1 Ono kwakalinga mu Faliisi Nikodemasi, wakalikuzulwilwa mubweendelezhi bwa chi Juuda. 2 Wakaza kuli Jesu mashiku, akumwaambila ati, "Muii, tulizhi kwaamba iwe nduwe muii wazwa kuli Leza, nkambo taaku muntu unga wachita zhitondezho nzhutokuchita naa Leza katali andiwe."

3 Jesu wakanviila ati, "Nchachobeni, ndakwaambila mashimpe, taaku naba omwi wiinga wabona bwami bwa kujulu kakutaaku kuzhalululwa."

4 Ono Nikodemusi wakabuzha ati, "Ino mbuti muntu mbwiinga wazhaluluwa kali kale munene? Kashimpe inga tabajoki lwabili mulivumo muli banyina kwaamba bazhaluluwe!" 5 Jesu wakanviila ati, "Nchanchobeni, taaku naba omwi ukonzha kunjila mu bwami bwa Leza chita wazhalululwa mu maanzhi a mu Muuya. 6 Uzhalwa ku muntu ngu muntu, pesi uzhalwa a muuya ngwa Muuya. 7 Mutakankamani nkambo ndamwaambila ati mulyeelele kuzhalwa chipya. 8 Muwo ulaunga kufumbwa nkuyanda, ulaunva muzuzumo wanguwo, pesi inga tamuzhibi nkuuzwa naa kuunka. Chili mbuli oonse wakazhalwa a Muuya."

9 Nikodemasi wakabuzha ati, Ino ichi inga chachitika buti?"

10 Jesu wakaamba ati, "Tee iwe uli muii munene mu Izilaili, alimwi nkambo nzhi tozhinvishi zhintu izhi? 11 Nchanchobeni ndamwaambila ati, tulaamba nchituzhi, alimwi tulapa bukamboni ku zhintu nzhitubona pesi imwe nubantu tamutambuli bukamboni bwesu. 12 Ndakamwaambila zhintu zha munyika alimwi tamushomi, ino inga mwashoma buti ndamwaambila zhaku julu? 13 Taaku wakaunka kale ku julu kunze kwa Mwana a Muntu wakazwa ku julu."

14 Bweenka mbuli Mozesi mbwakanyamuna nzoka ya mukuba mu chimpayuma, bweenka awalo Mwana a Muntu mbwelele kusumpulwa, 15 kwaamba muntu ushoma muli nguwe abe a buumi butamani. 16 Obuya Leza mbwakaiyanda nyika wakapa Mwanakwe shimuzhalwa eenka, kwaamba mfumbwa ushoma mulinguwe atafidilili pesi abe a buumi butamani. 17 Nkambo Leza taaku nakatuma mwanaakwe ano anshi kupa mulandu, pesi kufutula bantu kwiinda muli nguwe.

18 Uyo ushoma tapegwi mulandu, pesi uyo utashomi wakapegwa kale mulandu, nkambo taaku nashoma Mwana Leza, shimuzhalwa eenka. 19 Mbobu lubeta mbulu sebenza, mumuni washika munyika, pesi bantu balayanda mushinzhe kwiinda mumuni, nkambo kamichito yabo ibiibi. 20 Uyo oonse uchita chibiibi tayandi mumuni, alimwi inga taazi mu mumuni nkambo kakutija chibiibi chabo inga chabonwa. 21 Pesi uyo oonse uupona mukashimpe ulaza amumuni, kuchita kwaamba nzhibachita zhibonekele kubushu bwa Leza.

22 Nikwakamana, Jesu abashichiiya bakwe bakaunka ku Judiya uko nkubakakkala kwa chiindi alimwi wakababbizha. 23 Ono Joni awalo wakalinga kubbizha ku Enoni kufaafi a Salimu nkambo uko kwakalinga maanzhi aanji, alimwi bantu bakalinga kuza kubbizhigwa. 24 (Mu chiindi ichi Joni katana kubikwa muntolongo.)

25 Bamwi bakalinga bashichiiya ba Joni bakatalika kukazhanya amu Juuda umwi kumakani akusanzhanya. 26 Bakaza kuli Joni a akwaamba ati, "Muii, ulamuyeeya ulya muntu nguwakalinga anguyo kutala amulonga wa Jodani, ulya eenka ngu wakaamba? Langa utekubbizha ono, amana boonse batokuunka kuli nguwe!"

27 Kuli chechi Joni wakanviila ati, "Muntu ulakonzha boo kutambula icho nchaapegwa kuzwa ku julu. 28 Imwe mweenka inga mwapa bukamboni nchindakaamba ati, ‘Nshiishi Mesiya pesi ndatumwa kumpela lyakwe.’ 29 Uyo uchite nabwiinga, ngu shibwiinga. Nakuba bobu mwenzhinyina shibwiinga, ngo oyo wima ampela yakwe akunviila, ulasekelela kwiindilila akambo kajwi lya shibwiinga. Alimwi kusekelela kwangu, ono kwamaninina. 30 Ulyeelele kuba a bulemu bunene ime ndyelele kucheya."

31 Uyo uzwa ku julu ulainda oonse, uyo uzwa munyika ngwa anyika alimwi ulaamba mbuli wazwa munyika. Uyo uzwa ku julu ulainda boonse. 32 Ulapa bukamboni kuchecho nchabona alimwi akunva, pesi taaku naba omwi utambula bukamboni bwakwe. 33 Mfumwa ulitambula ulazhibishisha kwaamba Leza ngwa kashimpe. 34 Uyo wakatumwa a Leza ulaamba majwi a Leza, nkambo Leza wakamupa Muuya umaninine. 35 Taata ulamuyanda Mwana alimwi zhintu zhoonse wazhibika mumanza akwe. 36 Uli oonse ushoma mu Mwana ulichite buumi butamani, pesi uyo ukaka Mwaana takaboni buumi, nkambo bukali bwa Leza bulakuba alinguwe.