1 Ono Jesu wakazhiba kwaamba ba Faliisi bakanva kwaamba bantu baanji bakalikumuchilila akubbizhigwa kulinguwe kwiinda Joni. 2 Nakuba bobu, Jesu mulwakwe taaku nakabbizha naba omwi, pesi bashichiiya bakwe mbubakali kubbizha. 3 Kumane Jesu nakanva ibyakali kwaambwa, wakazwa ku Judiya akujokekela ku Galili, 4 Ono mulweendo lwakwe wakali kweelele kwiinda mu munzhi wa Samaliya.

5 Wakaza ku munzhi wa Samaliya walikwiitwa ati Sika, afaafi a busena Jakobo mbwakapa mwanaakwe Josefa. 6 Ku mugodi wa Jakobe, alimwi Jesu kalemane kuzwa mulweendo wakakkala kumbali amugodi, chakalinga chiindi chamalumwi (muma 12 koloko).

7 Ono mukaintu umwi Musamaliya wakaza kuteka maanzhi. Jesu wakamwaambila ati, "Ndalomba koo maanzhi nwe." 8 Bashichiiya bakwe bakalinga baunka mu munzhi mukuula chakulya.

9 Mukaintu wakanviila ati, "Iwe uli mu Juuda, alimwi ime ndimu Samaliya ino inga wanomba buti maanzhi?" (Ba Juuda aba Samaliya tabaswangani.)

10 Amane Jesu wakamunviila ati, "Niwalinga kuzhi chipego cha Leza, akuzhiba uyo ukulomba maanzhi akunwa, iwe nuwamulomba maanzhi a buumi."

11 Mukaintu wakanviila ati, "O muii tochite chakutekuzha, alimwi mugodi uyu ngulaamfu, ino maanzhi ayo a buumi inga waateka buti? 12 Saa uli munene kwiinda Jacobo taata wesu wakatupa mugodi alimwi umo mwakalinga kunwa walo, bana a zhivubwa zhakwe zhoonse?

13 Jesu wakanviila ati, "Muntu oonse unwa maanzhi aaya ulafa nyotwa alimwi, 14 pesi mfumbwa muntu unwa maanzhi ngumupa ime, takonzhi kufa nyotwa alimwi. Maanzhi aayo alaakuba mbuli kasensa kamaanzhi katola ku buumi butamani."

15 Mukaintu wakaamba ati, "O muii kompa maanzhi aaya, kwaamba ntakafi nyotwa alimwi, akwaamba nshitazi kuno kuteka maanzhi alimwi."

16 Jesu wakamwambila ati, "Kounka ukaite musankwa wako, ujoke anguwe."

17 Mukaintu wakanviila ati, "Nshichite musankwa." Amane Jesu wakamwaambila ati, "Ulikabotu naa waamba ati tochite musankwa. 18 Mashimpe ngakwaamba ati wakalinga kukwetwe kubamasankwa bosanwe, ono uyo ukukwete sunu taashi musankwa wako nchanchobeni waamba chanchobeni." 19 Mukaintu wakaamba ati, "Muii, ndazhiba ono kwaamba uli mushinshimi." 20 Bashikale besu bakalinga kukombela mu mulundu uuyu, pesi imwe nuba Juuda mulaamba ati bantu balyeelele kukombela ku Jelusalema."

21 Jesu wakamwaabila ati, "Umukaintu nshome, chiindi chilaakushika nchishi mutakakombi Taata nakuba mu mulundu uuyu naa ku Jelusalema. 22 Imwe nuba Samaliya mulakomba nchimutazhi, iswe tulakomba nchituzhi nkambo lufutuko lulazwa kuba Juuda. 23 Ono chiindi chilashika, alimwi chashika kale, nibaya kukomba chakashimpe bakombi balakukomba Taata mu Muuya amukashimpe. Nkambo mbubaabo Taata mbalangaula. 24 Leza ngu Muuya, alimwi bamukomba balyeelele kumukomba mu Muuya a mukashimpe."

