1 Ono Jesu wakaunka ku chilundu cha Oliva. 2 Buzuba bwakachilila kuseni seni wakauka ku chipaililo. Bantu boonse bakamubunganina, akumuzhunguluka, amane wakakkala anshi akutalika kubaiisha boonse. 3 Bamane ba maii ba mulawo aba Faliisi bakamuletela mukaintu umwi wakajatwa chimambe. Bakamwimika akati. 4 Bakambila Jesu ati, "Omuii, mukaintu uyu wajatwa chimambe. 5 Mu mulawo wa Mosesi ulalailila ati aumwe mabwe mukaintu uyo. Ino iwe ulaamba nzhi?" 6 Mukumubuzha ubo bakalinga kumuteya kwaamba bamujanine kaambo.

Pesi Jesu wakakotama akutalika kulemba anshi. 7 Ono nibakazumanana kumubuzha, wakakotamuka akubaambila ati, "Utachite chinyonyono akati kanu ataangune kuwaala libwe ku mukaintu uyu." 8 Amane wakakotama alimwi akulemba anshi. 9 Nibakanva bobu, bakatalika kuzwa omwi omwi akaunka kutalikila kubanene kwakashaala boo mukaintu uyo eenka kainvi kumpela kuli Jesu. 10 Jesu nakakotamuka, wakabuzha mukaintu uyu ati, "O mukaintu, balikuli? Saa taaku wakupa mulandu?"

11 Taaku Omuii," wakanviila mukaintu. Amane Jesu wakamwambila ati, "Andime inga nshikupi mulandu. Kounka, pesi utakabishi alimwi."

12 Ono Jesu nakaamba ba Faliisi ati, "Ndime mumuni wanyika," wakaamba ati, "Mfumbwa unchilila ulakuba mumumuni wa buumi, alimwi takaendi mu mushiinzhe." Pesi ulakuba amumuni wa buumi. 13 Ono mukambo kaka ba Faliisi bakamubuzha baamba, ono mbuli mbulyaambilila umwiine, bumboni bwako taaku nchibwaamba.

14 Jesu wakanviila ati, "Nakuba kwaamba ndalyambilila ndimwiine, bumboni bwangu mbwachobeni, nkambo ime ndizhi nkundakazwila akuntekuunka. Pesi imwe tamuzhi nkundakazwila akuntekunka. 15 Imwe mulabeteka abuntu bwanu, Pesi ime nshibeteki muntu naba omwi. 16 Pesi nadabeteka, kusala kwangu nkwa kashimpe, nkambo nshili neenka, ndi a Taata uyo wakantuma. 17 Mu milawo yanu kulilembelwe kwaamba bumboni bwa bantu bobilo mbwa kashimpe. 18 Ndime ndyambilila bumboni ndimwiine, alimwi kamboni umwi ngu Taata uyo wakantuma."

19 Bamane bakamubuzha ati, "Ino Baiso bali kuli?" Jesu wakanviila ati,

"Tamunzhi abalo ba Taa tamubazhi," "Nimwalikunzhi niinga aba Taa kamubazhi."

20 Jesu wakaamba aya mazwi nakalinga kuiisha mulubaanza lwa tempele kufaafi abusena kwakalikubikilwe mulumbo. Alimwi taaku wakamujata nkambo chiindi chakwe kachitana kushika.

21 Alimwi Jesu wakabaambila ati, "Ntokuzwa wo, alimwi mulakunangaula, alimwi mulakufila muzhinyonyono zhanu. Nkunshi ngunke, tamukonzhi kuza." 22 Ono ba Juuda bakatalika kubuzha buzha kwaamba ati, "Saa ulaanda kulijaya? ‘Nkunja tamukonzhi kushika.’ " 23 Amane Jesu wakaabambila ati, "Imwe muli ba aanshi ano Ime ndi waku julu. Imwe muli banyika iyi, ime nshili wanyika iyi. 24 Nchidamwaambilila kwaamba mulaakufa muzhinyonyono zhanu naa tamushomi kwaamba ati, "Ndime Nguyo Uyo.’"

25 Bakabuzha ati, "Ino ndiweni?" Jesu wakanviila ati, "Bweenka mbundakaamwambila kuzwa kumatalikilo. 26 Ndichite zhintu zhiinji zhakumwaambila, akumubeteka. Pesi uyo wakantuma ulashomeka, alimwi nchindakanva kulinguwe ndaambila nyika." 27 Balo taaku bakanvisha kwaamba wakalikubaambila ali Baishi. 28 Amane Jesu wakaamba ati, "Mwaakusumpula Mwana a Muntu, mulakuzhiba kwaamba ndime nguwe, nshilichitili zhintu ndimwiine, pesi ndaamba makani bweenka mbwakanjiisha Taata. 29 Uyo wakantuma uli andime, taaku nakanshiya neenka, nkambo lyoonse ndachita zhintu nzhayanda." 30 Naakali kwaamba makani aaya bantu baanji bakamushoma.

