1 ಹಮಾರಾ ಬಾನಿ ಕ್ಹಾರಿ ಆಸ್ತಿ ಯಾಕೊಬನಾ ಪಾಲಿ ಥೈ, ಹಮಾರಾ ಬಾನಿ ಆಸ್ತಿಕ್ಹುಜ಼ ತೆ ತೆಕ್ಲೊ ಸೌಕಾರತನಾ ಮಳಿ ಲಾಬಾನನಾ ಬಚ್ಚಾಜ ಕೈಲಿವಾನು ವಾತೊ ಯಾಕೊಬ ಐಕ್ಯೊ. 2 ತೆಜ಼ ನೈಸೊ ಯಾಕೊಬ ಲಾಬಾನನು ಮ್ಹೊಡು ದೆಕ್ತಾಮಾ ಪೈಲಾನಿಂಗತ ದಿಕ್ಹ್ಯು ನೈ. 3 ವರಿ ಯಹೊವಾ ಯಾಕೊಬನೆ ತು ತಾರಾ ಬಾನಾ ದೆಶನೆ ತಾರಾ ಬಂದುವೊಕನಬಿ ಫರಿನ ಜಾ಼ ಮಿ ತಾರಾ ಕ್ಹಾತೆ ರ‍್ಹೌಸ ಕೈನ ಕದ್ಯೊ. 4 ಅಮ್ಮ ರ‍್ಹಲಕ್ಹು ಯಾಕೊಬ ರಾಹೆಳನೆ ಲೆಯಳನೆ ತಿನಾ ಬಕ್ರಾ-ಬಕ್ರಿಯೊನು ಹಿಂಡನೆ ಚರಾವಾನಾ ರಾನ್ಮಾ ಬಲೈನ. 5 ತಿವ್ನೊನೆ ಕದಲ ಸುವೈ ಕದ್ಯಾಮ ತಾರಾ ಬಾನು ಮ್ಹೊಡು ಮಾರಾ ವಿಷಯಮಾ ಪೈಲಾ ನಿಂಗತ ನತ್ತಿ ಕೈನ ದಿಕ್ಹ್ಯುಸ ತಿಮ್ಮ ರ‍್ಹಯುತಬಿ ಮಾರಾ ಬಾನೊ ಕ್ಹುದಾ ಮಾರಾಕ್ಹಾತೆ ಛೆ . 6 ಮಿ ತುಮಾರಾ ಬಾನಿ ಸೆವಾ ಪುರಾ ಮನಸಕ್ಹು ಕರ‍್ಯೊಸ. ತೆ ಕ್ಹಾರು ತುಮೊನೆ ಗ್ವತ್ತ ಛೆ. 7 ವರಿಬಿ ತುಮಾರೊ ಬಾ ಮನೆಮೊಸ ಕರಿನ ಮಾರೊ ಪಗಾರ ದಖಾಸಲಾ ಬದಲಿ ಕರ‍್ಯೊ. ಮನೆ ಕ್ಹುದಾ ತಿನಾಹತಿ ಮೊಸ ಕರಾನೆ ಥಯು ನೈ. 8 ತುಮಾರೊ ಬಾ ಮನೆ, ಚಿಕ್ಕಿಯೊ ರ‍್ಹಯಲ ಬಕ್ರಾ ತುನೆ ಪಗಾರ ರ‍್ಹಯವಾದೆ ಕೈನ ತೆ ಕತಾಮಾ ಕ್ಹಾರಾಜ಼ ಹಿಂಡ ಚಿಕ್ಕಿಯೊನಾ ಥಯಾ.ತೆ ಘೆರಿಯೊ ರ‍್ಹಯಲ ತಾರೊ ಪಗಾರ ಥೈನ ರ‍್ಹವಾದೆ ಕೈನ ಕತಾಮಾ ಬಕ್ರಾ ಕ್ಹಾರಾ ಘೆರಿಯೊನಾ ವ್ಹತಾ. 9 ಇಮ್ಮ ಕ್ಹುದಾ ತುಮಾರಾ ಬಾನಾ ಬಕ್ರಾ ಕ್ಹಾರಾ ವರಿ ಜಾನವರೊ ತಕಂತೊ ಕಾಡಿನ ಮನೆ ದಿದ್ಯೊ. 