1 Obe wɔ di Amori batii baka bamuu di Yordan kufĩ kamɛɛkɔ ku Kanaan baka bamuu di lekpo kotoko lanu ni mmle di SAATE nwu lata Yordan okle lasɔɔ ni di Israel batii nwu anu, dialaase ni di obe wɔ baawaalɛ baafe nii, situ lɛma lapɛ, nioso batasinwɛ sɛkambi alɛ baakyɔɔ Israel batii anu.

2 Di obe nwu kamɛ, SAATE nwu latɔkɔ Yosua alɛ, "Bla afuɔ mpamii faakple fakyɛlɛnsa Israel batii ba suoto manadikyɛlɛnsa ni." 3 Nioso Yosua labla afuɔ mpamii aakyɛlɛnsa Israel basuɔtɔ suoto di Gibeat Aralot.*

4 Nnya lɛsaa le oso aabla ni nkpo: Mba bamuu niadie ni di Egipte-basuɔtɔ ba bamuu niawo ni bakpɛtɛ alɛɛ kanya-lakpi di ɔfaafuu nwu di osuku obe wɔ baadie ni di Egipte. 5 Baakyɛlɛnsa basuɔtɔ ba bamuu niadie ni ninfa suoto, kafɔɔ basuɔtɔ ba bamuu baalofo ni di ɔfaafuu di osuku ɔkyɛ lɛma kamɛ, baadie ni di Egipte batakyɛlɛnsa ma suoto. 6 Diekye Israel batii lakyɛ baakyi di ɔfaafuu nwu alɛɛ afosi-ana dialaase di obe wɔ di basuɔtɔ ba bamuu niawo ni kakpɛ ɔkyɛ di obe wɔ baadie ni di Egipte kasɔ lakpi. Ta batakyɔɔ ni SAATE ɔlaa atoko oso. Diekye SAATE nwu laka ntam aata ma alɛ blɔbanya kasɔ ka aatɛ aabuɛ aatɛ ni bate lɛma alɛ abata wo nii. Kasɔ ka di nnyɛɛtu ku bablɔ kobiɛ ninfe nii. 7 Nioso aanyu babisuɔtɔbi lɛma asi baabayila di kayilakɔ lɛma, mma nfɛ niale mba suoto di Yosua lakyɛlɛnsa ni nɛ. Batakyɛlɛnsa ma suoto di obe nwu, diekye badikyɛlɛnsa ma suoto di osuku. 8 Baakyɛlɛnsa ni kale nwu kamuu basuɔtɔ suoto baaloo ni kamaa, baasiɛ di kasiɛkɔ nwu dialaase di obe wɔ di suoto lasie ma nii.

9 Ninfɛ di SAATE nwu latɔkɔ Yosua alɛ, "Miɛ ntootekete sɛlanle ole di Egipte di suoto lee." Nioso bɔɔlɛɛ lɛba nwu alɛ Gilgal diɛbadu miɛ.

10 Di kɔwɛntɛ nwu lefosi dii naafa kɔtɔɔfɔ, di Israel batii awɛntɛ kanya, obe wɔ baasiɛ ni di Gilgal di Yeriko sɛtaata nwu yi, Israel batii lale Okpi Diisi Ofe dii. 11 Di Okpi Diisi Ofe dii nwu kaleesɛ, dii nwu nkpo kale, baale kasɔ nwu suoto alesaa: bloblo wɔ manankpee ni lɛnyankasaa ku atitabi sɛnle. 12 Mana ladiɛ ɔkpakpaa di dii le baale ni kasɔ nwu alesaa kaleesɛ; mana kuonwii ditasinwɛ aata Israel batii. Kafɔɔ lɛlɛɛ nwu nkpo baale Kanaan kasɔ alesaa.

13 Obe wɔ di Yosua latɛɛtɛɛ ni Yeriko, aatakatɛsa anu aanyu katoo, ni aanya osuɔtɔ onwii n-yɛ nwɔ di anu ku kapamii ɛɛbɔkɔtɛ akle ni di kɔnɛɛ nɔɔ nɛ. Ni di Yosua lakata aakyɛ nwɔ katũ aalaakaalɛ nwɔ alɛ, "Ole wo fale ɛɛ, sɛɛ balo loo ole?"

14 Ninfɛ di osuɔtɔ nwu labuɛ alɛ, "Ninle kuonwii ole, kafɔɔ fɛ SAATE nwu bakpɛtɛ kanyayilatɛ, mianwu lɛwa nɛ." Ninfɛ di Yosua lase katũ kaasɔ di dibu kanya, ni aakaalɛ nwɔ alɛ, "Ɔmɛnlaa ninkpe saate nii ɛɛta kpɛmblatɛ nɔɔ?"

15 Ni di SAATE nwu kakpɛ kanyayilatɛ nwɔ labuɛ alɛ, "Diki ntokota lɛfɔ, diekye lɛba le fayɛ ni lɛbla klekle." Ninfɛ di Yosua labla nkpo nɛ.