1 ತೆಳಾಮ ಇಸಾಕ ಯಾಕೊಬನೆ ಬಲೈನ ಆಶಿರ್ವಾದ ಕರಿನ ತಿನೆ ಆಜ್ಞಾಪಿಸಿಸೆಲ ಸು ವ್ಹೈ ಕದ್ಯಾಮ ತು ಕಾನಾನ್ಯನಿ ಹೆಣ್ಣನೆ ಹಿವಾ ಕರಿಲ್ಯು ನೈ. 2 ಪದ್ದನ ಅರಾಮ ದೆಶಮಾ ರ‍್ಹಯಲ ತಾರಿ ಯಾ ನೊ ಬಾ ಥಯಲ ಬೆತೊಲೊಮನಾ ಘರೆ ಗೈಪಡ. ತ್ಯಾ ತಾರಿ ಯಾನೊ ಭೈ ಥಯಲ ಲಾಬಾನನಾ ದಿಕ್ರಿಯೊಮಾ ಯಕ್ಲಿನೆ ಹಿವಾ ಕರಿಲೆ. 3 ಸರ್ವಶಕ್ತ ಥಯಲ ತುನೆ ಆಶಿರ್ವಾದ ಕರಿನ ತುನೆ ಘನ್ನಾ ಸಂತತಿಯೊನೆ ದಿನ ತಾರಾಕ್ಹು ಘನ್ನಾ ಜ಼ನಾಂಗೊ ಹುಟ್ಟೆ ನಿಂಗತ ತುನೆ ದಿವಾದೆ. 4 ಕ್ಹುದಾ ಅಬ್ರಹಾಮನೆ ದಿದಲ ಆಶಿರ್ವಾದ ತುನೆಬಿ ತಾರಾ ಸಂತತಿನೆಬಿ ದಿವಾದೆ ಕ್ಹುದಾ ಅಬ್ರಹಾಮನೆ ವಾಗ್ದಾನ ಕರಲ ನಿಂಗತಜ಼಼ ತು ಹಮ್ನಾ ಪ್ರವಾಸಿ ಥಯಲ ದೆಶನೆ ತುಜ಼ ಹೊಂದಲ ನಿಂಗತ ಕ್ಹುದಾ ತುನೆ ಆಶಿರ್ವಾದ ಕರಿನ ತುನೆಬಿ ತಾರಾ ಸಂತತಿವಾಲಾವೊನೆ ದಿವಾದೆ ಕದ್ಯೊ. 5 ಇಸಾಕ ಯಾಕೊಬನೆ ವಳಾಯೆಲ್ಪರ ತೆ ಪದ್ದನ್‍ ಆರಾಮಮಾ ರ‍್ಹಯಲ ಯಾಕೊಬನಿ ವರಿ ಎಸಾವನಿ ಯಾ ಥಯಲ ರೆಬೆಕ್ಕಳನೊ ಮ್ಹೊಟೊ ಭೈ ಆರಾಮನೊ ರ‍್ಹಯಲ ಬೆತುವೆಲನೊ ದಿಕ್ರೊ ಥಯಲ ಲಾಬಾನ ಕನ ಗಯೊ. 6 ಇಸಾಕ ಯಾಕೊಬನೆ ಆಶಿರ್ವಾದಸಿನ ಪದ್ದನ್ ಅರಾಮಮಾ ಚೊ಼ಕರಿ ದ್ಹುಂಡಿನ ಹಿವಾ ಕರಿಲಿವಾನೆ ಮೊಕಲ್ಯೊ, ತೆ ಯಾಕೊಬನೆ ಆಶಿರ್ವಾದ ಕರತಾಳೆ ತಿನೆ ತು ಕಾನಾನ್ಯನಿ ಚೊ಼ಕರಿನೆ ಲಿವು ನೈ ಕೈನ ಅಪ್ಪಣೆ ದಿದಲ ಎಸಾವ ದೆಕ್ಯೊತೊ. 7 ಯಾಕೊಬ ತಿನಾ ಮಾ-ಬಾಪನಾ ವಾತೊನೆ ವಿದೆಯ ಥೈನ ಪದ್ದನ್‍ ಅರಾಮನೆ ಗಯೊ. 8 ಕಾನಾನ್ಯನಾ ಹೆಣ್ಣಬಚ್ಚಾ ತಿನೊ ಬಾ ಥಯಲ ಇಸಾಕನೆ ಪಸಂದ ನತ್ತಿ ಕೈನ ಎಸಾವ ತಿಳದಿಲಿದ್ಯೊ. 9 ಎಸಾವ ಇಷ್ಮಾಯೆಲನಾ ಕ್ಹಾಮೊ ಗೈನ ಅಬ್ರಹಾಮನೊ ದಿಕ್ರೊ ಇಷ್ಮಾಯೆಲನಿ ದಿಕ್ರಿ ನೆಬಾಯೊತನಿ ನ್ಹನಿ ಭಎನ ಥಯಲ ಮಹಲತನೆ ಹಿವಾ ಕರಿಲಿದ್ಯೊ.