10 ಬಕ್ರಾ ಪೆಟ್ಟ ರ‍್ಹತಾಮಾ ಮಿ ಕ್ಹಪನಮಾ ದೆಕ್ತಾಮಾ ಬ್ಕಾವೊನಾ ಕ್ಹಾತೆ ಸಂಗಮ ಕರ್ತಾಮಾ ಬಕ್ರಿಯೊ ಕ್ಹಾರಿಯೊ ಘೆರಿಯೊ, ಚಿಕ್ಕಿಯೊ ಮಚ್ಚೆ ಥೈನ ದಿಕ್ಹಿಯೊ. 11 ತೆ ಕ್ಹಪನಮಾ ದೆವದುತ, ಯಾಕೊಬ ಕೈನ ಬಲಾತಾ ಮಿ ನ್ಹ್ಯಾ ಛೆ ಕೈನ ಕತಾಮಾ 12 ತೆ ಮನೆ, ಲಾಬಾನ ತಾರಿ ವಿಷಯಮಾ ಚಾ಼ಲಿಲಿದಲ ತರಿಕೊ ಮಿ ದೆಕ್ಯೊಸ, ತಿನಾಹುತಿ ಡೊಳೊ ಉಚೈನ ಬಕ್ರಿಯೊನಾ ಕ್ಹಾತೆ ಬಕ್ರಾ ಸಂಗಮ ಕರಾಲಾ ಬ್ಕರಾವೊನೆ ದೆಕೊ ಗೆರಿಯೊ, ಚಿಕ್ಕಿಯೊ, ಮಚ್ಚನಿ ವ್ಹತಿಯೊ. 13 ತಾರಾ ಖಂಬಾನೆ ಅಭಿಶೆಕ ಕರಿನ ಮನೆ ಕ್ಹಮ್ಮ ಕರಲ ಬೆತೆಲನೊ ಕ್ಹುದಾ ಮಿಜ಼ ವ್ಹೈ ಹಮ್ನಾ ತು ಉಟಿನ ಆ ದೆಶನೆ ಛೊಡಿನ ತು ಹುಟ್ಟಲ ದೆಶನೆ ಬಿ ವರಿ ತಾರಾ ಕ್ಹಾಂದಾನ ಕನ ಫರಿನ ಜಾ಼ ಕೈನ ಕದ್ಯೊ. 14 ಯಾಕೊಬ ಎ ವಾತೊ ಕದಲ್ಪರ ರಾಹೆಳ ವರಿ ಲೆಯಳ ಹಮಾರಾ ಬಾನಾ ಘರ‍್ಮಾ ಹಮ್ನಾ ಹಮೊನೆ ಸು ಪಾಲ ಛೆ? 15 ತೆ ಹನೊನೆ ಬಿಜಾ಼ ವ್ಹೈ ಕೈನ ದೆಕಸ್ತೊ ತೆ ಹಮೊನೆ ಇಕ್ಕಿನ ಹಮೊಕ್ಹು ಮಳಲ ರೊಕ್ಕಾ ತೆ ಯಕ್ಲೊ ಗಳಿಗಯೊಸ್ತೊ. 16 ತಿನಾಹುತಿ ಕ್ಹುದಾ ಅಪ್ನಾ ಬಾ ಕಂತೊ ಕಾಳಿದಲ ಆಸ್ತಿ ಪುರಾ ಹಮೊನೆ ಬಿ ವರಿ ಹಮಾರಾ ಬಚ್ಚಾವೊನೆ ಬಿ ದಿದ್ಯೊಸ್ತೊ ಕ್ಹುದಾ ಕಿಮ ಕವಸ ತಿಮ್ಮಜ಼ ಕರ ಕೈನ ಉತ್ತರ ದಿದ್ಯಾ. 17 ತೆಳಾಮಾ ಯಾಕೊಬ ತಿನಾ ಬಚ್ಚಾವೊನೆ ವರಿ ತಿನಿಯೊ ಬಾಕ್ಡಿಯೊನೆ ಹುಂಟಪರ ಚ಼ಡಾಯೊ. 18 ತೆ ಗಳಸಲ ಕ್ಹಾರಿ ಆಸ್ತಿ ಪದ್ದನ ಅರಾಮ ದೆಶಮಾ ಗಳಸಲ ಕ್ಹಾರಾ ಜಾನವರನೆ ಲಿನ ಕಾನಾನ ದೆಶೆ ತಿನಾ ಬಾ ಥಯಲ ಇಸಾಕಕನ ಚಾಲ್ಯಾ. 