1 "Ndime muchelo wa kashimpe, alimwi Taata ngumwiine muunda. 2 Ono kufumbwa musaampi utazhali muchelo mulindime ulauzutaula, pesi musaampi uzhala michelo ulaubambila kwaamba uzhalishe michelo kwiindilila. 3 Imwe mulisalazhilwe kale amajwi ngundakamwaambila. 4 Amukalilile mulindime, andime mulindimwe. Bweenka mbwiinga musaampi taukonzhi kuzhala michelo wanakuli weenka, kautajatile kuchishiko, andimwe bweenka tamukonzhi kuzhala michelo chita kamuchite kulindime.

5 Ndime misansa, imwe ndimwe misaampi. Uyo ukkalilila muli ndime andime muli nguwe, ngushi akazhale michelo miinji, nkambo naa kamwandene andime taaku nchimukonzha kuchita. 6 Ono naa mwabula kukkala mulindime, muli mbuli musaampi wazutulwa alimwi wayuma, iyo misaampi ilabwezelelwa, akuwaalwa mu mulilo alimwi akutentwa. 7 Ono naa mwakkalilila mulindime amajwi angu akkala mulindimwe, mukalombe mfumbwa nchimuyanda, alimwi chilakupegwa kulindimwe. 8 Ubu mbulemu bwa Taata kwaamba muzhale michelo iinji, kutondezha kwaamba muli bashichiiya baangu. 9 "Mbuli Taata mbwakanyanda, bweenka andime ndamuyanda. Amukkalilile muluyando lwangu. 10 Ono naa mwabamba milawo yangu, mulakukkalilila muluyando lwangu bweenka mbundakabamba milawo ya Taata alimwi akukkalilila muluyando lwakwe.

11 Ndamwaambila zhintu izhi kwaamba kukomana kwangu kube mulindimwe alimwi kwaamba kube kumaninine. 12 Mulawo wangu ngoyu, a muyandane kuli omwi aomwi bweenka mbundakamuyanda. 13 Taaku mulawo wiinda uyu, kufila buumi bwakwe nkambo ka buumi bwamwenzhinyina. 14 Mulibenzuma naa mwachita nchindamulailila. 15 Nshika mwiiti limbi ati basebenzhi, nkambo musebenzhi tazhi zhichita shimalelo akwe, anu, ndamwiita ati muli beenzuma, nkambo oonse makani ngundakanva kuli Taata ndakamuzhibya. 16 Taaku mwakansaala, pesi ndime ndakamusala kwaamba mupe mulimo wakuchita kwaamba mukazhale michelo, michelo ikkalilila a kwaamba mfumbwa ncheshi mukalombe mu liina lyangu, Taata ulakumupa. 17 Uyu ngu mulawo wangu, amuyandane kuli omwi a omwi.

18 "Ono naa banyika bakusulaika, kozhiba kwaamba yakasulaika ndime kutaanguna. 19 Naa wakalikuzulilwa munyika, nibalinga kukuyanda nkambo nimwakalinga bamwi babo. Mbuli mbuchibele, tamushi banyika, pesi ndakamusala kuzwa mulinjiyo. Nkukambo ako nyika nchimusulaikila. 20 Amuyeeye majwi ngundakamwaambila akwaamba ati, ‘Musebenzhi takonzhi kwiinda shimalelo akwe.’ Naa ime bakampenzha, balakumupenzha andimwe. Naa bakachilila njiisho zhangu, andimwe njiisho zhanu balakuzhishilila. 21 Ono balakumupenzhela nkambo ka liina lyangu, nkambo tabamuzhi uyo wakantuma. 22 Nindatakaza, mukwaamba kuli mbabo, nibatakalinga kuchite mulandu wachinyonyono, pesi ono tabachite chakulitamizha kuchinyonyono chabo. 23 Uyo usulaika ndime ulasulaika a Taata. 24 Nindatakachita milimo iitanakuchitwako kale amuntu naba omwe, nibatalinga kuchite mulandu wachinyonyono. Mbuli mbuchibele bakaibona, alimwi bakansulaika ime a Taata. 25 Pesi ichi chilazuzikizha icho chakalembwa mu mulawo wa Mozesi ati, ‘Bakansulaikila ataaku kaambo!’

26 "Ono mugwashi akuza, uyo ngunshi nkatume kuzwa kuli Taata, ngu Muuya wakashimpe uzwa kuli Taata. Ulakupa bumboni alindime. 27 Alimwi andimwe mulyeelele kupa bumboni, nkambo mwakalinga andime kuzwa kumatalikilo.