10 ತೆಳಮಾ ಯಾಕೊಬ ಹಾರಾನನೆ ಜೌ ಕೈನ ಬೆರ್ಷೆಬತೊ ಗಯೊ. 11 ತೆ ಪ್ರಯಾಣ ವಾಲೊ ಥೈನ ಜಾ಼ತಾಮಾ ಟೈಮ ಥಯಲಕ್ಹು ತೆ ರಾತೆ ತ್ಯಾಜ ಹುಬ್ರಯೊ. ತೆ ತ್ಯಾ ರ‍್ಹಯಲ ದಗ್ಡಾವೊಮಾನೊ ಯಕ್ಕ ದಗ್ಡೊ ಲಿನ ಮಾತಾನಾ ಮ್ಹೆಲಿನ ತೆ ಜ಼ಗಾಮಾ ಕ್ಹುರಾಯೊ. 12 ತೆ ರಾತೆ ತೆ ಯಕ್ಕ ಕ್ಹಪನ ದೆಕ್ಯೊ ತೆ ಕ್ಹಪನಮಾ ಯಕ್ಕ ಇಚ್ಚಣಗಿ ಭುಮಿಪರ ಹುಬ್ರೈತಿ ತಿನಿ ತುದಿ ಹಬಾಳನೆ ಮುಟ್ಟಿತಿ ತಿನಾ ಉಪ್ಪರ ಕ್ಹುದಾನಾ ದುತೊ ಚಡಾನು ಉತರಾನು ಕರಾಡಾತಾ. 13 ತೆನೈಸೊ ಕ್ಹುದಾ ತಿನಾ ಉಪ್ಪರ ಹುಬ್ರೈನ ತಾರೊ ಬಾ ಥಯಲ ಅಬ್ರಹಾಮನೊ ಕ್ಹುದಾ ಇಸಾಕನೊ ಕ್ಹುದಾ ಥಯಲ ಯಹೊವಾ ಮಿಜ಼ ವ್ಹೈ ತು ಕ್ಹುರಯಲ ಭುಮಿನೆ ತುನೆ ವರಿ ತಾರಿ ಸಂತತಿನೆ ಬಿ ದ್ಯುಸ. 14 ತಾರಿ ಸಂತತಿ ಭುಮಿನನಿ ಬಾರಿಕ ದಗ್ಡಾ ಯಕ್ಲಾ ಲೆಕ್ಕೊ ನೈಸೊ ಥಾವಸ ತು ಪುರ್ವ ಪಶ್ಚಿಮ ದಕ್ಷಿಣ ಉತ್ತರ ದಿಕ್ಕೊನೆ ಫೈಲಶಿ. ತಾರಾಕ್ಹು ತರಾ ಸಂತತಿಕ್ಹು ಭುಮಿನಾ ಕ್ಹಾರಾ ಖಾಂದಾನವಾಲಾ ಆಶಿರ್ವಾದ ಹೊದಸ. 15 ದೆಕ ಮಿ ತಾರಾ ಕ್ಹಾತೆ ರ‍್ಹೈನ ತು ಜಾವಾನಾ ಹರಯಕ್ಕ ಜ಼ಗಾಮಾ ಬಿ ತುನೆ ವಚಾ಼ಡಿನ ವರಿ ಆ ದೆಶನೆ ಬಲೈ ಲೌಸ ಕಾ ಕದ್ಯಾಮ ಮಿ ತುನೆ ಕದಲ ಕ್ಹಾರು ಕರ‍್ಯಾವಚಿ ಮಿ ತುನೆ ಚ್ಹೊಡತೊ ನೈ ಕದ್ಯೊ. 