1 Ono Pilato wakatola Jesu kwaamba akwipwe. 2 Abalo bashikalumamba bakaanga mushini wamaanva, a kumusamika ku mutwi, alimwi bakamusamika chibachi chansombo 3 alimwi bakaunka bakajokoloka kulinguwe akwaamba ati, "Pona lyoonse, O Mwami waba Juuda!" Alimwi bakamuuma lupaka ku meenso.

4 Ono alimwi Pilato wakazwa ansengwe a kwaamba kuba Juuda ati, "Amulange ndamuleta ansengwe kulindimwe kwaamba muzhibe kwaamba taaku mulandu ngundamujanina!" 5 Ono Jesu nakazwa ansengwe kasamine mushini wamaanva achibachi chansombo, amane Pilato wakabaambila ati, "Amulange ngoyu muntu!"

6 Peenka penka ba Paizhi Banene a bantu babo nibakabona, bakoongolola a kwaamba ati, "Agagailwe! Agagailwe!"

Pilato wakabaambila ati, "Kamumutola mumungagaile, nkambo ime taaku mulandu ngundamujanina."

7 Basololi baba Juuda bakavila kwaamba ati, "Tulichite mulawo, alimwi kweendelana a mulawo wesu muntu uyu ulyeelele kufa, nkambo ulalyaamba ati Mwana a Leza."

8 Ono Pilato nakanva ichi, wakatija maningi. 9 Alimwi wakanjila munkuta akubuzha Jesu ati, "Ino ulazwa kuli?"

Pesi Jesu taaku nakamunviila. 10 Pilato wakamwaambila ati, "Saa ulakaka kwaamba andime? Tozhi kwaamba ndichite nguzu zhakukwangulula naa zhakwaamba ukugagailwe."

11 Jesu wakanviila ati, "Niwatakapegwa nguzu kuzwa ku julu niinga tochite nguzu zhakumbeteka. Nakuba bobu uyu wakampa mumaanza ako ngu chite chinyonyono chinene."

12 Nakanva boobu Pilato wakalinga kuyanda kumwangulula, Pesi ba Juuda bakoongolola a kwaamba ati, "Naa umwangulule muntu uyu, nkukwaamba toli mweenzhinyina a Kaisala. Kufumbwa muntu uyanda kuba mwami ngushinkondonyina a Kasaila!"

13 Ono Pilato naakanva ichi, wakaleta Jesu ansengwe alimwi wamukkalika anshi ku babeteshi abusena bwambwa ati, "lubaanza lwamabwe apampamene ayalene mwakubetekela." (mu Alameki liina "Gabbata.") 14 Bwakalinga buzuba bwakulibambila zha Pobwe a chiindi cha malumwi (12 koloko). Pilato wakaambila ba Juuda ati, "Ngooyu Mwami wanu!"

15 Balo bamane bakoongolola ati, "Amumujaye! Amumujaye! Agagailwe!"

Pilato wakababuzha ati, "Saa mugagaile Mwami wanu?"

Ba paizhi banene bakaamba ati, "Tatuchite Mwami umbi kunze kwa Kaisala muleli munene waku Looma!"

16 Kumamanino Pilato wakamupa mu maanza abo kwaamba bakamugagaile.

17 Bamane bashikalumamba bakamutola Jesu. Wakazwa mu munzhi kanyamwine achichingano chakwe kuunka kubusena bwa, "Kapapa kakumutwi," (mu chihibulu chaamba ati, "Gologota.") 18 Uko bakamugagaila antomwi a basankwa bobilo bamwi, umwi kulubazu lwalulyo umwi kulubazu lwa kulumwenshi, Jesu akati. 19 Pilato wakalemba chizhibisho akuchibika achingano cha Jesu. Chizhibisho ichi chakalinga kulembelwe ati, "JESU WAKU NAZALETI, MWAMI WABA JUUDA," 20 Ba Juuda baanji bakachibala chizhibisho icho nkambo ubo busena nkwakagagailwa bwakalinga kumbali amunzhi munene. Chizhibisho ichi chakalikulembelwe mumishobo yotatwe, mu chi Hibulu, mu chi Latini, amu chi Giliki. 21 Abobo ba paizhi banene baba Juuda bakaambila Pilato ati, "Utalembi ati, ‘Mwami waba Juuda,’ pesi uyu muntu wakaamba ati, ndi mwami waba Juuda.’ "

