Ana̱ꞌlóꞌ naxuda-mina̱ꞌ rí ma̱gu̱maa mbáa a̱dée Abrám
1 Nda̱wa̱á rí ninújngoo máꞌ ríge̱ꞌ, ni̱ꞌkha̱ ajngáa rawuun Ana̱ꞌlóꞌ Mikhuíí ná inuu Abrám asndo xó xnuꞌndaa inuu mbiꞌi. Xáꞌnii waꞌtháa̱n:
—Ma̱xámíñaaꞌ Abrám, ikhúúnꞌ ñaju̱nꞌ tsí na̱ña̱wa̱a̱nꞌ. Maphú mba̱a̱ mi̱ndaꞌkho rí mbi̱ya̱a̱ numaaꞌ.
2 Xómáꞌ Abrám niriꞌña̱a̱:
—Táta̱ Anu̱ꞌ Mikhuíí, náá-lá numuu gára̱xnu̱ꞌ guéño xí ndawi̱i̱n máꞌ i̱ji̱nꞌ rá. I̱ndo̱ó máꞌ Eliesér tsí na̱ꞌkha̱ ná Damásko̱ nayumbáá na̱ña̱wu̱u̱n mbá xúgíí rí gúꞌdo̱ꞌ. 3 —Niꞌthán xóó Abrám—: Nathayáá máꞌ ikháán rí tára̱xni̱ꞌ nimbáa a̱ꞌdéꞌ, ikhaa jngó ikhaa máꞌ yumbáá, mbo̱ ni̱gu̱maa ná goꞌóꞌ, ma̱wanúu ñawúun rí gúꞌdo̱ꞌlo̱ꞌ.
4 A̱ꞌkhue̱n ni̱ꞌkha̱ mbu̱jú ajngóo Ana̱ꞌlóꞌ Mikhuíí inuu Abrám:
—Ma̱xáwanúu ñawúun tsúꞌkhue̱n dríga̱a̱ꞌ, rí mbáa tsí a̱ꞌdeáaꞌ jmína̱á ma̱wanúu ñawúun ne̱.
5 A̱ꞌkhue̱n rí Ana̱ꞌlóꞌ ni̱ka̱ jayáa Abrám rixa̱á, jamí niꞌthúu̱n:
—Atiaxi̱í mikhu, jamí araxnuu a̱ꞌgua̱án xí na̱ꞌnga̱a̱ꞌ. —A̱ꞌkhue̱n niꞌthán Ana̱ꞌlóꞌ—: Xkuaꞌnii mbaꞌiin xa̱bia̱a̱ꞌ gáꞌne.
6 Ninimbo̱o̱ꞌ Abrám jaꞌyoo Ana̱ꞌlóꞌ Mikhuíí, rúꞌkhue̱n jngó Ana̱ꞌlóꞌ ndiꞌyoo rí májáan a̱kui̱i̱n. 7 A̱ꞌkhue̱n rí Ana̱ꞌlóꞌ niꞌthúun Abrám:
—Ikhúúnꞌ ñaju̱nꞌ Táta̱ Mikhuíí tsí ni̱ríña̱á ná Úr xuajiúún mbo̱ kaldéo̱, rí ma̱xna̱a̱ꞌ ma̱ꞌne mbayaaꞌ mbaa ríge̱ꞌ.
8 A̱ꞌkhue̱n rí Abrám niraxu̱u̱ Ana̱ꞌlóꞌ:
—Táta̱ Anu̱ꞌ Mikhuíí, xáne-lá gáyu̱u̱ rí ma̱ra̱xnu̱ꞌ ne̱ ma̱ꞌne mbayu̱ꞌ rá.
9 Xómáꞌ Ana̱ꞌlóꞌ niriꞌña̱a̱:
—Aya̱ ꞌcháa mbáa xede̱ iꞌgú tsí atsú tsiguu, mbáa tso̱toon iꞌgú tsí atsú tsiguu, jamí mbáa mogo̱ tsí atsú tsiguu, mbáa gúgo̱ jamí mbáa rigu mangaa.