16 ಯಾಕೊಬ ನಿಂದರತೊ ಉಟಿನ ಕ್ಹರಿಮಾಜ಼ ಕ್ಹುದಾ ಥಯಲ ಯಹೊವಾ ಆ ಜ಼ಗಾಮಾ ಛೆ ಆ ಮನೆ ಗ್ವತ ಥಯು ನೈ ಕದ್ಯೊ. 17 ತೆ ಭುಚಕಲವಲೊ ಥೈನ ಎ ಜ಼ಗಾ ಪವಿತ್ರ ಥಯಲ ಛೆ ಆ ಕ್ಹುದಾನು ಘರಜ಼ ವ್ಹೈ ತೆ ಛೊಡಿನ ಬಿಜು಼ ಸುಜ಼ ನ್ಹವೈ ಆ ಪರಲೊಕನು ಬಾಕಲ ವ್ಹೈ ಕದ್ಯೊ. 18 ಯಾಕೊಬ ಪಾಟೆ ಉಟಿನ ತೆ ಮಾತಾನಾ ಹೆಟೊ ಮೊಟಲು ಕರಿನ ಮ್ಹೆಲಿದಲ ದಗಡೊ ಲಿನ ತಿನೆ ಖಂಬೊ ಕರಿನ ಹುಬ್ರಾಡಿನ ತಿನಾ ಉಪ್ಪರ ತೆಲ ರಿಚಾ಼ಯೊ. 19 ತೆನೈಸೊ ತೆ ಜ಼ಗಾನೆ ಬೆತೆಲ್ ಕವಾನು ನಾಮ ಮ್ಹೆಲ್ಯೊ ತಿತ್ತಿ ಪ್ಯಲಾ ತೆ ಗಾಮನೆ ಲುಜ಼ ಕವಾನು ನಾಮ ವ್ಹತ್ತು. 20 ಯಾಕೊಬ ತ್ಯಾ ಕ್ಹಮ ಘಾಲಿನ ಕ್ಹುದಾ ಮಾರಾ ಕ್ಹಾತೆ ರ‍್ಹೈನ ಮಿ ಜ಼ಾವಾನಾ ಆ ವಾಟಮಾ ಮನೆ ವಚಾ಼ಡಿನ ಖಾವಾನೆ ಅನ್ನ ಬಿ ಘಾಲಿವಾನೆ ವಣ್ಣಾ ಬಿ ಮನೆ ದಿನ. 21 ಫರಿನ ಮನೆ ಮಾರಾ ಬಾನಾ ಘರೆ ಮನೆ ಚೊ಼ಕಿತರಾ ವಚಾ಼ಡಿ ಬಲೈಲಾಯೊ ಕದ್ಯಾಮ ಯಹೊವಾಜ ಮನೆ ಕ್ಹುದಾ ಥಾವಸ. 22 ಎ ನೈಸೊ ಮಿ ಖಂಬೊ ಕರಿನ ಹುಬ್ರಾಡಾಲ ಆ ದಗಡೊ ಕ್ಹುದಾನು ಘರ ಥಾವಸ ತೆಳಾಮಾ ತು ಮನೆ ದಿವಾನಾ ಕ್ಹಾರಾಮಾ ದಕ್ಮಾ ಯಕ್ಕ ಭಾಗ ತುನೆ ಮಿ ದ್ಯುಸ ಕ್ಹರಿಮಾಜ಼ ದ್ಯುಸ ಕೈನ ಮಾಂಗಿಲಿದ್ಯೊ.