1 Ono Jesu wakaamba ati, "Nchanchobeni ndamwambila uyo utanjilili kunjilila mbelele, pesi katantila kumbi, ngu kabwalala alimwi mubbi. 2 Ono uyo unjilila kumulyango ngu mweembezhi wambelele. 3 Mulindizhi wamulyango ulamujalwila mulyango mweembezhi, alimwi mbelele zhilalinva lizwi lya mweembezhi. Ula zhiita mbelele zhakwe amaiina akuzhisololela ku machelelo. 4 Amana kuzhigusha zhoonse. Ulazhisololela kumpela, alimwi mbelele zhilamuchilila nkambo zhililizhi lizwi lyakwe. 5 Pesi taaku nizhiyakuchilila mweenzu, alimwi inga zhamubalika nkambo tazhilizhi lizwi lya mweenzu."

6 Jesu wakasebenzha kaambyo aka, pesi ba Faliisi taaku bakanvisha nchakalinga kubaambila.

7 Abobo, Jesu wakaamba alimwi ati, "Nchanchobeni ndamwaambila, ime ndime mulyango wambelele. 8 Boonse bakaza nshitana kuza, mbakabwalala alimwi mbabbi, pesi mbelele taaku nizhakabanvila. 9 Ndime mulyango, mfumbwa unjila muli ndime ulakufutulwa, balanakunjila a kuzwa, alimwi balakujana machelelo. 10 Kabwalala ulaza boo kubba a kujaya, Pesi ime ndakazila kwaamba babe a buumi, alimwi buumi buzwile.

11 "Ndime mweembezhi mubotu. Mwembezhi mubotu ulafila mbelele zhakwe. 12 Musebenzhi taashi mwiine mbelele alimwi tazhishi zhaakwe. Ono naa wabona baumpe kabaza, ulazhishishiya mbelele a kubalika. Amana baumpe balatanda butanga alimwi zhilamwaikana. 13 Ono uyo muntu ulabalika nkambo ngumusebenzhi boo alimwi tabikili maano kumbelele. 14 "Ndi mweembezhi mubotu, ndizhizhi mbelele zhangu azhalo zhilinzhi. 15 Bweenka ba Taata mbubanzhi, andime ndibazhi ba Taa. Alimwi ndazumina kufila mbelele. 16 Nkuzhili a zhimwi mbelele, zhitali zhamuchaanda ichi. Ndyeelele kuzhileta azhalo. Azhalo zhilakunva ku lizwi lyangu, alimwi zhilakuba butanga bomwi, amweembezhi omwi.

17 Taata nchanyandila nkambo ndakazumizha buumi bwangu kwaamba mfe alimwi akubuka. 18 Taaku muntu ububweza buumi kuzwa kulindime, pesi ndakubutula ndimwiine. Ndichite nguzu zhakutula azhakubweza ndimwine. Aya ngu malailile ngundakapegwa a Taata."

19 Ono kwakaba kwandaana akati kaba Juuda nibakanva majwi aya. 20 Baanji bakaamba ati, "Uyu muntu ulinjililwe muuya ubiibi alimwi ulichinkukile. Ino nkambo nzhi mulamunvila?"

21 Pesi bamwi bakaamba ati, "Uku takushi nkukwaamba kwa muntu unjililwe muuya ubiibi. Saa muuya ubiibi inga wajalula menso a moofu?"

22 Ono chakalinga chiindi cha Pasika kuyeeya kumana kwakuyaka kwa Ng'anda ya Leza mu Jelusalema, alimwi wakalinga mupeo. 23 Ono Jesu wakalinga kwendenda mu lubaanza lwa tempele mumavuka akwe Solomoni. 24 Ono ba Juuda bakalinga wo bakamubunganina akumubuzha ati, "Ino tulakkala chiindi chilaamfu buti katulindila bwiinguzhi? Kotwaambila chantangalala, saa ndiwe Mesiya?" 25 Jesu wakanviila ati, "Ndakamwambila kale, pesi tamushomi. Inchito nzhinchita mu liina lya Taata zhilapa bumboni bwangu, 26 Pesi tamushomi imwe nkambo tamushi mbelele zhangu. 27 Mbelele zhangu zhilanva ku jwi lyangu, andime ndizhizhi, azhalo zhilanchilila. 28 Ime ndazhipa buumi butamani. Tazhikafi, alimwi taaku wiinga wazhisompola. 29 Taata wakazhipa kulindime munene kwiinda boonse. Taaku wiinga wazhigusha kuzwa kumaanza aba Ta. 30 Ime a Taata tuli omwi."

31 Alimwi bama Juuda bakabweza mabwe kwaamba bamuwaale, 32 pesi Jesu wakabaambila ati, "Ndakamutondezha inchito zhibotu zhiinji zhizwa kuli Taata. Ino njili ali zhezhi nzhimuyanda kungwaalila mabwe?"

33 Bakanviila ati "Tatute kukuwaalila nchito ibotu, pesi nkambo kakasampusampu! Uli muntu boo iwe, pesi ulayaamba kuba Leza!"

34 Jesu wakambanviila ati, "Saa tachilembelwe mu milawo yanu kwaamba ati, "Muli tu leza leza?’ 35 Naa Leza wakabaita ati ntu leza leza bantu abo bakaamba majwi akwe. Nkukwaamba malembe nga mashimpe lyoonse. 36 Ino kuli babo mbakabika ambali Taata mbuli baakwe alimwi akubatuma munyika? Ino nkambo nzhi mulampa kaambo kakusampula nkambo ndaamba ati, ‘Ndi Mwana a Leza? 37 Mutanshomi chita nsebenze inchito ya Taata. 38 Pesi naa ndachita, nimutashomi ime lwangu, amwishome inchito kwaamba mu chikonzhe kuzhiba akunvishisha kwaamba Taata uli muli ndime, andime ndi muli Taata.

39 Ono alimwi bakasola kumujata, pesi wakabapuzhumuka.

40 Ono Jesu wakaunka alimwi kutala a mulonga wa Jodani, kubusena uko Joni nkwakalinga kubbizhila kutaanguna, amane wakakkala, 41 alimwi bantu baanji bakaza kulinguwe bakaamba ati, "Nakuba kwaamba Joni taaku nakachita chitondezho, pesi zhoonse nzhakaamba a muntu uyu nzha kashimpe." 42 Alimwi uko bantu baanji bakashoma muli Jesu.