1 Ono ichi nichakainda, Jesu wakalinga kweenda muchishi cha Galili. Taaku nakayanda kushika ku chishi cha Judiya nkambo ka kwaamba bamasololi baba Juuda bakalinga kulangaula nzhila yakumujaila mo. 2 Chiindi cha pobwe yaba Juuda ya matente yakalinga afaafi, 3 Bamakwabo Jesu bakamwaambila ati, "Kozwa mu Galilii alimwi uunke ku Judiya, kwaamba bashichiiya bako bakabone nchinto njochita. 4 Taaku muntu uyanda kuzhibwa uchita zhintu kumbali. Ono nkambo utokuchita zhintu izhi, litondezhe ku nyika!" 5 (Nkambo abamakwabo taaku bakamushoma.)

6 Abobo, Jesu wakabaambila ati, "Chiindi changu tachinakushika, ono kulindimwe chiindi choonse nchibotu. 7 Nyika taikonzhi kumusulaika, pesi ime ilansulika nkambo ndabaambila milimo yanjiyo ibiibi. 8 Kamunka ku pobwe ime tenshinguke, nkambo chiindi changu tachina kushika." 9 Nakamana kwaamba wakashaala mu Galilii.

10 Ono muunshi bamakwabo kabali baunka kale ku pobwe, wakaunka awlo chakuyubilila kutaashi chantangalala 11 Ono ku pobwe basololi baba Juuda bakalinga kulangula Jesu, kababuzha ati, "Ino uli kuli?" 12 Akati ka mbunga ya bantu bakalinga kutepeta kabakazhanya amakani akwe. Bamwi bakalinga kwaamba ati, "Ngu Muntu mubotu." Bamwi bakalinga kwaamba ati, "Taaku, ulabeja, utokusowa bantu." 13 Ono nkambo kakutija ba Juuda bakalinga kushoma taaku muntu wakaamba ali Jesu chantangalala.

14 Ono pobwe nilyakashika akati kati Jesu wakaunka mulubaanza lwa tempele akutalika kuiisha. 15 Ono ba Juuda bakalinga kuya bakakankamana alimwi bakabuzha ati, "Ino uyu muntu walujana kuli lwiiyo ulu katana kuiishigwa?"

16 Jesu wakanviila ati, "Kuiisha uku kulazwa kuli Leza uyo wakantuma. 17 Mfumbwa usala kuchita kuyanda kwa Leza ulakuzhiba naa mbinjiisha bilazwa kuli Leza naa mbyaangu boo ndimwiine 18 Mfumbwa waamba alwakwe mwiine ulanda bulemu bwakwe mwiine, pesi uyo ulangaula bulemu bwa oyo wakamutuma ngu muntu wakashimpe, alimwi muli nguwe taamu luchengo. 19 Saa Mozesi taaku nakamupa milawo? Pesi taaku naba omwi uichilila milawo. Ina nkambo nzhi nchimuyanda kunjaila?"

20 Imbunga yakanviila ati, "Ulichite muuya ubiibi!" "Nguni uyanda kumujaya?"

21 Jesu wakabaambila ati, "Ndakachita chitondezho chiindi chomwi, amana boonse mwakakankamana. 22 Mozesi wakamupa chiyanza chakupalulwa (nakuba ati chiyanza ichi taaku nichakalinga chaakwe ncha bama taata bashikale). Nkukambo ako mulapalula mwaana musankwa mu buzuba bwa Nsabata. 23 Ono naa mwaana musankwa inga wapalulwa mubuzuba bwa Nsabata kwaamba ati mulawo wa Mozesi utatyolwi, Ino nkambo nzhi mulabwekela ndime mukuponya mubili wa muntu mubuzuba bwa Nsabata? 24 Mutabeteki chakulanga a menso, pesi amubeteka cha mashimpe."

25 Ono bantu bamwi baku Jelusalema bakatalika kubuzha ati, "Saa uyu taashi ngu muntu ngubayanda kujaya? 26 Kamubona ngoyu! Utokwaamba chaatangalala, alimwi tabatokwaamba ijwi kulinguwe. Saa bendelezhi bamanizha kale kwaamba uyu ngu Mesiya? 27 Pesi tulizhi uyu muntu nkwazwa, abobo Mesiya aakuza, taaku eshi akazhibe nkweshi akazwile."

