Mateus 26

Jesu mbubakamukanza kumujaya

1 Jesu nakamanizha kuiisha zhintu izhi zhoonse, wakaambila bashichiiya bakwe ati, 2 "Mbuli bweenka mbumuzhi kwaamba kwashaala mazuba obilo kwaamba Pasika ibe, ono awalo Mwana a Muntu ula kwaabwa kwaamba agagailwe."

3 Bapaizhi banene a bamaalu bakabungana ambali ku ng’anda ya mwami munene Kaifaasi, 4 alimwi akupangana mbweshi bamujate Jesu chakusisikizha a kumujaya. 5 "Ono bakaamba ati, tutakuchiti chiindi cha pobwe nkambo inga kwaba kunyongana akati ka bantu."

Jesu wakananikwa mafuta chiindi nakalinga ku Betani

6 Ono chiindi Jesu nakalinga ku Betani mu ng’anda ya Saimoni shimankuntu, 7 Kwakashika mukaintu a mafuta aadula a nunkila kabotu a kutila Jesu kumutwi chiindi nakalinga kulya. 8 Chiindi bashichiiya nibakabona ichi, bakakalala akubuzha ati, "Nkambo nzhi wasowaila mafuta aya?" 9 "Mafuta aya nauzhigwa muulo unene a kupa maali ku bachete!"

10 Jesu nakazhiba nchibakalinga kwaamba, wakabaambila ati, "Nkambo nzhi mulamupenzha uyu mukaintu? Walo wachita chintu chibotu kuli ndime. 11 Bantu Bachete mulanokuli ambabo lyoonse pesi ime teeshi munokuli andime lyoonse. 12 Nchachita kuntila mafuta amubili wangu, waubamba kwaamba nkazhikwe. 13 Kashimpe ndamwambila, mfumbwa kuli koonse nkweshi ukakambaukwe Mulumbe Mubotu munyika yoonse, achalo nchachita mukaintu uyu chilakwambwa mukuyeya nguye."

Judasi wakazumina kwaaba Jesu

14 Alimwi umwi wabali kkumi abobilo wakalikwiitwa ati Judasi Isikalyoti, wakaunka ku bapaizhi banene 15 a kubuzha ati, "Ino mulampanzhi nda mwaaba Jesu kuli ndimwe?" Ono bakabala maali asiliva ali makkumi otatwe akumupa. 16 Ono kuzwa chiindi icho Judasi wakalinga kulangaula chiindi chibotu chakumwaaba Jesu.

Jesu wakalya Pasika abashichiiya bakwe

17 Mubuzuba bwakutanguna bwa Pasika ya chinkwa chitachite mimena, bashichiiya bakaza kuli Jesu a kumubuzha, "Nkuli nkuyanda kwaamba tukabambile Pasika kwaamba ulye?"

18 Wakabanviila ati, "Kamuunka mu munzhi umwi mulajana muntu mumwaambile kwaamba ati, ‘Muii waamba ati, chiindi changu chili afaafi, ndanda kulya Pasika mu ng’anda yako atomwi a bashichiiya bangu."

19 Alimwi bashichiiya bakachita bweenka Jesu mbwakabalailila a kubamba pasika.

20 Mangolezha nakaza, Jesu a bashichiya bakwe bali kkumi abobilo bakakaala anshi a kutalika kulya. 21 Alimwi nibakalinga kulya Jesu wakaamba ati, "Kashimpe ndamwaabila, akati kanu umwi wanu ulangaba."

22 Bashichiiya nibakanva, bakausa a kutalika kumubuzha omwi a omwi ati, "Saa ndime O Mwami?"

23 Jesu wakanviila ati, "Eenka ngutokubwenga anguye mumbale ulakungaba. 24 Mwana a Muntu ulakufa kwendelana a malembe bwaamba. Pesi mawe ku muntu uyo ushi a kaabe Mwana a Muntu! Chali kwiinda kubota natakazhalwa boo."

25 Amana Judasi shikwaaba Jesu wakaamba ati, "Saa ndime O Muii? Jesu wakanviila ati, "Waamba."

Mulalilo

26 Ono nibakalinga kulya Jesu wakabweza chinkwa nakamana kupa kulumba a kuchikomauna amane wapa bashichiiya bakwe, wakaamba ati, "Amubweze mulye uyu mubili wangu."

27 Amane wakabweza nkaapu, alimwi nakamana kupa kulumba wakapa bashichiiya bakwe akwaamba ati, "Kamunwa noonse mu nkaapu umu," 28 "Ubu mbubulowa bwangu bwachizuminano chipya bwakatikila baanji kwaamba zhinyonyono zhilekelelwe.