1 Muchindi chimwi, Jesu wakaunka ku Jelusaluma ku pobwe imwi yaba Juuda. 2 Ono mu Jelusalema, kumbali amulyango wambelele, kwalinga kazhiba kakali kwiitwa ati Betisada muchi Hibulu. Ono kuchizhiba ichi kwakalikuyakilwe zhinvuka zhosanwe. 3 Mu zhivuka umo mwakalinga koona balwazhi baanji, mbuli boofu, balema a bayuminine mibili, bakalinga kulindilila kuvundaulwa kwamaanzhi muchiziba. 4 Ono chiindi achiindi mungeli wa Leza wakalinga kuza kunjila mukazhiba akuvundaula maanzhi. Abobo kufumbwa mulwazhi wafambana kuliwaala mukazhiba chiindi maanzhi nakavundaulwa wakalikupona kubulwazhi bwakwe. 5 Ono muchivuka chimwi kwakalinga muntu umwi wakachiswa kwa myaaka ili makkumi otatwe amyaka ili lusele. 6 Ono Jesu nakamubona kaonene alimwi wakazhiba kwaamba wakachiswa kwa chiindi chilaanfu. Wakaamba kuli nguwe ati, "Saa ulayanda kuponeshegwa?"

7 Mulwazhi wakanviila ati, "O Mwami, "Nshichite wakungwasha kungwaala mukazhiba chiindi maanzhi avundaulwa. Ndayanda kunjila, ndajana umwi wanyindila waliwaalila kale."

8 Amane Jesu wakamwaambila ati, "Nyamuka! Bweza mpasa yako uunke." 9 Peenka penka muntu uyu wakapona, wakabweza mpasa yakwe akunka.

Alimwi ichi chakachitika buzuba bwa Nsabata, 10 alimwi banene babama Juuda bakaamba kumuntu uyu wakaponeshegwa ati, "Sunu mbuzuba bwa Nsabata, toelele kunyamuna mpasa yako."

11 Walo wakanviila ati, "Uyo wampoonya wangambila ati bweza mpasa yako uunke."

12 Bakamubuzha ati, "Ino muntu nzhi uyo wakwaambila kuchita ichi?"

13 Uyo muntu wakaponyeshegwa taaku nakazhiba kwaamba naa muntu uyu nguni, nkambo Jesu wakanjila mu bantu baanji mubusena ubo.

14 Nikwakainda boo kaiindi, Jesu wakamujana muntu uyu mu tempele alimwi wakamwambila ati, "Bona, ono wapona, uchileke kubisha nkambo chimwi chintu chinene chiinda awa inga chakukuchitikila."

15 Amane wakaunka waambila basololi baba Juuda ati ngu Jesu wakamuponya.

16 Ono nkambo Jesu wakalikuchita izhi zhintu mu Nsabata, basololi baba Juuda bakatalika kumupenzha. 17 Ono Jesu mukulikwabilila wakabanviila ati, "Taata ulasebenza chiindi choonse, alimwi andime ndyelele kusebenza."

18 A kambo aka ba Juuda bakelezha kujana nzhila yakumujaya Jesu. Bakaamba ati watyola mulawo wa buzuba bwa Nsabata, akulyaamba ati Leza ngu Ishi. Kulibika muchiimo chomwi a Leza.

19 Jesu wakabanviila ati, "Nchanchobeni ndamwaambila, Mwaana inga tachiti chintu eenka, ulachitabo izho nzhabona Baishi kabachita. Nkambo Baishi nchibachita awalo mwaana ulachita. 20 Nkambo Taata ulanda Mwaana alimwi ulamutondezha zhoonse nzhachita. Kashimpe, ulakumutondezha zhintu zhinene zhiinda izhi, kuchita kwaamba imwe mukakankamane. 21 Nkaambo bweenka Baishi mbubabusha bafu akupa buumi, mbumbubo bweenka Mwaana awalo mbwaapa buumi kufumbwa muntu ngwinga wayanda kupa. 22 Nakubabobo, Baishi tababeteki uli oonse, pesi bakapa Mwaana kwaamba abeteke boonse, 23 kwaamba bantu boonse balemeke Mwaana bweenka mbuli mbwalemeka Baishi. Muntu woonse utalemeki Mwaana talemeki Baishi bakamutuma.

