1 Nakamana Jesu kwaamba chechi, wakalanga ku julu a kupaila, "Taata, chiindi chashika ono. Pa mwanako bulemu kwaamba mwanaako akupe bulemu. 2 Nkambo wakamupa nguzu zha kweendelezha bantu boonse kwaamba abape buumi butamani kubatu boonse mbakamupa. 3 Ono ubu mbuumi butamani, kwaamba bakuzhibe iwe kwaamba Leza wakashimpe, a Jesu Kilisitu nguwakatuma. 4 Ndakulemeka kunyika mukumanizha mulimo nguwakantuma kuchita. 5 Alimwi ono, Taata, kondemeka abushu bwako, kondemeka abulemu ubo mbundakalikuchite andimwe nyika kaitana kulengwa.

6 "Ono ndakuzubula kuzwa babo mbuwakampa kuzwa mu nyika. Bakalinga baako, wakabapa kuli ndime alimwi bakachilila malailile a jwi lyako. 7 Ono balizhi kwaamba zhoonse nzhiwakampa zhakazwa kuli ndiwe. 8 Nkaambo ndakapa majwi ayo nguwakandailila. Alimwi bakatambula, ono balizhi mashimpe ati ndakazwa kulindiwe alimwi bakashoma ndiwe kwaamba wakantuma.

9 "Aba mbumbabo mbu pailila. Nshipailili ba munyika pesi abo mbuwakampa, nkambo mbaako. 10 Zhoonse nzhichite nzhaako, alimwi zhoonse zhochite nzhaangu. Alimwi bulemu bulaboneka kwiinda muli mbabo. 11 Ono teshi nkale alimwi munyika, pesi balo bachili munyika, alimwi ndaza uko nkobele. Taata Nusalala, kobakwabilila anguzu zha liina lyako, liina ndiwakampa, kwaamba babe omwi, bweenka andiswe mbuli mbutubele omwi. 12 Kanchili ambabo, ndakabakwabilila alimwi ndakababamba kwiinda mu liina ndiwakampa. Taaku naba omwi wakasoweka chita boo uyo wakabikwa kuleta mapenzhi kwaamba malembe azuzikizhigwe. 13 Ono ndaza kulindimwe, pesi ndaamba zhintu izhi kanchili munyika, kwaamba babe a kukomana kwangu kuzwile muli mbabo. 14 Ndabapa jwi lyako alimwi nyika yabasulaika, nkambo tabachili bamu nyika limbi bweenka mbuntali wa mu nyika. 15 Nshipaililili kwaamba ubagushe mu nyika, pesi kwaamba ubakwabilile kuzwa kumubiibi. 16 Tabashi banyika bweenka andime mbuntali wanjiyo. 17 Basalazhe a kashimpe, ijwi lyako nkashimpe. 18 Bweenka mbuwakantuma munyika, andime ndabatuma mu nyika. 19 Nkambo kambabo ndalisalazha kuli ndiwe, kwaamba bweenka abalo balipe cha kachimpe kulindiwe.

20 "Ono nshipailili boo beenka aba, ndapailila abaabo beshi bakashome muli ndime kwiinda mu majwi ababo. 21 Ndapaila kwaamba boonse babe omwi, bweenka iwe Taata mboli muli ndime, andime ndi mulindimwe, abalo bweenka babe mulindiswe kwaamba nyika yoonse ikabashome kwaamba wakantuma. 22 Ndabapa bulemu mbuwakampa, kwaamba babe omwi bweenka andiswe mbutuli omwi. 23 Ime mbe mulimbabo, andiwe mulindime, kwaamba abalo bakamantane chanchobeni, kwaamba nyika izhibe ati ndiwe wakantuma akwaamba wakabayanda bweenka mbuwanyanda andime.

24 "Taata! Wakabapa kuli ndime, alimwi ndayanda kwaamba baya mbuwakampa babe andime uko kumbele, alimwi babone bulemu bwangu mbuwakampa nkambo wakanyanda nyika kaitana kulengwe. 25 Taata Ululeme! Nakuba kwaamba nyika taikuzhi, ime ndikuzhi alimwi aba balizhi kwaamba wakantuma. 26 Ndakuchita kwaamba uzhibikwe mulimbabo, alimwi ndakuzumanana kwaamba uzhibike kuchita kwaamba luyando nduchite kulindime lube muli mbabo alimwi kwaamba andime mbe muli mbabo."