31 Ono Jesu wakaambila ba Juuda abo bakamushoma ati, "Naa munchilile kunjiisho zhangu, kashimpe mulaba bashichiiya bangu, 32 amana mulaakuzhiba kashimpe alimwi kashimpe kalakumwaangulula." 33 Bakamunviila ati, "Tuli lunyungu lwa Abulahamu alimwi tatuna kubako kale bazhike. Ino inga mwaamba buti kwaamba ati, ‘Tulakwaangululwa’" 34 Jesu wakanviila ati, "Kashimpe ndamwambila mfumbwa ubisha ngumuzhike ku chinyonyono. 35 Abobo muzhike tachite busena bwakukkalilila mu mukwashi. Pesi Mwaana ulakkalilila kukabe kutamani. 36 Naa Mwaana wamwangulula, nkukuti mwangululwa chanchobeni. 37 Ndizhi kwaamba muli lunyungu lwa Abulahamu, pesi mulalangaula nzhila ya kwaamba munjaile mo, nkambo majwi angu abula busena mu myoyo yanu. 38 Ndamwaambila nchindakabona mubushu bwaba Taa, alimwi mulachita nchimwakanva kuzwa kuli ishi wanu. 39 Balo bakanviila ati, "Abulahamu ngu ishi wesu. Jesu nakanviila ati, "Nimwalinga bana Abulahamu," "Anu inga mwachita zhintu nzhakachita Abulahamu. 40 Mbuli mbuchibele mulalangaula nzhila yakunjaila mo, ime nindakamwaambila makani akashimpe ngundakanva kuzwa kuli Leza. Abulahamu taaku nakachita zhintu zhabobu. 41 Mulachita milimo yakachita baiso." Abalo bakamwaambila ati."

"Tabushi baana bakazhalwa mu chimambe," Tuli chite boo Taata omwi walo uli ngu Leza." 42 Jesu wakabaambila ati, "Naa Leza wakalinga ishi wanu, nimwakanyanda, nkambo ndazwa kuli nguwe. Nshinakulizila, Leza nguwakantuma. 43 Ino nkambo nzhi tamuteleli nzhigaamba? Nkambo tamuzumini nzhingamba. 44 Mulazulilwa kuli ishiwanu Satani, alimwi mulaanda kuchita kuyanda kwa ishiwanu nchayanda. Kuzwa kumatalikilo wakalinga mujayi, utazumini kashimpe, nkambo mulinguwe taamu kashimpe. Naa wabeja, ulaamba mushobo wakwe, nkambo ngu mubeji alimwi ngu ishi wababeji. 45 Ono nkambo ndaamba kashimpe, tamunshoomi. 46 Nguni akati kanu ukonzha kujanina kaambo? Naa nkangamba kashimpe, ino tamutekunshomena nzhi? 47 Muntu oonse wa Leza ulanva majwi a Leza. Pesi imwe nchimutanvili nkambo tamuli bantu ba Leza."

48 Ono Jesu bakamubuzha ati, "Saa taaku nitwakaamba kabotu nitwakaamba kwaamba uli mu Samaliya alimwi kwaamba mulindiwe muli muuya ubiibi?" 49 Jesu wakanviila ati, "Nshichite muuya ubiibi, "Ndalemeka Taata, pesi imwe tamundemeki. 50 Nshililumbaizhi ndimwiine. Pesi nkwali umwi ululangaula, uyo ngweshi akamubeteke mulubazu lyangu. 51 Kashimpe ndamwambila kwaamba, mfumbwa uchilila majwi ngushi akabule kubona lufu." 52 Ono kumakani aya, bakaamba ati, "Ono twazhiba kwaamba ulinjililwe muuya ubiibi! Abulahamu wakafa alimwi abashinshimi bakafa, ono iwe ulaamba kwaamba kufumbwa uchilila njiisho zhako takalusoli lufu. 53 Saa iwe uli munene kwiinda ishi wesu Abulahamu? Wakafa alimwi abashinshimi bakafa? Ino iwe ulayeeya kwaamba nduwe nii? 54 Jesu wakanviila ati, "Naa ndalilemya, bulemu bwangu mbwabuyo. Taata wangu uyo ngumwaamba ati ngu Leza wanu, ngumpa bulemu. 55 Nakuba kwaamba imwe tamuna kumuzhiba, ime ndimuzhi, nindakaamba ati nshimuzhi nidakabeja mbuli ndimwe, pesi ndimuzhi alimwi ndachilila majwi akwe. 56 Ono ishi wanu Abulahamu wakakomana kuyeya kubona buzuba bwangu, wakabubona alimwi wakasekelela." 57 Tonakushika a myaaka makkumi osanwe, bakamwambila ati, "Alimwi inga waamba ati wamubona Abulahamu?" 58 Jesu wakanviila ati, "Nchanchobeni ndakwaambila ati, "Abulahamu katanakuzhalwa, ime ndakalinga ko kale’" 59 Ono nkambo kachechi, bakabweza mabwe akumuwaala, pesi Jesu wakabayuba akuzwa mu tempele.