1 Ono chiindi cha pobwe lya Pasika, kachitana kushika Jesu wakazhiba kwaamba chiindi chakwe chakuzwa mu nyika muno akuunka kuli Baishi chakalinga afaafi. Mbuli mbwakayandishisha boo bakwe bakalinga mu nyika, wakabayanda kushika kumamanino.

2 Jesu a bashichiiya bakwe nibakalinga kulya mangolezha, Judasi mwana Simoni Sikalyoti wakanjilwa Satani mu moyo, kwaamba ba mwaabe Jesu. 3 Jesu wakalikuzhi kwaamba ati Baishi bakabika zhintu zhoonse mu maanza akwe, wakalikuzhi a kwaamba wakazwa kuli Leza a kwaamba ulakujokela kuli Leza, 4 Wakanyamuka nakali kulalila, wakafuula chibaki chakwe, alimwi wakaanga chitaaulu mu chibuno. 5 Ono nakamana, wakatila maanzhi mumbale akutalika kusanzha bashichiiya bakwe ku myeendo, akubapukuta achitaaulu ichi. 6 Ono nakashika kuli Saimoni Petulo, wakamwaambila ati, "Mwami, saa ndiwe welele kunsanzha ku myeendo?" 7 Jesu wakamwaambila ati, "Tochizhi nchinchita, pesi munshi akoku ulakukonzha kuchinva nchichaamba."

8 Pesi Petulo wakaamba ati, "Teshi unsanzhe myeendo!" Jesu wakanviila ati, "Naa ntakusanzhi teshi ube alubazu kulindime."

9 Simoni Petulo wakanviila ati, "Mwami, utasaanzhi boo kumyeendo pesi aku maanza akumutwi koonse!"

10 Jesu wakanviila ati, "Abo basamba kale amubili balyelele kusamba boo kumyeendo, mubili wabo oonse ulasalala. Alimwi ulasalala, nakuba tamushi noonse." 11 Nkambo wakalikumuzhi uyo eshi akamwaabe, alimwi nchakambila kwaamba tamushi noonse nimusalala.

12 Ono Jesu nakamana kubasanzha ku myeendo, wakasama zhisani zhakwe akujokela mpakalinga kushite. Wakababuzha ati, "Saa mwachinva nchindachita kulindimwe?" 13 Mulanjita ati, ‘Muii’ alimwi Mwami, alimwi muli boo kabotu nkambo ubo mbumbele. 14 Naa ime, ndi Mwami a Muii wanu, ndamusazha myeendo, andimwe mulyeelele kusazhanya kuli omwi a omwi ku myeendo. 15 Ndamupa mukonzhano kwaamba kamuchita bweenka mbundachita. 16 Nchanchobeni ndamwaambila, taaku muzhike wiinda shimalelo akwe, awalo shikutumwa talimunene kwiinda uyo wakamutuma. 17 Ono nkambo mwazhizhiba izhi zhintu, mulakulelekwa mwakuzhichita.

18 Nshaambi ndimwe noonse, pesi ndibazhi abo mbundakasala. Pesi uku nkuzuzikizha mpango ya malembe aamba ati. ‘Uyo ngundya anguwe mbale yomwi wambukila.’ 19 Ndamwaambila ono kachitana kuchitika kwaamba chakuchitika mukashome kwaamba ‘Ndime nguwe.’ 20 Nchachobeni ndamwaambila ati, mfumbwa utambula ngundakatuma ulatambula wakantuma alimwi mfumbwa untambula watambula wakantuma."

21 Nakamana kwaamba chechi, Jesu wakapengana mu moyo akupa bumboni bwakwaamba ati, "Nchanchobeni ndamwaambila, umwi wanu ulangaba."

22 Amana bashichiiya bakatalika kulanganalangana kuli omwi a omwi, kabatazhi naa nguni uyo ngwaamba. 23 Ono umwi wabashichiiya bakwe, Jesu ngwakali kuyandisha, wakali kuyamine kufafi anguwe. 24 Ono Simoni wakadokola shichiiya uyo akwaamba ati, "Mubuzhe, ino nguni ngwatokwaamba."

25 Ono shichiiya kayeeme kuli Jesu wakaamba ati, "Ino nguni, O Mwami?" 26 Jesu wakanviila ati, "Ngoyo ngunshi mpe kapanzha kachinkwa nkeshi nsumpe mwakunwiina. Amane wakasumpa kapanzha ka chinkwa, akukapa Judasi, mwana a Saimoni Isikalyoti. 27 Peenka penka Judasi nakabweza kankwa, wakanjilwa Satani muli nguwe, Jesu wakamwambila ati, "Icho nchoyanda kuchita chichite kufambana." 28 Ono benzhinyina mbakalinga kulya anguwe taaku bakazhiba nkambo nzhi nchakamwaambililila bobu Judasi. 29 Ono mbukuli Judasi ngu wakalinga muyobozhi wa maali, bamwi bakayeeya kwaamba, Jesu wakalinga kumwaambila kwaamba akaule zhintu zhiyandika ku Pobwe, naa kupa zhintu kubachete.

30 Peenka penka Judasi nakabweza chinkwa wakazwa. Alimwi akalinga mashiku.

31 Ono Judasi nakaunka, Jesu wakaamba ati, "Ono Mwana a Muntu alemekwa alimwi Leza walemekwa muli nguwe. 32 Naa Leza ulalemekwa muli nguwe, Leza ulakulemeka mwanakwe kwiinda mulinguwe, alimwi ulakulemekwa a chiindi chomwi. 33 Nubana bangu, ndaba andimwe kwa chiindi chishoonto. Mulakunagaula, alimwi bweenka mbundakaambila ba Juuda, andimwe ndamwaambila ono, ‘Uko nkutekuunka inga tamuzi.’ 34 Ndamupa mulawo mupya wakwaamba. amuyandane kuli omwi a omwi bweenka mbundakamuyanda, ono mulyeelele kuyandana kuli omwi a omwi. 35 Ono mwaakuyandana omwi a omwi boonse bantu balakuzhiba kwaamba muli bashichiiya bangu."

36 Simon Petulo bakamubuzha ati, "Mwami, ina nkuli nkutekuunka?"

Jesu wakanviila ati, "Ime nkutekuunka, inga tamuchilili ono, pesi mulakunchilila chakushika chiindi."

37 Petulo wakabuzha ati, "Mwami nkambo nzhi nchiinga nshikuchili ono?" "Ndilibambile kukufila!"

38 Amane Jesu wakanviila ati, "Ulimasimpe wanda kufa ali ndime? Nchanchobeni ndakwaambila, mukombwe katana kulila ulakunkaka zhiindi zhotatwe kwaamba tonzhi.