1 Ono musankwa wa liina lya Lazalo wakalinga kuchiswa, wakalinga kukkala ku Betani, mumuzhi mwakalinga kukkala Maliya a Maata. 2 Uyu Maliya, mukwabo Lazalo wakalinga kuchiswa, ngu nguwe wakananika Mwami Jesu mafuta, akumupukuta a misusu kumyeendo yakwe. 3 Amane bakwabo bakaintu bobilo aba bakatumya mulomo kuli Jesu wakwaamban ati, "O Mwami, mwenzhinyoko ngoyandishisha ulachiswa."

4 Ono Jesu nakanva majwi aya wakamba ati, "Uku kuchiswa teshi kukutole ku lufu. Taaku, nkwa bulemu bwa Leza kwaamba Mwana Leza alumbaizhigwe kwiinda mulinkuko."

5 Ono Jesu wakalinga kubayanda ba Maata a Maliya a Lazalo mukwabo. 6 Ono nakanva ati Lazalo ulachiswa wakachilinga kushite kubusena uko kwamazuba amwi obilo. 7 Nakamana mazuba aya wakaambila bashichiiya bakwe ati, "Atujokele ku chishi cha Judiya."

8 Bashichiiya bakanviila ati, "Omuii, " "Ono ono boo ba Juuda bakalinga kuyanda kukuuma mabwe, alimwi ulaanda kujokela?"

9 Jesu wakanviila ati, "Tee buzuba bulichite maoola ali kkumi aobilo? Muntu weenda malumwi talifumpuli, nkambo uleenda lizuba kalibala. 10 Mashiku bantu nibalifumpula, nkambo taaku mumuni." 11 Nakamana boo kwaamba, wakaunka mukwaaambila bashichiiya bakwe ati, "Mwenzhinyinesu Lazalo uloona, pesi ndaunka nkamubushe."

12 Bashichiiya bakanviila ati, "Mwami, naa uloona anu ulapona."

13 Ono Jesu wakalinga kwaamba koona kwa lufu, pesi balo bakalinga kuyeeya koona kwatulo. 14 Amane Jesu wakaamba chantangalala ati, "Lazalo wafa, 15 pesi nkambo kandimwe ndakomana kwaamba nshindakalinga anguwe, kwaamba mukashome, atuunke kuliguwe."

16 Amane Tomasi, (wiitwa ati Mpuundu) wakaambila bashichiiya bamwi ati, "Atuunke andiswe kwaamba tukafe anguwe!"

17 Ono chiindi Jesu nakashika, wakajana kwaamba kwakalinga kwiindile kale mazuba one Lazalo kazhikilwe. 18 Ono ku Betani kwakalinga afaafi aku Jelusalemu, wakalinga musinzo mufaafi boo (makilomita otatwe), 19 alimwi ba Juuda baanji bakaza kubayumyayumya ba Maata a Maliya akambo kalufu lwamukwabo.

20 Maata nakanva ati Jesu washika, wakaunka kumuchiinzha, Maliya wakalinga kushite mu ng'anda. 21 Amane Maata wakaambila Jesu ati, "O Mwami, ati niwakalinga ko, mukwesu natakafa. 22 Pesi ndizhi kwaamba nakuba ono Leza ula kupa mfumbwa ncheshi ulombe."

23 Jesu wakamwaambila ati, "Mukwanu ulaakubuka alimwi." 24 Maata wakanviila ati, ndizhi ulakubuka alimwi mububuke bwabafu, mu buzuba bwamamanino." 25 Jesu wakamwaambila ati, "Ndime bubuke a buumi. Uyo ushoma mulindime ulakuba a buumi, nakuba kwaamba wafa, 26 alimwi awalo upona a kushoma mulindime, teshi akafe. Saa ulashoma ubo?"

27 Wakanviila ati, "Eye, Mwami," "Ndashoma kwaamba ndiwe Mesiya, Mwana a Leza, ushi akaze mu nyika muno." 28 Ono nakamana kwaamba ichi, Maata wakaunka kwiita Maliya ambali ati, "Muii uli wano, wakamwaambila ati, "Alimwi ulakuyanda." 29 Maliya nakanva ichi, wakanyamuka kufambana alimwi wakaunka kuli nguwe. 30 (Ono Jesu katana kunjila mu munzhi, kachili kubusena nkubakaswanganina a Maata.) 31 Ono bama Juuda bakalinga a Maliya mu ng'anda kabamuyumyayumya, nibakabona mbwakanyamuka chalubilo akuzwila asengwe, bakamuchilila nkambo bakayeeya ati ulaunka ku chuumbwe mukulila.