24 "Nchanchobeni ndamwaambila, aabo banva majwi angu akushoma uyo wakantuma ulichete buumi butamani alimwi tabakabetekwi pesi bainda kale mu lufu kuunka ku buumi. 25 Nchanchobeni ndamwaambila ati, chiindi chilashika, alimwi chashika kale, bafile nishibakanve ijwi lya Mwana Leza, alimwi abo beshibakanve balakuba abuumi. 26 Nkambo bweenka mbuli Baishi mbubachite buumi, awalo Mwana wakamupa kwaamba abe abuumi mulinguwe mwiine. 27 Alimwi wakapa Mwaana nguzu zhakubeteka, nkambo ngu Mwana a Muntu. 28 Mutakankamani achechi, nkambo chilaakushika chiindi boonse bali muzhuumbwe neshibakanve ijwi lyakwe, 29 alimwi akuzwa muzhuumbwe. Abo bakachita kabotu balakubukila ku buumi butamani, abalo bakachita zhibiibi balakubukila ku chisubulo.

30 Taaku nchiinga ndachita muguzu zhangu, ndabeteka mbuli mbunva, alimwi lubeta lwangu lulasalala, nkaambo nshichiti kwiinda mukuyanda kwangu pesi uyo wakantuma.

31 "Naa ndalipa bumboni bwangu ndimwiine, bumboni bwangu tabushi bwakashimpe. 32 Nkwaali umwi upa bukamboni ali ndime alimwi ndizhi kwaamba bumboni bwakwe mbwakashimpe. 33 Mwakatuma kuli Joni alimwi wakapa bumboni bwakashimpe. 34 Kutaashi kwaamba ndatambula bumboni buzwa ku bantu, pesi ndakachitila kwaamba mufutulwe. 35 Joni wakalinga lilampi lyakalikuyaka akupa mumuni, alimwi imwe mwakasala kusekelela kukkala mu mumuni wakwe kwa kaindi kashoonto. 36 Ndichite bumboni bunene bwiinda bwa Joni. Nkambo milimo Taata njakampa kwaamba nkamanizhe iyo milimo njitekuchita ilatondezha kwaamba Taata wakantuma. 37 Alimwi Taata wakantuma, wakapa bumboni bujatikizha ndime. Taaku nimwakanva ijwi lyakwe naa kubona bube bwakwe, nakuba ijwi lyakwe kukkala mulindimwe, nkambo tamushomi uyo ngwakatuma, 38 naa ijwi lyakwe lilapona mulindimwe, kwaamba kamutashomi uyo ngwaakatuma. 39 Mulaabala malembe chakushinizha nkambo mulayeya kwaamba mulingayo mulajana buumi butamani, alimwi aya eenka malembe alaamba alindime! 40 Pesi mulakaka kuza kulindime kwaamba mujane buumi.

41 "Ime nshilangauli kulumbaizhigwa kuzwa ku bantu. 42 Pesi ndimuzhi, kwaamba tamuchite luyando lwa Leza mu myoyo yanu. 43 Ndaza mu nguzu zha Taata, nikuba bobu tamuna kuntambula, alimwi naa umwi waza mu nguzu zhakwe inga mwamutambula. 44 Ino inga mwanshoma buti naakamuzumina kulumbaizhigwa kuzwa kuli omwi a omwi pesi kamutalangauli kulumbaizhigwa kuzwa kuli Leza boo eenka? 45 Mutayeeyi kwaamba ndakumubejekesha kuli Taata, Mozesi ngushi akamubejekeshe uyo ngumuchiteleko bulangizhi. 46 Ono naamwakamushoma Mozesi, nimwakanshoma andime nkambo wakalemba alindime. 47 Pesi nkambo tamushomi nchakalemba, ino inga mwashoma buti nchingamba?"