1 Nakamana kupaila, Jesu wakaunka a bashichiiya bakwe, wakazubuka Chibanda cha Kidiloni. Kulubazu lumwi kwakalinga muunda, alimwi Jesu a bashichiiya bakwe bakanjila mu muunda uyo. 2 Ono Judasi wakaaba Jesu, wakalinga kubuzhi busena ubo, nkambo Jesu nkubakalinga kuswanganina a bashichiiya bakwe lyoonse. 3 Amane Judasi wakashika ku muunda, kasololela bashikalumamba baba paizhi banene aba Faliisi bakalinga kuchite malapi a zhilwanyo. 4 Ono Jesu wakalinga kuzhi zhoonse zheshi zhikachitike kuli nguwe, abobo wakaunka a kubabuzha ati, "Ino nguni ngumulangaula?"

5 Bakanviila ati, "Jesu waku Nazaleti,"

"Ndime," wakanviila.

Judasi, uyo wakamwaaba wakalinga kwinvi ambabo. 6 Amane Jesu nakabaambila ati, "Ndime," bakaswena muunshi akuliwaala anshi. 7 Jesu wakababuzha ati, "Ino nguni ngumulangaula?" Alimwi bakanviila ati,

"Jesu waku Nazaleti."

8 Jesu wakanviila ati, "Ndamwaambila kale kwaamba Ndime. "Naa, anu mulalangaula ndime amuleke aba bamwi bantu baunke." 9 (Ichi chakachitika kwaamba majwi ngakaamba azuzikizhigwe, "Taata, Taaku naba omwi wababo mbuwakampa mbundakaswokelwa.")

10 Penka awo Simoni Petulo wakalinga kuchite panga, wakaligusha a kuzutula litwi lyalulyo lyamuzhike wamu paizhi munene. (Musebenzhi uyu liina lyakwe wakalinga Malukasi.) 11 Ono Jesu wakalalila Petulo ati, "Bikka panga nkulikala! Saa mulayeeya kwaamba nshikanwi ku nkaapu njakampa Taata?"

12 Ono bashilumamba abo amunene wabo, abalindizhi bakatumwa abanene, bakajata Jesu akumwaanga. 13 Alimwi bakataanguna kumutola kuli Anasi, mukwe wa Kaifasi wakalinga mu paizhi munene mumwaaka uyo. 14 Kaifasi ngu nguwe uyu wakaambila basololi baba Juuda kwaamba inga chabota muntu omwi kufila bantu boonse.

15 Simoni Petulo aumwi shichiiya bakalinga kuchilila Jesu. Nkambo shichiiya uyo wakalinga kuzhibikilwe kumu paizhi munene, wakaunka a Jesu mu lubaanza lwa mu paizhi munene. 16 Pesi Petulo wakashaala kalindila ansengwe amulyango kainvi ku manjililo. Ono shichiiya umwi wakalikuzhibikilwe a mu paizhi munene wakajoka akwaambila mushimbi wakalinga a mulimo kwaamba amunjize Petulo. 17 Mushimbi wakabuzha Petulo ati, "Saa tooshi umwi waba shichiiya ba muntu uyu, saa ndiwe?" Petulo wakanviila ati, ‘‘Nshiinshi."

18 Kwakalinga kutontola, alimwi basebenzhi a bamwi ba chinenenene ba chi Juuda bakalinga kwimikene kabayota mulilo ngubakakunka, awalo Petulo kayota mulilo ambabo.

19 Ono mu Paizhi Munene wakatalika kubuzhabuzha Jesu zha bashichiiya bakwe a zha njiisho yakwe. 20 Jesu wakanviila ati, "Ndakalinga kuiisha bantu chantangalala. Lyoonse ndakalinga kuiisha muma sinagogo naa mu tempele, uko ba Juuda nkubakalinga kubungana antomwi. Taaku nchindakaamba chamaseseke. 21 Ino ulambuzhila nzhi? Kobuzha babo bakalinga kunva. Nchachobeni balizhi nchindakaamba."