19 ತೆಳಾಮಾ ಲಾಬಾನ ತಿನಾಬಕ್ರಾನಾ ಬಾಲೊ ಕತ್ರಾನಾ ಹುತಿ ಗಯೊತೊ. ಇಮ್ಮ ರ‍್ಹತಾಮಾ ರಾಹೆಲ ತಿನಾ ಬಾನಾ ಘರ್ಮಾ ರ‍್ಹಯಲ ಮೊರ್ತಿಯೊ ಚೊ಼ರಿ ಕರ್ಲಿದಿ. 20 ತೆನೈಸೊ ಯಾಕೊಬ ಅರಾಮ್ಯನೊ ಲಾಬಾನನೆ ತಿಳಸಾಯಾ ವಾಚಿ ತಿನೆ ಮೊಸ ಕರಿನ ಗೈಪಡ್ಯೊ. 21 ಅಮ್ಮ ತೆ ತಿನಿ ಆಸ್ತಿ ಪುರಾ ಲಿನ ಯುಫ್ರೆಟಿಸ ಮ್ಹೊಟಿ ನದಿನೆ ದಾಟಿನ ಗಿಲ್ಯಾದ ಕವಾನಾ ಡೊಂಗರನಿ ವಾಟ ಧರಿನ.

22 ಯಾಕೊಬ ಫರಿನ ಗಯೆಲ ತನ್ನ ದಿನ್ನ ಥಯಲ್ಪರ ಲಾಬಾನನೆ ಗ್ವತ ಥಾತಾಮಾ. 23 ತೆ ತಿನಾ ಸಂಬಧಿಕೊನೆ ಮಳೈನ ಕ್ಹಾತ ದಿನ್ನ ಪ್ರಯಾಣ ಕರಿನ ಯಾಕೊಬನಾ ಪಾಚೊ಼ ಗೈನ ಗಿಲ್ಯಾದ ಡೊಂಗರನಾ ಗಾಮ್ಮಾ ತಿನೆ ಮಳ್ಯೊ. 24 ತೆನೈಸೊ ತೆ ರಾತೆ ಕ್ಹುದಾ ಅರಾಮ್ಯನೊ ಥಯಲ ಲಾಬಾನನಾ ಕ್ಹಪನಮಾ ಐನ ತು ಯಾಕೊಬನಾ ಕ್ಹಾತೆ ಚೊ಼ಕು ಕೆಟ್ಟ ಬೊಲ್ಯಾ ಬಗರ ಹುಶಾರಕಿಕ್ಹು ರ‍್ಹೆ ಕದ್ಯೊ. 25 ತೆ ಥಯಲ್ಪರ ಲಾಬಾನ ಯಾಕೊಬನೆ ಮಳಲ್ಪರ ಯಾಕೊಬ ಡೊಂಗರ‍್ಮಾ ತಿನು ಝುಪಡು ಘಾಲಿದ್ಯೊತೊ ಲಾಬಾನಬಿ ತಿನಾ ಮನಕ್ಹೊನಾ ಕ್ಹಾತೆ ತೆಜ಼ ಗಿಲ್ಯಾದ ಡೊಂಗರ‍ಮಾ ಝುಪಡು ಘಾಲಿದ್ಯೊ. 26 ಲಾಬಾನ ಯಾಕೊಬನೆ ಆ ಸು ವ್ಹೈ ತು ಕರಲ? ತು ಮಾರಾ ದಿಕ್ರಿಯೊನೆ ಯುದ್ಧಮಾ ಧರಿನ ಲಾಯೆನಿಂಗತ ಲಿನ ಮನೆ ಕದ್ಯಾವಾಚಿ ತ್ಯಾಂತೊ ಐಪಡ್ಯೊಸ್ತೊ. 27 ಕಾ ಮನೆ ಮೊಸ ಕರಿನ ಚೊ಼ರಿ ಕರಲನಿಂಗತ ಐಪಡ್ಯೊ? ಮಿ ಕ್ಹುಶಿಕ್ಹು ತುನೆ ಗಿದ್ದೊ, ನ್ಹಾಚಾಲಾ ವರಿ ಘನ್ನ ತರಾನಾ ವಾದ್ಯೊನಾ ಕ್ಹಾತೆ ತುನೆ ವಳಾತೊತೊ. 