14 Ído̱ nidxawuun Abrám rí nikhuáa dríxe̱e̱, a̱ꞌkhue̱n rí nixnúu̱ ajua̱nꞌ rí ma̱gi̱da̱ꞌ ñawúún mbá atsú siénto̱ gu̱wa̱ꞌ-nítsu e̱tso̱ (318) yumbée̱ tsí ni̱gu̱mii ná goꞌóo̱. A̱ꞌkhue̱n ni̱ka̱-raxkúu̱n mbá ná-akhu̱u̱n xa̱bo̱ ñajun asndo ná Dán. 15 Abrám gajmíí xa̱bi̱i̱, nda̱a̱ ajngóo ni̱tu̱ꞌúu̱n mbroꞌon ná kachúún xa̱bo̱ ñajun, jamí nigó-ruxkúu̱n asndo ná Óba̱ rí ꞌgí ná tsu̱du̱u̱ xuajen Damásko̱. 16 Xkuaꞌnii nigu̱u̱ mbá xúgíí rí máján rí ni̱dri̱gú xa̱bo̱ tsúꞌkhue̱n, xúꞌkhue̱n máꞌ neꞌne-jríya̱a̱ꞌ dríxe̱e̱ ga̱jma̱á mbá xúgíí drígo̱o̱ rí ni̱ga̱taa. Xúꞌkhue̱n máꞌ neꞌne-jáwíi̱n go̱ꞌo̱ jamí iꞌwíin xa̱bo̱.
18 A̱ꞌkhue̱n rí Melkisedék, tsí ñajuun thúngaa ná xuajen Salém, ni̱gu̱wíi̱ guma wopho ga̱jma̱á iyoo xndú úba̱. Ikhaa̱ ñajuu̱n dxakuun drígo̱o̱ Ana̱ꞌlóꞌ Mikhuíí, 19 ikhaa jngó neꞌne tsakun-rámaa̱ Abrám ga̱jma̱á ajngáa ríge̱ꞌ:
«Ana̱ꞌlóꞌ Tsí Xtáa Mikhuíí,
tsí neꞌne ku̱maa mikhu ga̱jma̱á ju̱ba̱ꞌ,
gáꞌne tsakun-rámaa Abrám.
20 Ga̱gu̱ma-mba̱a̱ Ana̱ꞌlóꞌ Tsí Xtáa Mikhuíí,
tsí nixnáxi̱i̱n xa̱bo̱ sia̱a̱nꞌ ná ñawáanꞌ».
A̱ꞌkhue̱n rí Abrám nixnúu Melkisedék mbóó awúun rí mbámbá gu̱wa̱ꞌ rí mbá xúgíí rí nigu̱u̱.