28 Ono Jesu nakachili kuiisha mulubanza lwa tempele, wakoongolola ati, "Eye, mulinzhi, alimwi mulizhi nkundakazwa. Nshili waano anguzu zhangu, pesi wakantuma walo mukashimpe. Tamumuzhi akumuzhi, 29 Pesi ime ndimuzhi nkambo ndakazwa kuli nguwe alimwi nguwakantuma ime."

30 Ono bantu bakalinga kuyanda kumujata, Pesi taaku wakabika lyaanza alinguwe, nkambo chiindi chamujata kachitana kushika. 31 Mukati kambunga baanji bakashoma, bakaamba ati, "Naa Mesiya akushika, saa ulakuchita zhitondezho kwiinda uyu muntu?"

32 Ono bama Faliisi bakanva mbunga kabatepeta zhintu izhi alinguwe. Amana bapaizhi banene aba Faliisi bakatuma balindilili ba tempele kwaamba bamujate Jesu. 33 Jesu wakaamba ati, ndi andimwe kwakaindi kashoonto, alimwi ndakuunka kuli oyo wakantuma. 34 Mulaakunagaula, pesi tamukanjani, alimwi nkumbele, inga tamuzi."

35 Amana bama Juuda bakatalika kubuzhanya mulwabo ati, "Ino muntu uyu ulaanda kuunka kuli nkututakonzhi kumujana? Saa ulaanda kunka kuli abo besu bamwaikile akati kaba Giliki, alimwi akuiisha ba Giliki? 36 Ino chilaamba zhi ono nakamba ati, mulakunangaula, pesi tamukajani, alimwi nkumbele, inga tamuzi?"

37 Mubuzuba bunene bwa pobwe bwamamanino, Jesu wakaimikana alimwi akoongolola a lizwi linene waamba ati, kufumbwa ufile nyotwa, aze kulindime anwe. 38 Alimwi kufumbwa ushoma ndime, mbuli malembe mbwaamba ati, ‘Tulonga twa maanzhi apa buumi tulakukunka kuzwa mulinguwe."

39 Kuzwa kuchechi wakalikwaamba Muuya, uyo abo bakalinga kushoma mulinguwe mbweshi bakatambule. Kuzwa ku chiindi icho Muuya kautana kupegwa, nkambo Jesu katana kulemekwa.

40 Bamwi bantu nibakanva majwi akwe aaya bakaamba ati, "Nchachobeni, uyo muntu Mushinshimi."

41 Bamwi bakalinga kwaamba ati, "Ngu Mesiya!"

Alimwi bamwi kabaamba ati, "Ino Mesiya inga wazwa buti ku Galilii! 42 Malembe alaamba ati, Mesiya ulakuzwa kumukowa wa Devedi ku Betelehemu, mumunzhi mwakalinga kukkala Mwami Devedi." 43 Abobo bakapansaana ankambo ka Jesu. 44 Bamwi bakayanda kumujata, pesi taaku wakamujata.

45 Ono kumamanino balindili ba tempele bakajokela kuba paizhi banene baba Falisi nibakashika uko, wakababuzha kwaamba ati, "Ino mwamushiila nzhi?"

46 Balindili bantolongo bakanviila ati, "Taaku wiinga waamba mbuli mbwaamba uyu muntu!"

47 Ba Faliisi bakabuzha ati, "Saa andimwe mulaamba ati wamuchenga?" 48 Saa kuli beendelezhi naa ba Faliisi bakashoma muli nguwe? 49 Taaku pesi batazhi milawo ya Mozesi, balichite lituko kuli Leza!"

50 Ono Nikodimasi, umwi waba Faliisi wakaunka kuli Jesu mu mazuba akaindi wakabuzha ati, 51 "Saa mulawo wesu ulatuzumizha kupa mulandu muntu kamutana kunva icho nchakachita."

52 Balo bakamunviila ati, "Saa ulazwila ku Galili andiwe? Kolanga muli nchicho, mulajana kwaamba mushinshimi tazwili ku Galili."

53 [Abobo boonse bakamwaika akuunka kumuzhaabo.]