1 Di obe kpinwu sɛmaa, di SAATE nwu ntɔɔta ni Israel ɔnyɛɛ ɔtɛ di balo lɛma bamuu niɛmana ma beekyi ni suoto, di obe nwu Yosua ntoobe, ɛɛkpa ni anu nwaa di alɛɛ kamɛ yi, 2 aalɛɛ Israel omuu- banɔɔfo, batunletɛ, bakantɛ ku banɔɔfotii lɛma-ni aatɔkɔ ma alɛ: "Ntoobe, lɛkpa anu nwaa kafɔɔ di alɛɛ kamɛ. 3 Aye bamu bitɔɔnya lɛsaa biala di SAATE, Yaa lee ntɔɔbla ni nnle be mmle mmuu ta aye oso; SAATE, Yaa lee ninle nnwɔ niakpɛ aata ye nii. 4 Binyuma mmle lasɛ ni nnle be niabu ni mmuu kasɔ fɛ atesaa lata ni ana lee- nnle be lalenkee nii- di Yordan ku Lekpo Kplɛ di kufĩ kamɛɛkɔ obo. 5 SAATE, Yaa lee omu kamatososa ma andiki di osuku lee. Abatukusa ma andiki di anu lee, minaayɔ kasɔ lɛma nwu, fɛ mmle di SAATE, Yaa lee labuɛ aatɛ aata ye nii.

6 "Biwɛ osie nwaa; bilolaa binyu biɛkyɔɔ atoko di asaa ya amuu bɛɛkpana ni di Mose Kufiofa Kukũ nwu kamɛ, alɛ biemunikĩi bife oletanɛɛkyɛ ee ɔmɛntukyɛ. 7 Bitambla onwii ku nnle be niebu basi ni kaamɛ lee; bitanlɛɛ afiɔ lɛma ayooto ee bika ntam di asaa lɛma suoto. Bitansumu nya ee biawakasɔ biata nya. 8 Kafɔɔ dikpeni biemufũ SAATE Yaa lee bieklee kpinkpĩ, fɛ mmle bikle ni bia nua.

9 "SAATE nwu ntootososa nnle kplɛ ku nsiene di anu lee; diɛbadu miɛ dii le mmle, kuonwii diifuo ye oyilako. 10 Onwii lee lalenkee batii kakpe, diekye SAATE Yaa lee nkpɛ anta ye, fɛ mmle aabuɛ aatɛ nii. 11 Nioso bilolaa binyu nwaa, biɛbɔmbɔ SAATE Yaa lee.

12 "Kafɔɔ nse biemunikĩi biɛlaakpɔtɔsa suoto lee ku mba ninkpe ni nkpa di nnle be niebu basi ni di kamɛ lee, nse biɔyɔ bawo ku mma, biɛbla onwii ku ma kafɔɔ yi, 13 ni bitofo nwaa bilɛ SAATE Yaa lee nwu dilɔbasintososa nnle nwu di anu lee. Nni kamaa, nfɛ babakple akyĩ ku sikũ manta ye, kowesee di mmaa lee ku siwuu di anumbi lee, ninaase di obe wɔ bibakpi mindie ni di kasɔ biene ka mmle, di SAATE, Yaa lee lɛta ye nii.

14 "Kanunua nfɛ komamiɛ nlɛ nkyɛ bawa loo osuku nwu. Biye di situ lee ku sɛkla lee simuu bilɛ ntam biene nwu mmuu di SAATE Yaa lee lata ye ni kunwii diesĩ alɛ diɛwa kaanya. Ntam biala ntɔɔwa kaanya; kunwii diesĩ ku ɔwa. 15 Kafɔɔ fɛ mmle di SAATE Yaa lee ntam biene biala lɛwa ni kaanya, nkpo di SAATE nwu kamawako okpile omuu aafunaa nii, ninaase di obe wɔ atɔɔwɔɔsa ye ni di kasɔ biene ka ɛɛta ye ni suoto nɛ. 16 Nse biɛwaalɛ SAATE Yaa lee kanya ninii, nka ɛɛta ye nii, biɛkyɛ biosumu bayaa bamba, minwakasɔ minta nya kafɔɔ, ni SAATE nwu ɔblɔ kamasoo di suoto lee, ni bibakpi wla mindie di kasɔ biene ka ɛɛta ye ni suoto."