10 A̱ꞌkhue̱n rí Abrám ni̱ꞌkha̱ jagu̱u̱n xúgíin xu̱kú tsúꞌkhue̱n. Nixpíthá-ngañii̱ jamí mbéꞌtháan niskuíji̱i̱ xuéꞌthúún. Xómáꞌ ño̱ꞌo̱n táxpíꞌthá-ngañii̱. 11 A̱ꞌkhue̱n naguátaan dxáꞌan ná triga̱ xuñúú xu̱kú tsí nijáñúú, xómáꞌ Abrám naxkúu̱n.
12 Ído̱ rí na̱tra̱ꞌmúu máꞌ a̱kha̱ꞌ, maphú me̱do̱ niꞌgu Abrám. Ra̱ꞌkhá-tháán nimíñuu̱ numuu rí nijmiyuu̱ rí neꞌne jína gakhe̱. 13 A̱ꞌkhue̱n rí Ana̱ꞌlóꞌ Mikhuíí niꞌthúun Abrám: «Gíꞌmaa ma̱thi̱yáá rí xa̱bia̱a̱ꞌ ma̱ju̱wá ná mbaa rí ra̱ꞌkháa mbañúu̱. Ikhín ma̱gu̱ma-ski̱ñúu̱ rí muñajuii̱n, jamí nikhuáa mi̱ndaꞌkho ma̱gu̱míi̱ mbá akho̱ siénto̱ tsigu. 14 Xómáꞌ ikhúúnꞌ ma̱ne̱ rí mamínu̱u̱ꞌ xuajen ná rí ma̱gu̱míí nikhuáa xa̱bia̱a̱ꞌ. Jamí ma̱ne̱ rí ra̱ꞌkhá-tháán judee̱ rí máján, ído̱ rí ma̱ga̱jnáa̱ ikhín. 15 Xómáꞌ ikháán rá, tsímáá gájáñaaꞌ jamí mi̱ꞌdíi̱n gajmiáaꞌ xa̱buanuu dríga̱a̱ꞌ ído̱ rí ma̱ꞌkhi̱ín guéñíí. 16 Jamí ído̱ gánújngoo akho̱ siénto̱ tsigu15.16 Ná ajngáa ebréo̱ a̱jma̱ ju̱ma̱ gíꞌdoo ajngáa rí naꞌthán «generación» ná xtíloo. Mbá rí naꞌthán numuu nguátha̱ tsigu eꞌne nákhí ni̱gu̱maa mbáa xa̱bo̱ asndo rí na̱gu̱maa a̱dée. I̱mba̱a̱ rí naꞌthán ikhaa máꞌ ajngáa rúꞌkhue̱n ñajuun rí nanújngoo mbaꞌa tsigu. ma̱guwáa̱nꞌ máꞌ xa̱bia̱a̱ꞌ ge̱jioꞌ, numuu rí asndo xúge̱ꞌ xóó máꞌ tsínújngoo-rámuu aꞌkhán rí none̱ xa̱bo̱ amorréo̱».
17 Ído̱ rí nijngúun máꞌ a̱kha̱ꞌ jamí neꞌne jína, a̱ꞌkhue̱n nikujmaa mbá iñúu agu naꞌne gúní ga̱jma̱á mbá aguu rondo̱ ngrigo̱-ranújngoo ná majiu̱ún xu̱kú tsí niwiꞌthá-jngiin. 18 Nákhí mbiꞌi rúꞌkhue̱n Ana̱ꞌlóꞌ Mikhuíí ni̱gi̱ꞌdoo mbá awan ga̱jma̱á Abrám. Xáꞌnii niꞌthúu̱n: «Ikhiin xa̱bia̱a̱ꞌ ma̱xnu̱ú mbaa ríge̱ꞌ, asndo ná mañuu Ejípto̱ asndo ná mañuu mba̱a̱ rí mbiꞌyuu Éufra̱te̱s. 19 Ma̱xnúu̱ xúgíí mbañúú xa̱bo̱ senéo̱, mbo̱ seneséo̱, mbo̱ kadmonéo̱, 20 mbo̱ etéo̱, mbo̱ fereséo̱, mbo̱ refaíta̱, 21 mbo̱ amorréo̱, mbo̱ kananéo̱, mbo̱ jerjeséo̱ jamí mbo̱ jebuséo̱».
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)