32 Ono Maliya nakashika kubusena uko kwakalinga Jesu, nakamubona, wakaliwaala ku myeendo a kwaamba ati, "Mwami, niwalinga ko, mukwesu natafa!"

33 Jesu nakamubona kalila, wakapengekana maninji mu muuya alimwi a mu moyo. 34 Wakababuzha ati, "Ino nkuli ku chuumbwe nkumwamooneka?"

Bakanviila ati, "Koza ubone, Mwami."

35 Jesu wakalila. 36 Amane bama Juuda bakaamba ati, "Amubone mbwalinga ku muyanda!"

37 Pesi bamwi bakaamba ati, "Saa uyu taashi muntu wakajalula meenso moofu inga waleka muntu uyu kwaamba atafi?"

38 Jesu alimwi wakaba a nkuumbu, washika ku chuumbwe. Chakalinga libwe lya ka kololwa ku manjililo. 39 Jesu wakabaambila ati, "Amuligushe libwe."

Amane Maata, mukwabo a muntu wakafa, wakaambila Jesu ati, "O Mwami, chino chiindi ulanunka, nkambo ono kuliindile mazuba one kazhikilwe."

40 Jesu wakamunvila ati, "Saa nshina kukwaambila ati nakoshoma, ulakububona bulemu bwa Leza?" 41 Amane libwe bakaligusha. Amane Jesu wakalungumana ku julu akwaamba ati, "Taata, ndakulumba nkambo kakwaamba wantalela. 42 Kwalo ndizhi kwaamba lyoonse ulantelela, pesi ndaamba a kaambo ka bantu aba bali waano kwaamba bashome ati ndiwe wakantuma. 43 Nakamana boo kwaamba, wakoongolola ajwi linene akwaamba ati, "Lazalo, kozwa!" 44 Ono uyo muntu wakalinga kufile wakazwa, kabbutaililwe, ku myeendo akumaanza azhisani, alimwi achisani chimwi ku menso.

Jesu wakabaambila ati, "Amumwangulule zhisani zhamuchuumbwe mumuleke aunke."

45 Abobo, ba Juuda baanji bakaswaya Maliya nibakabona chakachitika bakamushoma Jesu. 46 Pesi bamwi babo bakaunka kwaambila ba Faliisi nchakachita. 47 Amane ba paizhi banene aba Faliisi bakabungana muli chabo a kwaamba ati, "Ino tulachita buti? Ngoyu muntu ulachita zhitondezho zhiinji! 48 Naa tumuleke aunke bweenka ubu, boonse balashoma mulinguwe, amana ba Looma balaakuza akunyonyoona tempele a chishi chesu!"

49 Ono umwi wabo, waambwa ati Kaifasi, wakalinga mu paizhi munene mwaaka uyo, wakabaambila ati, "Muli bayozhi buti! 50 Saa tamuyeeyi kwaamba nchibotu kwaamba muntu omwi afile bantu boonse kwiinda kwaamba chishi choonse shinyonyooke. 51 Icho nchaakaamba takuchakazwa mulinguyo lwaakwe mwiine, pesi mbuli mupaizhi munene wa mwaaka uyo wakashinshima kwaamba Jesu ulakubafila ba Juuda, 52 Kutaashi boo kufila mushobo uyu weenka, pesi kwaamba ulakuza akubunganya antomwi boonse bana ba Leza bamwaikila munyika yoonse.

53 Ono kuzwa mu buzuba ubu bakakanza kumujaya. 54 Abobo, Jesu taaku nakeenda chantangalala akati ka bantu baku Judiya, pesi wakazwako akauunka kunyika yakumbali a chimpayuma, ku munzhi wa Efulaimu. Uko nkwakaunka mu kukkala a bashichiiya bakwe.

55 Ono Pasika ya ba Juuda kaliyanda kushiika, bantu baanji bakaza akuunka ku Jelusalema ku chiyanza chakusalazhigwa Pasika kaitana kuba. 56 Bantu bakazumanana kumulangaula Jesu, akubuzhanya buzhanya nibakali kwiinvi mu lubaanza lwa tempele. "Mulayeeya buti? Saa aze ku Pobwe?" 57 Pesi bapaizhi banene alimwi aba Faliisi bakalailila bantu boonse kwaamba mfumbwa eshi akamubone Jesu akabambile kuchita kwaamba bakamwaange.