MATEYO 25

Lubeta lwamamanino

31 "Chiindi Mwana a Muntu a kuza mubulemu bwakwe, a bangele boonse anguwe, ulakukkala achuno chakwe chabulemu. 32 Alimwi bantu ba mishobo yoonse balakubungana kulinguwe, alimwi ulakwandanya bantu, bweenka mbuli mwembezhi mbwaandanya mbelele kuzwa kumpongo. 33 Ulakubika mbelele kulyanza lyakwe lyakululyo amane mpongo ulakuzhibika kulumweshi. 34 Amana Mwami ulakwaambila bali kululyo lwakwe kwaamba, ‘Kamuza imwe nimulelekelwe a Taata, mubweze bulelo mbumwakabambilwa kuzwa kumatalikilo anyika. 35 Nkambo ndakalinga kunvile nzala pesi mwakampa chakulya, alimwi ndakalinga kunvile nyotwa mwakampa maanzhi akunwa, ndakalinga mweenzu mwakantambula. 36 Ndakalinga mantanda mwakansamika, nindakalinga mulwazhi mwakanswaya, a nindakalinga muntolongo mwakaza mukunswaya.’ 37 Amane basalali balakumunviila ati, ‘O Mwami ndilili nitwakakubona kofile nzala akukupa chakulya naa kukupa maanzhi chiindi niwakalikunvile nyotwa? 38 Ino ndilili nitwakakubona koli mweenzu alimwi akukutambula, naa niwakalinga mantanda akukusamika? 39 Ino ndilili nitwakakubona koli mulwazhi naa koli muntolongo alimwi a kukuswaya? 40 "Amane Mwami ulakubanviila ati, ‘Kashimpe ndamwambila, kufumbwa nchimwakachitila baba bashoonto bakwesu mwakachitila ndime.’

41 "Amane ulakwaambila abo bali kulumwenshi kwaamba ati, kamuzwa kuli ndime imwe nimwakashinganishigwa, akuunka mu gehena walo uyo wakabambilwa Satani a bangele bakwe! 42 Nkambo ndakalinga kufile nzala pesi taaku nimwakampa chakulya alimwi ndakalinga kufile nyotwa taaku nimwakampa maanzhi. 43 Ndakalinga mweenzu taaku nimwakantambula alimwi nindakalinga mantanda taaku nimwakansamika, alimwi nindakalinga mulwazhi naa muntolongo taaku nimwakanswaya.’ 44 Amana balakumunviila ati, ‘Ndilili O Mwami nitwaakubona kofile nzala naa koli mweenzu naa koli mantanda naa koli mulwazhi naa muntolongo amana twabula kukugwasha?’ 45 Mwami ulakubanviila ati, ‘Kashimpe ndamwambila, kufumbwa nchimwakakaka kuchitila aba bashoonto bakwesu. Mwakakakila kuchitila ndime.’ 46 "Amane balakutolwa ku gehena, pesi basalali blakuunka ku buumi butamani."