25 Mukaintu wakamwaambila ati, "Ndizhi kwaamba Mesiya (wiitwa ati Kilisitu) "Ulaza, akuza ulaakutwaambila zhoonse."

26 Jesu wakanviila ati, "Uyo utokwaamba kulindiwe, ngu ndime."

27 Penka awo bashichiiya bakajoka alimwi bakakankamana kumujana kaamba amukaintu. Pesi taaku wakabuzha ati, "Ino ulaandanzhi?" Naa kubuzha ati, "Nkambo nzhi ulaamba anguwe?" 28 Ono mukaintu uyu wakashiya nongo yakwe waunka mu munzhi kuyakwaambila bantu kwaamba ati, 29 "Kamuza mubone muntu wangambila zhintu zhoonse nzhindakachita. Saa ngu Mesiya wa Leza?" 30 Ono bantu bakayoboloka kuzwa mu munzhi akunka kuli Jesu.

31 Chiindi icho bashichiiya bakamukombelezha kwaamba ati, "O muii, lyako chakulya."

32 Walo wakabanviila ati, "Ime ndichite chakulya nchimutazhi."

33 Bamane bashichiiya bakatalika kulyaambauzha kuli omwi a omwi kwaamba ati, "Saa inga kakuli muntu wamuletela chakulya?"

34 Ono walo Jesu wakabaambila ati, "Chakulya changu nkuchita kuyanda kwa Leza uyo wakantuma akumanizha mulimo wakwe. 35 Tee mulaamba ati, ‘kwashaala myeenzhi yone boo kwaamba tutebule.’ Pesi ndamwaambila kwaamba amubone myuunda, mulange maila mbwaayuma kale, alalindila boo kutebulwa! 36 Shikutebula ulavola munchito yakwe, ulabunjika michelo itola ku buumi butamani kwaamba uuyo wakashanga autebula bakomane antomwi. 37 Kashimpe aka kaambyo kaamba ati, ‘Umwi mushangi, umwi mutebuli.’ 38 Ndamutuma kutebula nzhimwatakasebenzela. Bamwi bakasebenza nchito iyumu, alimwi imwe mwatebula bulumbu bwabo."

39 Ba Samaliya baanji bakazwa mumunzhi bakashoma muli Jesu nkambo kamazwi akaamba mukaintu kwaamba ati, "Wangaambila zhoonse nzhidakachita." 40 Ono ba Samaliya nibakashika kuli Jesu, bakamulomba kwaamba akkale ambabo mazuba obilo.

41 Alimwi nkambo kamajwi akwe bantu baanji bakaba bashomi. 42 Bakaambila mukaintu uyu ati, "Twashoma kutaashi boo makani ako, ono nkambo twalinvida tubeene, alimwi twazhiba kwaamba nchobeni uyu ngu Mufutuli wa nyika."

43 Ono nikwakainda mazuba obilo, Jesu wakazwa mu munzhi akunka kuchishi cha Galilii. 44 Jesu mwiine nguwa kaamba ati, "Taaku mushinshimi ulemekwa nkwazwa." 45 Naakashika ku Galilii, bantu bachishi iichi bakamutambula kabotu, nkambo bakabona zhoonse izho nzhakachita mu Jelusalema chiindi cha pobwe lya Pasika. Nkambo abalo nkubakalinga.

46 Jesu nakashika alimwi kumunzhi wa Kana ku Galili, uko nkwaakasandula maanzhi kuba waini. Alimwi kwakalinga umwi wachinenenene wakalikuchite mwana mulwazhi ku Kapenaumu. 47 Naakanva kwaamba Jesu wazwa kuchishi cha Judiya akuza ku Galili, wakaza kulinguwe akumulomba kwaamba akaponye mwana, nkaambo wakali kuyanda kufa. 48 Jesu wakamwaambila ati, chita imwe mwabona zhitondezho a zhikankamika," "Taaku naba omwi ukonzha kushoma."

49 Ono uyu muntu wachinenenene wakaambila Jesu ati, "O muii, koza mwana angu katana akufa."

50 Amana Jesu wakamwaambila ati, "Kounka boo, mwana ako ulapona." Muntu uyo wakashoma majwi akaamba Jesu, wakaunka ku munzhi wakwe. 51 Kachili munzhila, bazhike bakwe bakamuchingauzha akumwaambila ati, "Mwanaako ulapona!"

52 Ono wakababuzha chiindi mwana nchakalinva kabotu. Bakaamba ati, "Chakalinga chiindi cha malumwi (1 koloko) nakalinva kabotu." 53 Amane baishi bakazhiba kwaamba nchi chiindi Jesu nchakaamba kwaamba mwanaako ulapona." Ono walo aba ng'anda yakwe boonse bakashoma.

54 Ichi nchichitondezho chabili Jesu nchaakachita nakazwa muchishi cha Judiya kuunka muchishi cha Galilii.