22 Ono Jesu nakamana kwaamba chechi, umwi wabanene wakalinga kwinvi afaafi wakauma Jesu lupaka ku meenso. "Saa mbwiinga wanviila mu Paizhi Munene ubu!"

23 Jesu wakamunviila ati, "Naa ndaamba chitali kabotu, kamumwaamba icho nchindalubizha. Pesi naa ndaamba kashimpe, ino wangumina nzhi?"

24 Ono Anasi wakatuma Jesu kangilwe kuli Kaifasi mu Paizhi Munene.

25 Ono Petulo kachiinvi kayota mulilo. Bamane bakamubuzha ati, "Saa iwe toli umwi wa bashichiiya bakwe?"

Walo wakatama a kwaamba ati, "Taaku, nshili umwi wabo."

26 Umwi musebenzhi wa mu Paizhi Munene, wakalinga mwenzhinyina a muntu uyo ngwakatimbula litwi Petulo, wakamubuzha ati, "Saa iwe taaku ndakubona sunu kounka ku muunda koli antomwi a muntu ulya?"

27 Alimwi Petulo wakaamba ati, "Taaku" alimwi peenka penka mukombwe wakalila.

28 Ono kuseeni seeni (muma 5 koloko) bakamutola ku ng'anda ya mweendelezhi wachi Looma kuzwa kuli Kaifasi, alimwi banene baba Juuda taaku bakayanda kunjila mu nkunta yakubetekela nkambo bakatija kusofwaana lwabo beene. Nkambo bakalinga kuyanda kulya pobwe lya Pasika. 29 Ono Pilato wakazwa ansengwe akubuzha ati, "Ino mwamupa mulandu nzhi muntu uyu?"

30 Natalinga kabwalala niinga tatumuleti kulindiwe, bakanviila niinga tatumupi kulindiwe."

31 Pilato wakanviila ati, "Amumutole nubeene imwe mukamubeteke kweendelana a milawo yanu."

Bakanviila ati, "Tatuchite mulawo utuzumizha kujaya mfumbwa muntu." 32 Ichi chakachitika kuzuzikizha nchakaamba a lufu ndweshi akafe Jesu.

33 Pilato wakanjila alimwi mu ng'anda yakubetekela, akwiita Jesu akumubuzha ati, "Saa nduwe Mwami waba Juuda?"

34 Jesu wakabuzha ati, "Saa muzeezo wako uyo, naa kuli boo bamwi bakwaambila a lindime?"

35 Pilato wakanviila ati, "Saa ulayeeya ati ime ndimu Juuda? Bantu bamushobo wako antomwi aba paizhi banene mbubakuleta kuli ndime, ino wakachita nzhi?"

36 Jesu wakanviila ati, "Bwami bwangu tabuli bwanyika ino. Nibwakalinga bwa nyika ino, niinga basebenzhi bandwanina kwaamba ntaangwi aba sololi baba Juuda. Pesi ono bwami bwangu bulazwa kumbi!"

37 Pilato wakamubuzha ati, "Saa anu uli Mwami?"

Jesu wakanviila ati, "Waamba ati ndimwami, nkukaambo nkudakazila munyika alimwi chindakazhalilwa kuza munyika ino, kwaamba mpe bumboni bwa mashimpe, abobo kufumbwa muntu uzhi zhamashimpe ulatelela kuli ndime."

38 Pilato wakabuzha ati, "Ino kashimpe ninzhi?"

Kuchechi wakazwa alimwi wababunganya bama Juuda a kwaamba ati, "Taaku kaambo nkundajana kakumupa mulandu uyu muntu.

39 Pesi nchilengwa chanu chakwaamba ati ndyeelele kumwangulwila mwaange omwi chiindi cha pobwe lya Pasika. Saa mulayanda ati mwangulwile uyu Mwami waba Juuda?"

40 Pesi bantu bakoongolola ati, "Kotwaangulwila Banabbasi, kutaashi muntu uyu!" (Banabbasi uyu wakalinga mubbi.)