28 ತೆನೈಸೊ ತು ಮಾರಾ ದಿಕ್ರಿಯೊನೆ ವರಿ ಮಾರಾ ನಾತ್ನಾ-ನಾತ್ನಿಯೊನೆ ಬಿ ಗಳೆ ಮಳನೆ ನೈ ಥಯಲನಿಂಗತ ಕರ‍್ಯೊಸ ತು ಕರಲ ಪಿಸಾಳಾನು ಕಾಮ ವ್ಹೈ. 29 ತುಮೊನೆ ಕೆಟ್ಟ ಕರಾನೆ ಮಕನ ತಾಕತ ಶೆ ತೆನೈಸೊ ಕಾಲನಾ ರಾತೆ ತಾರಾ ಬಾನೊ ಕ್ಹುದಾ ಯಾಕೊಬನೆ ಚೊಕು ರ‍್ಹವಾದೆ ಕೆಟ್ಟ ರ‍್ಹವಾದೆ ಬೊಲು ಕದ್ಯಾವಾಚಿ ತಿಮ್ಮಜ಼ ಹುಶಾರಕ್ಹು ರ‍್ಹೆ ಕೈನ ಕದ್ಯೊ. 30 ತೆನೈಸೊ ತುನೆ ತಾರಾ ಬಾನಾ ಘರೆ ಜಾ಼ವಾನಿ ಘನ್ನಿ ಆಸ ರ‍್ಹಯಲಕ್ಹು ತು ಜೌ಼ ಲಾಗ್ಯು ತೆನೈಸೊ ತು ಮಾರಾ ದೆವಸ್ಥಾನೊನೆ ಕಾ ಚೊ಼ರಿ ಕರ‍್ಯೊ? ಕೈನ ಪುಚ್ಯೊ಼. 31 ತಿನಾಹುತಿ ಯಾಕೊಬ ಲಾಬಾನನೆ ತು ತಾರಾ ದಿಕ್ರಿಯೊನೆ ಜ಼ಬರದಸ್ತಿಕ್ಹು ಮಕಂತೊ ಕಾಳೆಶಿ ಕೈನ ಭುಚ್ಕಿನ ಐಪಡ್ಯೊ. 32 ತಾರಾ ದೆವಸ್ಥಾನೊ ಕಿಕನ ಮಳಸ ತ್ಯುನೆ ಮರಾದೆ. ಮಾರಾ ಸಂಭಂದಿಕರೊನಾ ಕ್ಹಾಮೊಜ಼ ಮಾರಿ ಆಸ್ತಿನೆ ಮೊಜ಼ ಸಕ್ಸಿ. ತಿಮಾ ಸುಬಿ ತಾರು ಮಳ್ಯುಮ ತೆ ತು ಲೆ ಕೈನ ಕದ್ಯೊ. ರಾಹೆಳ ತೆ ದೆವಸ್ಥಾನೊನೆ ಚೊ಼ರಿ ಕರಲ ಯಾಕೊಬನೆ ಗ್ವತ ನ್ಹೊತು. 33 ಲಾಬಾನ ಯಾಕೊಬನಾ ಝುಪ್ಡಾಮಾಬಿ, ಲೆಯಳನಾ ಝುಪ್ಡಾಮಾಬಿ, ತೆ ಭಂಬಿ ದಾಸಿಯೊನಾ ಝುಪ್ಡಾವೊಮಾಬಿ ಹುಡಕ್ಯೊ. ತೆನೈಸೊ ತಿನೆ ಸುಜ಼ ಮಳ್ಯು ನೈ. ಲೆಯಳನು ಝುಪ್ಡು ಛೊಡಿನ ರಾಹೆಳನಾ ಝುಪ್ಡಾನೆ ಆಯೊ. 34 ರಾಹೆಳ ತೆ ಮುರತಿಯೊನೆ ಲಿನ ಉಂಟನಾ ಚಾಮ್ಡಾನಾ ಕೈಚಿಲಾಮಾ ಘಾಲಿನ ತಿವ್ಯುನಾ ಉಪ್ಪರ ಬೆಟಿತಿ. ಲಾಬಾನ ಝುಪ್ಡಾಮಾ ರ‍್ಹಯಲ ಕ್ಹಾರು ಸಾಮನ ದೆಕ್ಯೊತಬಿ ತಿನೆ ದಿಕ್ಹ್ಯಾ ನೈ. 