1 Ono buzuba bwakutaanguna bwa Nsondo, anshi kaachishiyashiya, Maliya Magadalena wakashika ku chuumbwe, alimwi wakabona libwe kali kugushilwe kumulyango wa chuumbwe. 2 Amane wakajoka kabalika kuza kuli Simoni Petulo a shichiiya umwi, eenka Jesu ngwakalinga kuyanda, wakaamba ati, "Bamugusha Mwami mu chuumbwe. Alimwi tatuzhi nkubamubika!"

3 Amane Petulo abamwi a shichiiya umwi bakanyamuka akaunka ku chuumbwe. 4 Boonse bobilo bakabalika, pesi umwi shichiiya wakabalika a kushiya Petulo, wakataanguna kushika ku chuumbwe. 5 Nakashika wakasondela mu chuumbwe, wakabona boo zhisani kazhilundene anshi, pesi taaku naakanjila mukati. 6 Muunshi awalo Petulo wakashika, waindilila boo wanjila mukati. Wakabona zhisani kazhilundene, 7 achalo chisani nchakali kunvumbilwe ku mutwi wa Jesu, achalo takuchakalinga antomwi azhisani nyina. Chakalinga kunvungailwe cheenka kumbali. 8 Kumamanino umwi wa bashichiiya, abo bakashika kutaanguna ku chuumbwe, wakanjila mukati, amane wakabona akuzumina. 9 Nkambo chiindi icho taaku nibakashoma malembe amba ati Jesu ulyeelele kubuka kuzwa kubafu. 10 Kumane bashichiiya aba bakajokela nkubali kukkala.

11 Pesi Maliya wakalikuinvi ansengwe a chuumbwe kalila. Naakalinga kulila, wakasondela mu chuumbwe 12 alimwi wakabona bangeli bobilo kabasamine zhisani zhituba buu kabashite awo akalinga kulende mubili wa Jesu. Umwi wakalinga kushite nkwaakalinga kumutwi, umwi nkwakalinga kumyeendo. 13 Bakamubuzha ati, "Umukaintu nchizhi ncholila?"

Walo wakanviila ati, "Bamutola Mwami wangu, alimwi nshizhi nkubamubika!"

14 Kuchechi wakachebuka wabona Jesu uliinvi, pesi taaku naakamuzhiba kwaamba ngu Jesu. 15 Jesu wakamwaambila ati, "Umukaintu, ino ulalila nzhi? Nguni ngolangaula?"

Ono Maliya wakayeeya ati ngushikubamba muunda, abobo wakamwaambila ati, "Omuii, naa ndiwe wamulonzhela kumbi, kontondezha kamubweze."

16 Jesu wakamwaambila ati,

"Maliya!"

Nakachebuka wakaamba muchi Alamikki ati, "Rabboni!" (Mu Chihibulu chaamba ati, "Muii.")

17 Jesu wakamwaambila ati, "Utanjati," Jesu wakamwaambila ati, "Nkambo nshina kuunka kuli Taata. Pesi kounka ku bamakwesu ubaambile ati, ndaunka kuli Taata, uyo uli ngu Ishiwanu andimwe. Ndaunka kuli Leza wangu, Leza wanu andimwe."

18 Maliya Magadalena wakaunka a kwaambila bashichiiya makani akwaamba ndamubona Mwami. ngu nguwe wangambila zhintu izhi.

19 Kumangolezha, buzuba bwakutaanguna mu Nsondo bweenka ubo bashichiiya kabali antomwi, a milyango ya ng'anda kaikkilwe nkambo bakalinga kutija bamasololi baba Juuda. Ono Jesu wakashika, waima akati kabo wakabaambila ati, "Luumuno lube andimwe." 20 Nakamana kwaamba chechi, wakabatondezha maanza akwe alubazu lwakwe. Abobo bashichiiya bakakomana nibakabona Mwami wabo. 21 Alimwi Jesu wakabaambila ati, "Lumuno lube andimwe. Bweenka Taata mbwakantuma anshi aano, andime ndamutuma." 22 Nakamana boo kwaamba, wakabayoyela Muuya, wakaamba ati, "Amutambule Muuya Usalala. 23 Naa mwalekelela bantu zhinyonyono, balalekelelwa, naa mwabula kubalekelela, tabalekelelwi."

24 Pesi Tomasi uyo wakalinga umwi wabashichiiya (Wiitwa ati Mpuundu), taaku nakalinga wo chiindi Jesu nakashika ku bashichiiya bamwi. 25 Ono bashichiiya bamwi bakamwaambila ati, "Twamubona Mwami!"

Tomasi wakaamba ati, "Chita boo mbone zhilonda mwakapopwa mumaanza akwe akubika maanza angu mulubazu teenshi nshome." 26 Nikwakainda nsondo yomwi, alimwi bashichiiya bakalinga mu ng'anda antomwi a Tomasi. Pesi zhitendele kazhi kiilwe, abobo Jesu wakashika akwimikana akati kabo waamba ati, "Lumuno lube andimwe." 27 Amane wakaambila Tomasi ati, "Biika munwe wako awa, bona maanza angu. Uzhibe kwaamba ndime. Tandabika lyaanza lyako kulubazu lwangu, kwaamba uchileke kutonsha, pesi ushome!"

28 Tomasi wakamunviila ati, "Mwami wangu, a Leza wangu!"

29 Jesu wakamwaambila ati, "Ono wazumina nkambo wambona. Balilelekelwe abo bazumina kabatana kubona!"

30 Ono a zhimwi zhitondezho zhiinji zhanguzu Jesu nzhakachita kubushu bwabashichiiya zhitana kulembwa mu libbuku ili. 31 Pesi izhi zhakalembwa kwaamba mushome ati Jesu ngu Mesiya, Mwana Leza, a kwaamba mwamushoma mukabe a buumi mu liina lyakwe.