1 Nda̱wa̱á nikujmaa Ana̱ꞌlóꞌ Mikhuíí ná ríga̱ xta̱maña̱ꞌ drígo̱o̱ Mámre̱. Ikhín máꞌ ꞌgí Abraám mbá wakha̱ꞌ wáa ná rawuun guꞌwá xtíin drígo̱o̱. 2 A̱ꞌkhue̱n rí niyaxe̱ Abraám, jamí ndiꞌñúu̱ atsúun xa̱buanuu wájun jri̱doo ná ꞌgíi̱ꞌ ikhaa̱. Ído̱ ndiꞌñúu̱, nigájnuu̱-ragáyuu̱ gágrui̱gúu̱n, jamí nismáti̱go̱o̱ rí niꞌgíi̱ inuu̱ asndo mbayíí. 3 A̱ꞌkhue̱n niꞌthúu̱n:*

—Táta̱, athane̱ mba̱a̱ a̱kia̱a̱nꞌ. Na̱tha̱n-jáñaaꞌ rí ma̱xídxú xóó. 4 Ma̱ꞌkha̱ jiꞌyá xúge̱ꞌ mbá lájuíin iya rí mu̱jiáa̱n nakhuálaꞌ, xúꞌkhue̱n máꞌ gu̱ya̱a̱ xa̱ꞌlaꞌ ná agoo ixe̱ ge̱e̱. 5 Numuu rí nanújnga-málaꞌ mijngi ná xtáá rá, ikhaa jngó ma̱ꞌkha-ja̱yo̱ꞌ tháan rí mo̱pholaꞌ rí mbu̱ya̱a̱laꞌ tsiakhe̱. Nda̱wa̱á a̱ꞌkhue̱n gúꞌgualaꞌ.

Xómáꞌ ikhii̱n ni̱ri̱ꞌñaa̱:

—Máján, athane̱ máꞌ xóo rí nirathán.

6 A̱ꞌkhue̱n rí mbá nacha̱ ni̱ka̱ Abraám ná guꞌwá xtíin ná kra̱ꞌaa Sára̱, jamí niꞌthúu̱n: «Mbá nacha̱ gátha̱ne̱-ꞌxíí mbá atsú khiáwan arína̱ rí máján, xúꞌkhue̱n máꞌ ma̱tha̱ne̱ gumuu ne̱ ná madíí».

7 Xúꞌkhue̱n máꞌ mbá nacha̱ ni̱ka̱ Abraám ná gatiin xede̱, jamí nigatuwii̱n mbáa a̱ꞌdá-xédé rudii tsí májáan wáa, jamí nixnáxu̱u̱ yumbée̱ rí ma̱ꞌne májáa̱nꞌ mbá nacha̱. 8 A̱ꞌkhue̱n rí ni̱ꞌkha̱ jagu̱u̱ yaꞌdú ga̱jma̱á a̱ꞌdá-xédé tsí ni̱gu̱ma-májáan máꞌ, jamí nistrámee̱ ne̱ inúú xa̱buanuu. Xómáꞌ ikhaa̱ wíji̱i̱ mijngi ná agoo ixe̱ ído̱ rí napiꞌtsii̱. 9 A̱ꞌkhue̱n ni̱ra̱xíi̱ Abraám:

—Náá xtáa a̱ꞌgia̱a̱ꞌ róꞌ.

Xómáꞌ ikhaa̱ niriꞌñee̱:

—Awúun máꞌ guꞌwá xtíin a̱ꞌkhue̱n kra̱ꞌaa̱.

10 A̱ꞌkhue̱n rí mbáa tsúꞌkhue̱n niꞌthán:

—Gakon rí ma̱tangu̱ún gáya̱a̱ꞌlo̱ꞌ xíríga̱á rí i̱mba̱-tsígu. A̱ꞌkhue̱n rí a̱ꞌgia̱a̱ꞌ gíꞌdaa máꞌ mbáa ada̱. Nadxawuun nána̱ nikhi̱i̱ Sára̱ rí ma̱gi̱ꞌdaa̱ a̱dée̱.

