SAATE nwu ninle Yaa.