1 "Myoyo yanu itapengi. "Amushome muli Leza, alimwi mushome a mulindime. 2 Mu Ng'anda ya Taata muli makalilo maanji, nikwatalinga bobu nindamwaambila. Ndaunka kwaamba nkamubambile masena. 3 Ndakumana kumubambila masena, ndakuza alimwi kwaamba kamutole uko nkumbele, kwaamba uko nkumbele, mukabe nkuko andimwe. 4 Muliizhi nzhila iya nkutokuunka."

5 Tomasi wakamwaambila ati, "O Mwami, tatuzhi nkutekuunka, ino nzhila inga twaizhiba buti?"

6 Ono Jesu wakamunviila ati, "Ime ndime nzhila, ndime kashimpe, alimwi ndime buumi, taaku muntu ukonzha kuunka kuli Taata chita kwiindila mulindime. 7 Naa mwalinga kunzhi kabotu, awalo Taata nimwalinga kumuzhi. Pesi kuzwa ono mulimuzhi alimwi mwakamubona."

8 Filipo wakamwaambila ati, "O Mwami, tutondezhe Taata kwamana kulazulila kulindiswe."

9 Jesu wakanviila ati, "Filipo saa tamunzhi, nikuba kwaamba ndalinga adimwe kwa chiindi chilaamfu? Nkukuti asunu tamunakunzhiba? Mfumbwa wabona ndime, wabona a Taata. Ino inga mwaamba buti ati, ‘Tutondezhe Taata?’ 10 Saa tamuzhi kwaamba ndi muli Taata, alimwi akwaamba awalo ulimulindime? Majwi ngugamba kulindimwe taazwi mu nguzu zhangu ndimwiine, pesi nkambo ka Taata uyo uli mulindime ngu nsebenza nchito yakwe kwiinda mulindime. 11 Amunshome naa ndaamba ati ndi muli Taata alimwi Taata uli mulindime. Naa tabushi boo, amushome a kaambo ka milimo njibachita. 12 Nchachobeni ndamwambila, uyo ushoma mulindime ulakusebenza nchito njindakalinga kusebenza, alimwi balakuchita nchito zhinene kwiinda zhezhi, nkambo ndaunka kuli Taata. 13 Alimwi ndakuchita kufumbwa nchishimukalombe muzhina lyangu, kwaamba Taata alemekwe kwiinda mu mwaana. 14 Naa mwanoomba kufumbwa nchimuyanda mu liina lyangu, ndakumuchitila.

15 Naa ulanyanda, bamba mulawo wangu. 16 Alimwi ndakulomba kuli Taata, alimwi ulakukupa aumwi mugwashi kwaamba ukabe anguwe kukabe kutamani. 17 Muuya wakashimpe nyika ngwitazumini, nkambo taimuboni naa kumuzhiba. Pesi muli muzhi, nkambo ulapona adimwe alimwi ulakuba muli ndimwe.

18 "Taaku ninja kumushiya mbuli bamuchaala, ndakuza kuli ndimwe. 19 Ono kwakaiindi kashoonto nyika taikamboni alimwi, pesi imwe mulakumbona. Nkambo ndapona andimwe mulakupona. 20 Mubuzuba ubo mulakuzhiba kwaamba ndi muli Taata, andimwe muli mulindime, andime mulindimwe.

21 "Uyo utambula milawo yangu akwichilila nguwoyo unyanda. Uyo unyanda awalo Taata ulakumuyanda, andime ndakumuyanda akulitondezha kulimbabo."

22 Ono Judasi (kutaashi Judasi isikaliyoti) wakaamba, pesi, Mwami, ino nkambo nzhi ulanda kulitondezha kulindiswe alimwi kutaashi kunyika?" 23 Jesu wakanviila ati, "Mfumbwa unyanda ulakuchilila njiisho zhangu, Taata ulakubayanda, alimwi ulakuza kuli mbabo akupona ambabo. 24 Uyo utanyandi tachilili njiisho zhangu. Aya majwi ngumunva taashi aangu alazwa kuli Taata wakantuma.

25 "Aaya oonse ndaamba kanchili andimwe. 26 Pesi mugwashi, Muuya Usalala, uyo Taata ngweshiakatume mu liina lyangu, ulakumuiisha zhintu zhoonse alimwi akumuyeezha zhintu zhoonse zhinda kamwaambila.

27 "Ndamushila lumuno. Ndamupa lumuno lwangu, taaku ndamupa mbuli nyika mbwiipa. Myoyo yanu itapengi alimwi mutatiji. 28 Mwakanva nkagamba ati, ‘Ndaunka alimwi ndakujoka kulindimwe.’ Nimwalinga kunyanda, nimwakomana kwaamba ndaunka kuli Taata, nkambo Taata munene kwiinda ndime. 29 Ndamwaambila ono zhintu kazhitana kuchitika, kwaamba zhakuchitika mukashome. 30 Taaku zhiinji nzhinshi ngambe, nkambo mwendelezhi wanyika ulaza, tachite nguzu zhakunkoma, 31 pesi ulaza kwaamba nyika izhibe kwaamba Taata ndamuyanda alimwi ndachita izho nzhandailila kuchita.

"Kamuza ono tuzwe abusena ano. tuunke.