35 ರಾಹೆಳ ತಿನಾ ಬಾನೆ, 'ಬಾ ಮಿ ತಾರಾ ಕ್ಹಾಮಿ ಉಟಿನ ನೈ ಹುಬ್ರೈರೆ ಶಿಟ್ಟ ಥವು ನಕೊ, ಮಿ ಭಾರಿ ಥೈಸ" ಕೈನ ಕದಿ. ತಿ ಚೊ಼ಕಿತರಾ ಹುಡಕ್ಯೊತಬಿ ತೆ ಮುರತಿಯೊ ನೈ ಮಳಲಕ್ಹು ಫರಿನ ಗೈಪಡ್ಯೊ. 36 ತೆಳಾಮಾ ಯಾಕೊಬ ಘನ್ನೊ ಶಿಟ್ಟ ಥೈನ ಲಾಬಾನನೆ ಜೊ಼ರ ವದರಿನ, 'ತು ಅಕ್ಲೊ ಘಾಬ್ರೊ ಥೈನ ಮಾರಾ ಪಾಚೊ಼ ಲಾಗಿನ ಆವಾ ವರಕ್ಹು ಮಿ ಸು ತಪ್ಪ ಕರ‍್ಯೊಸ? 37 ಮಾರಾ ಸಾಮನಮಾ ಪುರಾ ತು ಧುಂಡಾ ಅಕಲು ಮಿ ಸು ತಪ್ಪ ಕರ‍್ಯೊತೊ? ತಾರು ಸ್ವಂತ ಮಾರಾಮಾ ಸು ಬಿ ಮಳ್ಯು ಸು? ಮಾರಾ ಸಂಬಂದಿಕರೊನಾ ಕ್ಹಾಮೊ ಬಿ ತಾರಾ ಸಂಬಂದಿಕರೊನಾ ಕ್ಹಾಮೊ ಬಿ ತೆ ಲೈನ ಮ್ಹೆಲ. ಇವುನೆಜ಼ ಅಪೆ ಭ್ಹಂಬಿ ಜ಼ನಾವೊನು ನ್ಯಾಯ ಕರಾದೆ. 38 ಮಿ ತಾರಾ ಕ್ಹಾತೆ ಇಕ್ಹ ವರಕ್ಹ ವ್ಹತ್ತೊ. ತಾರಾ ಹಿಂಡೊನಾ ಹೆಣ್ಣ ಬಕರಿಯೊನಾ ಬಚ್ಚಾವೊನೆ ಖಲಾಸ ಕರಿ ಪಾಡ್ಯೊ ನೈ. ತಾರಾ ಹಿಂಡನಾ ಟಗರೊನೆ ಮಿ ಸು ಖೈ ಪಾಡ್ಯೊ ನೈ. 39 ರಾನ್ಮಾನಾ ಜಾನ್ವರೊ ಖಲಾಸ ಕರಲ ಬಕ್ರಿಯೊ, ಬಕ್ರಾನೆ ತಾರಾ ವಾಟಾಮಾ ಘಾಲ್ಯಾವಾಚಿ ಮಿಜ಼ ಕ್ಹಾರು ಹಾಳ ಥಯಲ ಉಚೈಲಿದ್ಯೊ. ರಾತ್ಮಾಬಿ, ದಿನ್ಮಾಬಿ ಜ಼ವೈ ಗಯೆಲನೊ ಲೆಕ್ಕೊ ಮಕಂತೊ ತು ಲಿದ್ಯೊ. 40 ದಿನ್ಮಾ ತಡಕಾಕ್ಹು ಕ್ಹಾಂಜ಼ನಿ ಥಂಡಮಾ ತ್ರಾಸ ಖಾದ್ಯೊ. ಕ್ಹುರವಾನೆಬಿ ಮೌಕೊ ಮಳ್ಯೊ ನೈ, ಮಾರಿ ಪರಿಸ್ಥಿತಿ ಇಮ ವ್ಹತಿ. 