22 Pilato wakanviila ati, "Icho nchindakalemba ndalemba."

23 Ono bashikalumamba nibakamana kumugagaila Jesu, bakatola zhisani zhakwe akuzhikwamauna muzhipanzha zhili zhone kwaamba aumwi wabo abweze chomwi. Bamane bakabweza achimwi chisani chakwe. Chisani ichi, chakali kujatene kushika anshi. 24 Abobo bakaambilana ati, "Tutachikwamauni, atuume chisolo kwaamba tubone ushi achibweze." Ichi chakachitika kuzuzhikizha malembe aamba ati,

"Bakaabana zhisani zhangu,

alimwi akumina wo chisolo." Ono nchichechi bashikalumamba nchibakachita.

25 Ono kufaafi achingano cha Jesu kwakalinga kwinvi banyina abakwabo banyina, Maliya mukaintu wa Kilopasi, a Maliya waku Magadala. 26 Jesu nakababona banyina a shichiiya ngwakalinga kuyanda kainvi kufaafi, wakaambila banyina ati, "Mukaintu, ngoyu mwanaako."

27 Alimwi kuli shichiiya uyo wakaamba ati, "Mbaba banyoko." Ono kuzwa chiindi icho shichiiya uyo wakatola banyina Jesu ku ng'anda yakwe.

28 Muunshi, nakazhiba ati zhintu zhoonse zhamaninina wakaamba alimwi kwaamba malembe azuzikizhigwe, Jesu wakaamba ati, "Ndanva nyotwa."

29 Ono kwakalinga nongo yakalinga kuchite waini usasile. Amane bakanika nsinsa mu waini usasile akwiibika kukasamu akumushonka ku mulomo. 30 Jesu wakanwa waini amane wakaamba ati, "Ono kwamana!"

Amane wakakotamika mutwi wakwe wafa.

31 Ono bwakalinga buzuba bwakulibambila alimwi bwakalikuchilila bwakalinga buzuba bwandeene bwa Nsabata, nkambo bama sololi baba Juuda taaku nibakalikuyanda kuishiya mibili kailelela azhichingano chiindi cha Nsabata, bakalomba Pilato kwaamba bantu bapopelwe batyolwoolwe myeendo akubagusha azhichingano kabutanakushika buzuba bwa Nsabata. Bakachita ubo nkambo ubo buzuba bwakalinga kulemekelwe kulimbabo. 32 Abobo bashikalumamba bakaza akutalika kutyola myeendo muntu wakutaanguna wakalinga kugagaililwe a Jesu akuli bamwi. 33 Pesi nibakashika kuli Jesu bakajana ulifile kale, taaku nibakaityolola myeendo yakwe. 34 Pesi umwi shikalumamba wakamuyasa lisumo ku lubazu, amane kwakazwa malowa a maanzhi. 35 Ono muntu wakabona zhintu izhi nguwakapa bumboni, alimwi bumboni bwakwe bwakalinga bwa mashimpe. Wakazhiba ati wakaamba mashimpe, alimwi wakapa bumboni kwaamba ati mushome. 36 Zhintu izhi zhoonse zhakachitika kwaamba malembe azuzikizhigwe. "Taaku lifuwa lyakwe naliba lyomwi lyakatyolwa." 37 Alimwi, mbuli amwi malembe mbwaamba ati, "Balakulanga ali oyo ngubakayasa."

38 Ono Muunshi, Josefa waku Alimatiya wakalomba mubili wa Jesu kuli Pilato. Josefa wakalinga shichiiya wa Jesu, ono chamaseseke nkambo kakutija bamasololi baba Juuda. Pilato wakamuzumizha kubweza mubili akuutola. 39 Bakalinga a Nikodimasi uyo wakaswaya Jesu mashiku, wakaletelelela a mafuta atununkilizho tupusene pusene tuunji makkumi chiloba a osanwe kuvula. 40 Bakaubweza mubili wa Jesu akuubbutaila mu zhisani antomwi atununkililzho, bweenka mbuli chilengwa chaba Juuda. 41 Kwakalinga muunda kubusena uko nkwa kagagailwa Jesu. Mu muunda umo mwakalinga chuumbwe chipya mutana kuzhikwa ko kale muntu. 42 Ono nkambo bwakalinga buzuba bwa kulibambila bwa ba Juuda alimwi chuumbwe chakalinga afaafi, bakamuzhika Jesus.