1 Kumatalikilo Ijwi lyakalinga ko, alimwi Ijwi lyakalinga antomwi a Leza, alimwi Ijwi ngu Leza. 2 Kuzwa kumatalikilo Ijwi lyakalinga a Leza, 3 Kwiinda mulinguwe zhintu zhoonse zhakalengwa, natakalinga nguwe ninga takubi icho chakalengwa nachiba chomwi. 4 Mulinguwe mwakalinga buumi, alimwi buumi ubu bwakalinga ngu mumuni wa bantu boonse. 5 Mumuni ulamunika mumushiinzhe, alimwi mushiinzhe taukonzhi kukoma. 6 Kwakalinga muntu wakatumwa a Leza wa liina lya Joni. 7 Wakaza mbuli kamboni kwaambila bantu makani amumuni, kwaamba kwiinda muli nguwe boonse banve mulumbe akushoma. 8 Walo mwiine taaku nakalinga mumuni, wakaza boo kuba kamboni ku mumuni 9 Uyu wakalinga mumuni wa kashimpe wakalinga kuza munyika akumunika ali uli oonse.

10 Wakalinga munyika, alimwi nakuba kwaamba nyika yakalengwa kwiinda mulinguwe, nyika taaku yakamuzhiba. 11 Wakaza ku chishi chakumuzhaabo, pesi bantu bakwe taaku nibakamutambula. 12 Kakuli bantu bakamutambula akumushoma mu liina lyakwe wakabapa mumuni wa kwaamba babe bana ba Leza, 13 Kuba bana taaku nikwakazwila kubazhali babo, nakuba kuyanda kwa muntu, nakuba kuyanda kwa musankwa, pesi kulazwa kuli Leza.

14 Ijwi lyakaba muntu, alimwi wakaza kukkala akati kesu. Twabona bulemu bwakwe, bulemu bwakwe alimwi Mwana boo eenka, wakaza kuzwa kuli Taata, kazwile nkumbu alimwi a kashimpe.

15 Joni wakaamba kujatikizha nguwe wakalila ati, "Ngu oyu ngundakalinga kumwaambila ati, ‘Uza muunshi lyangu munene, nkambo wakalinga kokale ime nshitana kubako.’ "

16 Kwiinda mu luyando lwakwe twatambula nkumbu, atala a nkumbu zha oyo wakalinga kokale. 17 Mulawo wakapegwa kwiindila muli Mozesi, abobo nkumbu akashimpe zhakapegwa kwiinda muli Jesu Kilisitu. 18 Taaku naba omwi wakamubona Leza, pesi Mwaana boo eenka, eenka ngu Leza alimwi uli ku lubazu lwa Baishi, nguwakalenga kwaamba azhibwe. Joni mubbizhi mbwakaka kuba Mesiya.

19 Ono ubu mbubu bukamboni bwa bamasololi bamu Jelusalema nibakatuma ba paizhi abama Leevi kubuzha kwaamba ino ndiwe nii?" 20 Taaku nakaalilwa kwaamba, pesi wakaamba chakwanguluka ati, "Nshiishi Mesiya." 21 Bakamubuzha ati, "Ino anu ndiwe nii?" "Saa ndiwe Elijah?" Joni wakabanviila ati, "Taaku, nshinshi,"

Bakabuzha ati, "Saa ndiwe mushinshimi?" wakabanviila ati, "Taaku." 22 Kumamanino bakamubuzha ati, "Kotwaambila naa nduweni kwaamba tuunke twaambe kuli babo batutuma. Ino iwe ulalyaamba ati ndiwe nii?" 23 Joni wakaamba kwendelana a mushinshimi Izaya mbwakaamba ati,

"Ndime jwi lya oyo wongolola mu chimpayuma.

Amululamike nzhila ya Mwami."’

24 Ono abo ba Faliisi bakatumwa, 25 bakamubuzha Joni ati, "Ino nchinzhi nchobbizhila naa tooshi Mesiya, naa Elija naa mushinshim?" 26 Joni wakanviila ati, "Ndabbizha a maanzhi, pesi akati kanu ali omwi ngumutazhi. 27 Ngu oyo utokuza kuzwa ndime, nsheeleli akwaangulula ntambo zha nkwabilo zhakwe." 28 Izhi zhoonse zhakachitika mu Betani uli kutala a mulonga wa Jodani, umo Joni mwakalinga kubbizha.

