YOSUA 11

Yosua Lalenkee Yabin Ku Baklopo Nɔɔ

1 Obe wɔ di Hasor ɔka Yabin lanu ni ɔlaa wɔ mmle, ni aata kanya Madon ɔka Yobab, Simron, Aksaf baka, 2 ku katoo-kasɔ baka ba niawɛ ni di abokote suoto di Araba di Kinerot kala kasɔ, di kufĩ kamɛɛkɔ akpenkpe nkpaa ku Nafot Dor di kufĩ kamɛɛkɔ; 3 ku Kanaan batii di kufĩ katunkɔ ku kufĩ kamɛɛkɔ; ku Amori batii, Heti batii, Perisi batii ku Yebusi batii di lekpenkpe kale suoto; ku Hewi batii di Hermon Kobokote kalɔ di Mispa kasɔ suoto nɛ. 4 Ni baadie baawa ku bakpɛtɛ lɛma bamuu ku bapɔnkɔ sɛlambu kplɛ ku bakeke ba di bapɔnkɔ nnanfi ni-bakpɛtɛ dikudi kplɛkplɛ di lɛpɔ late ni fɛ ɔtɛnsĩa di lekpo kotoko. 5 Baka ba mmle bamuu lasiisa bakpɛtɛ, ni baabla kasiɛkɔ kanwii di Merom Ntu katũ alɛ babakpɛko Israel nɛ.

6 Ni di SAATE nwu latɔkɔ Yosua alɛ, "Tanyɛkɛ ma, diekye kɔsɛɛ nuakpa okle kamayɔ ma bamuu nkpee di Israel nnɛɛ, beelo ma nii. Bibubudi bapɔnkɔ lɛma sɛkpaakũ, biɛfiɛ kafɔɔ bakeke lɛma ba di bapɔnkɔ nnanfi ni."

7 Nioso Yosua ku bakpɛtɛ nɔɔ bamuu ladie baabafua ma di Merom Ntu katũ baakpɛko ma. 8 Ni di SAATE nwu layɔ ma aakpee di Israel nnɛɛ nɛ. Baalenkee ma, ni baatikanko ma baalaadu Sidon Kplɛkplɛ ku Misrefot Maim ku Mispa Ɔtaata nwu di kufĩ katunkɔ, dialaase di obe wɔ di kubanwii ditabu basiɛ ni nkpa. 9 Yosua labla ma fɛ mmle di SAATE nwu latɔkɔ nwɔ nii: Aabubudi bapɔnkɔ lɛma sɛkpaakũ ni aafiɛ bakeke lɛma ba di bapɔnkɔ nnanfi nii.

10 Di obe nwu kamɛ Yosua lakple nkpaamaa aalaafũ Hasor okpoo, aalo ɔka lɛma ku kapamii. (Hasor niale disi di sɛka nlekɔ be mmle mmuu nɛ.) 11 Baalo obiala di Hasor okpoo kamɛ ku kapamii. Baawɔɔsa ma fɛɛ, batadiɛ lɛsalɛsaa ninwuna nii, ni aafiɛ Hasor nwu omu nɛ.

12 Yosua lafũ sɛka-kpoo se mmle, ni aalo baka lɛma ku kapamii nɛ. Aawɔɔsa ma klekle, fɛ mmle di SAATE nwu kpɛmblatɛ Mose labuɛ nii. 13 Kafɔɔ Israel ditafiɛ sekpoo kplɛ se niatika ni di akpenkpe lɛma osi kuonwii- diediki Hasor wɔ di Yosua lafiɛ nii. 14 Ni di Israel batii latuka kakpɛ kamɛ asaa amuu ku babɔkɛɛ sele lɛma bamuu di sekpoo kplɛ se mmle baasifiko nɛ. Kafɔɔ baalo batii nwu bamuu ku kapamii dialaase di obe wɔ baawɔɔsa ma ni klekle, batabu kuonwii ninwuna nii. 15 Fɛ mmle di SAATE nwu ladiki ni kpɛmblatɛ nɔɔ Mose kanya, nkpo kafɔɔ di Mose latɔkɔ Yosua, ni di Yosua kafɔɔ labla ni nɛ; aabla asaa ya amuu di SAATE nwu latɔkɔ ni Mose.

Kasɔ Ka Di Yosua Lafũ Nii

16 Nioso Yosua lafũ kasɔ ka mmle kamuu: lekpenkpe kale nwu ku Kalakasɔ kamuu, Gosen kasɔ kamuu ku kufĩkamɛɛkɔ akpenkpe nkpaa ku Araba ku Israel abokote ku akpenkpe nkpaa lɛnya. 17 Diayɔ ni di Halak Kobokote ko nikofe ni Seir, dialaadu ni Baal Gad di Lebanon Ɔtaata di Hermon Kobokote kalɔ. Aamufũ baka lɛma bamuu, ni aapɛpɛɛ ma aalo nɛ. 18 Yosua lakpɛko baka ba mmle bamuu diaklɛ. 19 Okpoo kplɛ kuonwii ditabla atoko ɔkyɛ ole kanya ninii ku Israel batii, diediki Hewi batii ba niasiɛ ni di Gibeon, kafɔɔ sekpoo kplɛ se mmle simuu ladieko ma kakpɛ. 20 Diekye SAATE nwu omu niata situ lɛma lawɛ osie alɛ bakpɛko Israel, ta mmle aawɔɔsa ma ni klekle oso, andiki ma ni ku nyaami ɔtanya, fɛ mmle di SAATE nwu latɔkɔ ni Mose.

21 Di obe nwu kamɛ Yosua lakyɛ aalaawɔɔsa Anak batii di lekpenkpe kale nwu: diayɔ ni di Hebron, Debir ku Anab, diayɔ ni di Yuda lekpenkpe kale kamuu ku Israel lekpenkpe kale kamuu. Yosua lawɔɔsa ma klekle ku sekpoo lɛma nwu. 22 Anak batii kuonwii ditabu di Israel kasɔ suoto; Gasa ku Gad ku Asdod lete di bawo labu. 23 Nioso Yosua lafũ kasɔ nwu kamuu, fɛ mmle di SAATE nwu latɔkɔ ni Mose kanya, ni aayɔ ka aata Israel fɛ atesaa di ana lɛma akudi kanya nɛ.

Ninfɛ di kakpɛ latɛ ɔnyɛɛ di kasɔ nwu suoto nɛ.