41 ಇಕ್ಹ ವರಕ್ಹ ತಾರಾ ಘರ್ಮಾ ವ್ಹತೊ. ತಾರಿಯೊ ಭಂಬಿ ದಿಕ್ರಿಯೊನಾ ಹುತಿ 14 ವರಕ್ಹ ತಾರಾ ಬಕ್ರಾವೊನಾ ಹುತಿ 7 ವರಕ್ಹ ಸೆವೆ ಕರ‍್ಯೊ. ತಬಿಬಿ ಮಾರೊ ಪಗಾರ ದಕ್ಹ ಸಲಾ ಬದಲಿ ಕರ‍್ಯೊ. 42 ಮಾರೊ ಬಾ ಥಯಲ ಕ್ಹುದಾ ಅಬ್ರಹಾಮನೊ ಕ್ಹುದಾ ಇಸಾಕನಿ ಭಯಾ ಭಕ್ತಿ ಕ್ಹು ವಪ್ಪಿಲಿದಲ ಕ್ಹುದಾ ಮಾರಾ ಕ್ಹಾತೆ ನೈ ರ‍್ಹವತ್ತೊ. ಕ್ಹರಿಮಾಜ಼ ಮನೆ ತು ಖಾಲಿ ಹತೆಜ಼ ಮೊಕ್ಲಿಪಾಡ್ತೊತೊ ಕ್ಹುದಾ ಮಾರೊ ಕಷ್ಟ ಮಿ ಖಾದಲ ಪ್ರಯಾಸ ಗ್ವತ್ತ ರ‍್ಹಯಲ ಹುತಿ ಕಾಲ ರಾತೆ ತುನೆ ಭುಚ್ಕಾಡ್ಯೊ.ಕದ್ಯೊ.

43 ಲಾಬಾನ ಯಾಕೊಬನೆ ಎ ಚೊಕ್ರಿಯೊ ಮಾರಿಯೊ ದಿಕ್ರಿಯೊ ವ್ಹೈ. ತ್ಯುನಾ ಬಚ್ಚಾ ಮಾರಾ ರ‍್ಹಯಲ ವ್ಹೈ. ತೆ ಜಾನವರೊ ತೆ ಮಾರಾ ವ್ಹೈ. ತು ದೆಕಾನು ನ್ಹ್ಯಾನು ಹರಿಯಕ್ಕ ಮಾರು ವ್ಹೈ. ತೆ ನೈಸೊ ಮಾರಿಯೊ ದಿಕ್ರಯೊನೆ ರ‍್ಹೈನೆಕಾ ತ್ಯುನಾ ಬಚ್ಚಾ಼ವೊನೆ ರ‍್ಹೈನೆಕಾ ಲಿವಾನೆ ಸಾದೈನತ್ತಿ. 44 ತಿನಾಹುತಿ ತಾರಾ ಕ್ಹಾತೆ ಯಕ್ಕ ವಪಂದ ಕರಲಿವಾನೆ ತಯ್ಯಾರ ಛೆ. ಅಪ್ನಾ ವಪ್ಪಂದನೆ ಸಾಕ್ಷಿನಾಹುತಿ ಮ್ಹೊಟೊ ದಗ್ಡೊಲಿನ ಖಾಮ ನಿಂಗತ ಹುಬ್ರಾಡಿಯೆ. ಕೈನ ಕದ್ಯೊ. 45 ತಿನಾನಿಂಗತಜ಼಼ ಯಾಕೊಬ ಸಾಕ್ಷಿನೆ 46 ತೆ ತ್ಯುನಾ ಮನಕ್ಹೊನೆ ಹಜು಼ನಾ ದಕ್ಹಾ ದಗ್ಡಾ ಲೈನ ಘುಂಪೊ ಕರೊ ಕೈನ ಕದ್ಯೊ ತ್ಯುನೆ ತೆ ಕದಲ ತಿಮ್ಮಜ಼ ಕರ‍್ಯಾ ವರಿ ತ್ಯುನೆ ತ್ಯಾಜ಼ ಬೈಟಿನ ಖಾದ್ಯಾ. 47 ಲಾಬಾನ ತೆ ದಗ್ಡಾನಾ ಘುಂಪಾನೆ ಯಗರಸಾಹದುತ ಕೈನ ಗಲೆದ ಕೈನ ನಾಮ ಮ್ಹೆಲ್ಯೊ. 