1 Ono mubuzuba bwatatu pobwe lya bwiinga lyakaba mu munzhi wa Kana mu Galili, abanyina Jesu bakalinga ko. 2 Alimwi Jesu abashichiiya bakwe bakatambwa ku pobwe lya bwiinga ili. 3 Ono waini niwakamana, banyina Jesu bakamwaambila ati, "Waini wamana."

4 Jesu wakanviila ati, "Tamwelele kungambila chakuchita," chiindi changu tachina kushika."

5 Banyina Jesu bakambila basebenzhi ati, "Muchite zhoonse nzheshi amwaambile."

6 Ono kwakalinga nongo zha maanzhi afaafi zhili chisambomwe, zhakapangwa a mabwe ba Juuda nzhibakalinga kusebenzha kusamba mu chiindi cha chiyanza chakulisalazha. Nongo yomwi yakalikuzula makkumi obilo kushika kumakumi otatwe amagaloni amaanzhi (75-115). 7 Jesu wakaambila basebenzhi ati, "Amuzuzhe maanzhi mu nongo." Abalo basebenzhi zhoonse bakazhizuzha. 8 Alimwi wakabaambila ati, "Ono amutekule, mumutolele mwendelezhi upa chakulya mu pobwe, abalo bakatekula, 9 alimwi mweedelezhi wakalabila maanzhi akasandulwa kuba waini, alimwi taaku naakazhiba kwaamba waini wazwa kuli, (nakuba kwaamba basebenzhi bakatekula maanzhi bakalinga kuzhi.) Amane wakaita shibwinga ambali, 10 alimwi wakamwaambila ati, "Bantu boonse balataanguna kwaaba waini uli kabotu, alimwi beenzu bamana kukolwa, balaaba waini utali kabotu. Pesi waliyobwela waini mubotu kushikila ono!"

11 Ono izhi zhakalinga zhitondezho zhakutaanguna nzhakachita Jesu ku Kana mu Galili, mwakazubulwila bulemu bwakwe, alimwi bashichiiya bakwe bakamushoma.

12 Ono nikwakamana Jesu a banyina abamakwabo abashichiiya bakwe bakaunka ku Kapenaumu. Uko nkubakakkala mazuba mashoonto boo.

13 Chakalinga chiindi pobwe lya ba Juuda kalili afaafi, abobo Jesu wakaunka ku Jelusalema. 14 Mu lubanza lwa tempele wakajana bantu kabauuzha ng'ombe, mbelele, a nkwilimba. Bamwi bantu bakalinga kushite amatebulu kabachinchanya maali. 15 Amane wakabweza chiswepu cha chipaya cha ng'ombe akubatandila asengwe boonse. Wakapalanganya maali abashikuuzha, akutingamuna matebulu abo. 16 Abo bakalinga kuuzha nkwilimba wakabaambila ati, "Amuzhigushe awa izhi! Mutasanduli ng'anda yaba Taa kuba masambalilo. 17 Bashichiiya bakwe bakayeeya malembe aamba ati, "Kuyandishisha ng'anda yako, chilantenta mubili wangu anga mulilo."

18 Ono ba Juuda bakamubuzha ati, "Ino nzhitondezho nzhi nzhiinga wachita kwaamba tushome ati wakapegwa nguzu kuchita zhintu izhi zhoonse?"

19 Jesu wakanviila ati, "Amumwaye tempele iyi, alimwi mu mazuba otatwe ndakwiyaka alimwi."

20 Bakanviila ba Juuda ati, yakatola makkumi one achisambomwe kuyaka tempele iyi, alimwi ulaamba ati inga waiyaka mu mazuba otatwe!" 21 Pesi tempele njakalinga kwaamba Jesu mubili wakwe. 22 Nakabuka kuzwa kubafu, bashichiiya bakayeeya nchakaamba. Bamane bakashoma malembe amajwi Jesu ngakaamba.

23 Ono Jesu kachili mu Jelusalema chiindi nikwakalinga pobwe lya Pasika, bantu baanji bakabona zhitondezho nzhakachita alimwi bakashoma muliina lyakwe. 24 Pesi Jesu taaku nakabashoma bantu abo, nkambo wakalinga kubazhi mbubakalinga. 25 Alimwi taaku nakali kuyanda bumboni bwa bantu amuntu naba omwi, nkambo mwiine wakalikuzhi chakalinga mu moyo wa muntu amuntu.