29 Ono buzuba bwakachilila Joni wakabona Jesu kaza kuli nguwe, alimwi wakaamba ati, "Amubone Mwana mbelele wa Leza, ugusha chinyonyono cha nyika! 30 Uyu ngunguwe ngundakalinga kwaamba nindaakaamba ati, "Uuza muunshi lyangu ulanyinda, nkambo nkwaakalinga kale ime nshitana kuzhalwa.’ 31 Ime ilwaangu taaku ndakalinga kumuzhi, ono nchindakazila kubabbizha amaanzhi kwaamba azubululwe kuba Izilaili." 32 Alimwi Joni wakapa bumboni ubu ati, "Ndakabona Muuya kauza anshi mbuli nkwilimba kuzwa ku julu akukkala ali nguwe. 33 Alimwi ime taaku ndakali kumuzhi, ono Leza wakantuma kubbizha a maanzhi a kwaamba kuli ndime ati, ‘Kufumbwa waakubona muntu ushiakaselukilwe Muuya wangu kuzwa ku julu akumukkala, ukazhibe kwaamba ngu nguwe ubbizha a Muuya Usalala.’ 34 Joni wakaamba ati, ndachibona, "Alimwi nda pa bumboni kwaamba uyu ngu Mwana a Leza."

35 Buzuba buchilila Joni wakalinga a bashichiiya bakwe bobilo. 36 Nakabona Jesu kainda. Wakaamba ati, "Amubone Kabelele wa Leza!" 37 Ono bashichiiya bobilo bakanva kaamba ichi, bakamuchilila Jesu. 38 Ono nakachebuka Jesu, wakababona kabamuchilila, amane wakababuzha ati, "Ino nchinzhi nchimuyanda?"

Bakanviila ati Rabbi (chaamba ati Muii) ino nkuli kokkala?"

39 Wakanviila ati kamuza, alimwi mulabona. Amana bakaunka akubona nkwakalinga kukkala, alimwi bakamana buzuba anguyo. Nkambo kwakalinga kale kumangolezha (4 koloko).

40 Andulu, a Saimoni mukwabo Petulo, wakalinga umwi wabobilo wakanva chakaamba Joni alimwi mbubakachilila Jesu. 41 Chintu chakutaanguna Andulu nchakachita wakalangaula mukwabo Saimoni akumwaambila ati, "Twamujana Mesiya wa Leza (Nkukwaamba Kilisitu.) 42 Alimwi wakamutola kuli Jesu.

Jesu wakamulanga wakaamba ati, "Saa nduwe Saimoni mwana a Joni, kuzwa ono ulanakwiitwa ati Kefasi." (Kefasi a Petulo maiina aya alaamba ati libwe).

43 Nibwakacha Jesu wakayeeya kuunka ku chishi cha Galili, uko nkwakajana musankwa witwa ati Filipo, amana wakamwaambila kwaamba nchilile!" 44 Filipo wakalinga kukkala ku Betesaida, munzhi wakalinga kukkala Andulu a Petulo. 45 Filipo wakajana Natanyeli, amana wakamwaambila ati, "Twamujana muntu Mozesi ngwa kalemba mu libbuku lya mulawo uyo ulembelwe amumabbuku a bashinshimi. Ngu Jesu waku Nazaleti, mwana a Josefa." 46 Saa kuli chibotu chiinga chazwa mu Nazaleti wakabuzha Natanyeli?" Filipo wakaamba ati koza ulibonene. 47 Ono Jesu nakamubona Natanyeli kaza kuli nguwe wakaamba ati, "Ngooyu muna Izilaili wanchobeni utabeje!" 48 Natanyeli wakabuzha Jesu ati, "Ino wanzhiiba buti?" Jesu wakanviila ati, "Ndalikukubwene kale kochili munshi a chisamu cha mukuyu, katana akukwiita Filipo." 49 Amane Natanyeli wakaambilizha Jesu kwaamba ati, "O Muii, nduwe Mwana a Leza! Nduwe Mwami wa Izilaili!" 50 Jesu wakanviila ati, "Saa ulashoma nkambo ndamwambila ati ndakubona munshi a chisamu cha mukuyu? Mulakubona zhintu zhinene zhibiibi zhiinda checho!" 51 Alimwi wakabaambila ati, "Chanchobeni ndamwaambila mulakubona julu kalijaluka aba ngeli ba Leza kabatanta akuseluka a Mwana Muntu."