1 Nnya aba ya di Israel batii lafũ ni fɛ atesaa di Kanaan kasɔ, di oletatɛ Eleaser ku Nun obisuɔtɔbi Yosua ku Israel ana nfaabi banɔɔfo lasɛ bata ma ni. 2 Atrebi baawii baasɛ atesaa lɛma nwu baata ana nwu anaasĩ-ku-kakyɛ, fɛ mmle di SAATE nwu labuɛ aafenko ni di Mose suoto. 3 Mose lata ana nwu anyɔ-ku-kakyɛ atesaa lɛma di Yordan kufĩ katunkɔ, kafɔɔ atata Lewi batii atesaa di babule kamɛ. 4 Diekye Yosef babisuɔtɔbi labla ana anyɔ- Manase ku Efraim. Lewi batii ditafũ kasɔ nwu kalekɔ kukanwii, kafɔɔ sekpoo se kamɛ baasiɛ ni lete ku babɔkɛɛ sele ku banankyue lɛma sɛfa kaweekɔ nsɔ. 5 Nioso Israel batii lasɛ kasɔ nwu, fɛ mmle kanya di SAATE nwu latɔkɔ ni Mose.

6 Ninfɛ di Yuda batii lawa Yosua ɔkyɛ di Gilgal, ni di Yefune, Kenisi otii nwu obisuɔtɔbi Kaleb latɔkɔ nwɔ alɛ, "Faye ɔlaa wɔ di SAATE nwu latɔkɔ ni Mose, Yaa otii nwu di Kades Barnea di ami ku afɔ suoto. 7 Alɛɛ afosi-ana lafũ fiɛ di SAATE nwu kpɛmblatɛ Mose lakpee mi lekyɛ Kedes Barnea alɛ nnaanyunyu kasɔ nwu. Ni lakple lawa labatɔkɔ nwɔ mmle kanya lanya ni nɛ. 8 Kafɔɔ babiloo ba ku ami niakata buakyɛ ni lata batii nwu situ lakpa ku lɛyɛkɛ. Kafɔɔ, ami, latikanko SAATE, Yaa nii nwu ku otu nii omuu. 9 Nioso di dii nwu nkpo Mose laka ntam aatɛɛ alɛ, ‘Kasɔ ka di nkpaa lɛfɔ ntɔɔnafu ni kamale atesaa lɛfɔ ku babi lɛfɔ ale dinaa ni kaloo, diekye feetikanko SAATE, Yaa nii nwu ku otu omuu.’

10 "Nioso nunua, fɛ mmle di SAATE nwu laka ni ntam, atooklee nkpa nii alɛɛ afosi-ana-anɔɔ, diayɔ ni di obe nwu aabuɛ ni ɔlaa wɔ mmle aatɔkɔ ni Mose, di obe wɔ di Israel batii lakyɛ baatookyi ni di ɔfaafuu kamɛ. Nioso nnyɛɛ ninfũ miɛ, ntoofũ alɛɛ afosi-anɛ-anɔɔ! 11 Miɛ lekple nkpe osie fɛ dii le di Mose lakpee mi ni kɔtɔ; nkpe osie kadie nkyɛ ni kakpɛ nunua fɛ mmle late ni di obe nwu kamɛ. 12 Nioso nunua yɔ lekpenkpe kale ka mmle di SAATE nwu labuɛ aatɛ ni di dii nwu nkpo fatɛɛ. Afɔ omu faanu falɛ Anak batii lawɛ ninfa, sekpoo lɛma nwu lamuɔ baatofo seyoyiɛ kafɔɔ baakyisa, kafɔɔ, SAATE nwu kamakyakaakoe ntososa ma ndiki fɛ mmle aabuɛ nii."

13 Ninfɛ di Yosua lata lɛtɔtrɔ Yefune obisuɔtɔbi Kaleb nɛ, ni aayɔ Hebron kasɔ aatɔɔ fɛ atesaa nɔɔ nɛ. 14 Nioso Hebron lekple Yefune, Kenisi otii nwu obisuɔtɔbi Kaleb atesaa diɛbadu miɛ. Diekye aatikanko SAATE, Israel batii Yaa nwu ku otu omuu. 15 (Saa yi, Arba leyooto baatika Hebron alɛ Kiriat Arba. Arba lale osuɔtɔ wɔ niatɛ aafũ ni leyooto aalenkee ni di Anak batii kamɛ.)

Ninfɛ di kasɔ nwu latɛ ɔnyɛɛ di kakpɛ suoto nɛ.