48 ತೆಳಾಮಾ ಲಾಬಾನಹಮ್ನಾ ತುನೆಬಿ ಮನೆ ಥಯಲ ವಪ್ಪಂದನೆ ಆ ಘುಂಪೊಜ಼ ಸಾಕ್ಷಿ ವ್ಹೈ. ಕೈನ ಕದಲ ಹುತಿ ತಿನೆ ಗೆಲೆದ ಕೈನ ನಾಮ ಪಡ್ಯು. 49 ತೆನೈಸೊ ತೆ ಅಪೆ ಯಕ್ನಾ ಯಕ್ಕ ದುರ ರ‍್ಹತಾಮಾ ಯಹೊವಾಜ಼ ಅಪೊನೆ ದೆಕಿಲಿವಾದೆ ಕೈನ ಕದಲ ಹುತಿ ತಿನೆ ಮಿಚ್ಪಾ ಕೈನ ನಾಮ ಪಡ್ಯು. 50 ವರಿ ಲಾಬಾನ ತು ಮಾರಿ ಯೊ ಭಮಬಿ ದಿಕ್ರಿಯೊನೆ ತ್ರಾಸ ದಿದ್ಯೊಮ ಬಿಜಿಯೊನೆ ಕಿನೆಬಿ ತು ಹಿವಾ ಕರ್ಲಿದ್ಯೊಮ ಕುನಬಿ ವಿಚಾರ ಕರಾಲಾ ರ‍್ಹಯಾಮ ಕ್ಹುದಾಜ಼ ಅಪ್ನಿ ವಪ್ಪಂದನೆ ಸಾಕ್ಷಿ ವ್ಹೈ ಕದ್ಯೊ. 51 ಎ ನಯಸೊ ಲಾಬಾನ ಯಾಕೊಬನೆ ತುನೆಬಿ ಮನೆಬಿ ವಚ್ಮಾ಼ ಮಿ ಹುಬ್ರಾಡಲ ಖಾಮ ದೆಕ ಅ ಘುಂಪಾನೆ ದೆಕ. 52 ಮಿ ಕೆಟ್ಟ ಕರಾನಾಹುತಿ ಎ ಘುಂಪೊ, ದಾಟಿನ ತುಕನ ಆತೊ ನೈ ತಿನಾನಿಂಗತಜ಼಼ ತುಬಿ ಎಘುಂಪಾನೆ ವರಿ ಖಾಮನೆ ದಾಟಿನ ಔ ನೈ. ಇನಾಹುತಿ ಎಜ಼ ಸಾಕ್ಷಿ ವ್ಹೈ. 53 ಅಬ್ರಹಾಮನೊ ಕ್ಹುದಾ ನಾಹೊರನೊ ಕ್ಹುದಾ ತ್ಯುನೊ ಬಾನೊ ಕ್ಹುದಾ ತುನೆಬಿ ವರಿ ಮನೆಬಿ ಫೈಸ್ಲೊ ಕರಾದೆ ಕದ್ಯೊ.ತಿನಾ ನಿಂಗತಜ಼಼ ಯಾಕೊಬ ತಿನೊ ಬಾ ಥಯಲ ಇಸಾಕ ಭಯ ಭಕ್ತಿಕ್ಹು ಆರಾಧನಾ ಕರಾನಾ ಕ್ಹುದಾಪರ ಕ್ಹಮ್ಮ ಘಾಲ. 54 ಯಾಕೊಬ ತೆ ಡೊಂಗರಪರ ಯಗ್ನ್ಯಾ ಕರಿನ ತಿನಾ ಬಂದುವೊನೆ ಅನ್ನ ಖಾವಾನು ಹುತಿ ಬಲೈನ ತ್ಯುನೆ ಅನ್ನ ಖೈನ ತ್ಯಾಜ಼ ರಾತ ಕಾಡ್ಯಾ. 55 ಪಾಟೆ ಲಾಬಾನ ಉಟಿನ ತಿನಿಯೊ ದಿಕ್ರಿಯೊನೆ . ವರಿ ನಾತನಾವೊನೆ ಮಯಾ ಕರಿನ ತ್ಯುನೊನೆ ಆಶಿರ್ವಾದ ದಿನ ತಿನಾ ಘರೆ ಗೈಪಡ್ಯೊ.