1 Obe wɔ di kale nwu kamuu laloo ni Yordan okle ɔwaalɛ, SAATE nwu latɔkɔ Yosua alɛ, 2 "Diki basuɔtɔ lefosi-banyɔ fakyeko batii nwu kamɛ, kɔna biala onwii. 3 Tɔkɔ ma kafɔɔ falɛ bayɔ lefosi afuɔ anyɔ di Yordan okle ntɛɛntɛɛ di lɛba le tintĩ di olebatatɛ nwu layila ni, baatuka nya basifiko balaatɛ di lɛba le bibate ni ku kakyɛ nwu."

4 Nioso Yosua lalɛɛ basuɔtɔ lefosi-banyɔ nwu aadiki ni di Israel batii kamɛ asiisa, kɔna biala onwii. 5 Ni aatɔkɔ ma alɛ, "Bife bile SAATE Yaa lee nwu lɛlakaa katũ bisifi Yordan okle ntɛɛntɛɛ. Obiala lee akɛnkɛ difuɔ atika di nimuusi nɔɔ, di ana lee di Israel batii lɛpɔ kanya, 6 diatuo ni fɛ dituosaa di kamɛ lee. Di dii kaamaa, nse babi lee lɛkaalɛ ye alɛ, ‘Afuɔ ya mmle kasɔ mɔ?’ 7 Bitɔkɔ ma bilɛ baabudi Yordan okle kuadiɛ obiɛ ofe di SAATE nwu kanya ninii lɛlakaa anu. Obe wɔ di lɛlakaa nwu lawaalɛ ni Yordan okle, ntu nwu di Yordan labudi. Afuɔ ya mmle nle ninyumasaa diɛta Israel batii dinaa ni kaloo."

8 Nioso Israel batii labla fɛ mmle di Yosua latɔkɔ ma nii. Baayɔ lefosi afuɔ anyɔ di Yordan okle ntɛɛntɛɛ, di Israel batii ana lɛpɔ kanya, fɛ mmle di SAATE nwu latɔkɔ ni Yosua; ni baatuka nya baalaadu kasiɛkɔ lɛma, nfa baayɔ nya baatɛ nɛ. 9 Ni di Yosua latɛ lefosi afuɔ anyɔ nwu niate ni di Yordan okle ntɛɛntɛɛ di lɛba le tintĩ di olebatatɛ ba niatuka ni kanya ninii lɛlakaa nwu layila nii. Nioso ate ninfa diɛbadu miɛ dii le mmle.

10 Olebatatɛ ba niatuka ni lɛlakaa nwu labe baayila di Yordan okle ntɛɛntɛɛ dialase di obe wɔ di batii nwu labla ni lɛsaa biala le di SAATE nwu latɔkɔ ni Yosua, fɛ mmle di Mose latɔkɔ ni Yosua. Batii nwu lapɛsɛwa baafe. 11 Di bamuu lɛma lawaalɛ, ɔwaalɛ, ni di olebatatɛ nwu ku SAATE nwu lɛlakaa ladie baawa kakyɛka nyɔɔfa, di batii latoonyu nii. 12 Ruben ku Gad ku Manase kɔna-kakyɛ kanwii basuɔtɔ lawaalɛ baafe ku akpɛsaa baale Israel batii katũ, fɛ mmle di Mose latɔkɔ ma nii. 13 Basuɔtɔ fɛ nkpe afosi-ana ba niaklee ni akpɛsaa baata ni kakpɛ lawaalɛ baafe di SAATE nwu anu baakyɛ kakpɛ di Yeriko sɛtaata.

14 Dii nwu nkpo SAATE nwu latakatɛsa Yosua katoo di Israel batii bamuu anu; ni baayɔ dibu baatɔɔ di nkpa nɔɔ ayi amuu kamɛ nɛ, fɛ mmle baabu ni Mose.

15 Ninfɛ di SAATE nwu latɔkɔ Yosua alɛ, 16 "Tɔkɔ olebatatɛ ba nintuka ni Kanya Ninii Lɛlakaa nwu baadie di Yordan okle nwu kamɛ."

17 Nioso Yosua latɔkɔ olebatatɛ nwu alɛ, "Bidie di Yordan okle nwu kamɛ."

18 Ni di olebatatɛ nwu nintuka ni SAATE nwu kanya ninii lɛlakaa ladie di okle nwu kamɛ nɛ. Baase ose nkpaa lɛma di kasɔ kosole suoto yi, ni di Yordan okle ntu lakple diasifi lɛba nimi, diayii fɛ mmle diate ni saa.

19 Di dii fosile di kɔwɛntɛ kasale, di Israel awɛntɛ kanya, batii nwu lakata baadie di Yordan okle baalaasiɛ di Gilgal di Yeriko kufĩ katunkɔ kɔmɛ. 20 Ninfɛ di Yosua lase lefosi afuɔ anyɔ nwu baayɔ ni di Yordan okle di Gilgal nɛ. 21 Ni aatɔkɔ Israel batii alɛ, "Dii kaamaa nse banantii lee lɛkaalɛ bate lɛma alɛ, ‘Afuɔ ya mmle kasɔ mɔ?’ 22 Bitɔkɔ ma bilɛ, ‘Israel batii lawaalɛ Yordan okle di kasɔ kosole suoto.’  23 Diekye SAATE Yaa lee lasɔɔsa Yordan okle di anu lee dialaase di obe wɔ biawaalɛ baafe ni. SAATE Yaa lee nwu labla di Yordan fɛ mmle aabla ni di Lekpo Sɛɛle di obe wɔ aasɔɔsa nini di anu loo dialaase di obe wɔ buawaalɛ buafe nii. 24 Aabla nle mmle alɛ batii bamuu kaasɔ suoto katofo alɛ SAATE nwu kɔnɛɛ nkpe osie alɛ obe lele biayɛkɛ SAATE Yaa lee nwu."