Xómáꞌ Sára̱ wéje̱ nadxawuun ná rawuun guꞌwá xtíin, ná tsu̱du̱u̱ mbo̱ naꞌthán. 11 Abraám ga̱jma̱á Sára̱ xa̱buanuu guéño máꞌ ñajúu̱n, xúꞌkhue̱n máꞌ Sára̱ nánguá iꞌkhu̱u̱ awúu̱n xómá rí nagíꞌníí go̱ꞌo̱. 12 Ikhaa jngó ninduꞌwá Sára̱ ná awúun a̱kui̱i̱n rí nindxaꞌwá-mine̱e̱ꞌ: «Á ma̱gúꞌdo̱ꞌ gagi rí nikhiu̱ún guéño, xí táta̱ nikhi̱i̱ máꞌ mangaa rá».

13 A̱ꞌkhue̱n rí Ana̱ꞌlóꞌ Mikhuíí niꞌthúun Abraám:

—Náá numuu jngó ninduꞌwá Sára̱ rí niꞌthée̱n: "Á gakon rí ma̱ne̱ xuajiin rí nikhiu̱ún guéño máꞌ rá". 14 Á ríga̱ rí mingíjiúu inu̱ꞌ ikhúúnꞌ rá dxe̱ꞌ. Ma̱tangu̱ún máꞌ ma̱ꞌkha gáya̱a̱ꞌlo̱ꞌ, ikhaa máꞌ mbiꞌi rí ni̱tha̱a̱nꞌ, xíríga̱á rí i̱mba̱ tsígu. Sára̱ gíꞌdaa máꞌ ada̱ xúꞌkhue̱n rá.

15 Numuu rí nimíñuu Sára̱, ikhaa jngó neꞌne-nduwee̱:

—Tándu̱ꞌwa̱ jún.

Xómáꞌ Ana̱ꞌlóꞌ niꞌthán:

—Ra̱gákon. Nitanduꞌwá ján.

16 A̱ꞌkhue̱n rí xa̱buanuu niguáxo̱n rí magóó ná giaxu̱u̱ Sodóma̱. Xúꞌkhue̱n máꞌ na̱ka̱ tháan Abraám gajmíi̱ rí maꞌthán-ngawúu̱n. 17 Xómáꞌ Ana̱ꞌlóꞌ Mikhuíí niꞌthán: «Á ma̱rkaꞌuu Abraám rí xtáá ma̱ne̱ rá. 18 Numuu rí ikhaa Abraám ma̱nindxu̱u̱ mbá xuajen mba̱a̱ jamí gakhi̱i̱. Xúꞌkhue̱n máꞌ ná majiu̱u̱nꞌ ikhaa̱ ma̱gu̱ma-tsakun-ráma mbá xúgíí xuajen inuu numba̱a̱. 19 Numuu rí ikhúúnꞌ nda̱yo̱ rí maxná-ñájuu̱n i̱ji̱i̱n jamí mbá xúgíin tsí ma̱gu̱mii nda̱wa̱á rí ma̱ju̱wée̱ꞌ ná jambo̱ꞌ ikhúúnꞌ, jamí muni̱i̱ rí máján ga̱jma̱á rí jmbu. Ikhaa jngó xkuaꞌnii ma̱ne̱-mbánuu rí ni̱xu̱ꞌdá-mina̱ꞌ ga̱jma̱á nindxu̱u̱».

20 A̱ꞌkhue̱n rí Ana̱ꞌlóꞌ Mikhuíí niꞌthúun Abraám:

—I̱tha̱n nanújngoo-rámuu rí nawán numúú xa̱bo̱ Sodóma̱ ga̱jma̱á Gomórra̱, xúꞌkhue̱n máꞌ aꞌkhán rí na̱xu̱da̱ꞌ-mi̱jne̱e̱ rí phú neꞌne mba̱a̱ mi̱ndaꞌkho ne̱. 21 Ikhaa jngó ma̱gátáá xúge̱ꞌ mba̱yo̱o̱ xí gakon rí nuni̱i̱ guéño aꞌkhán xóo rí ni̱dxawuun. Xí na̱nguá máꞌ mbo̱ꞌ, mba̱yo̱o̱ máꞌ mangaa.

22 A̱ꞌkhue̱n nigájnúú xa̱buanuu magóó ná Sodóma̱. Xómáꞌ Abraám rá, niwanúu̱ xóó ná inuu Ana̱ꞌlóꞌ Mikhuíí. 23 A̱ꞌkhue̱n rí Abraám nixuꞌma-mina̱ꞌ i̱tháan ná inuu̱, jamí niꞌthúu̱n:

—Á ma̱tha̱ne̱ gámba̱a̱ꞌ tsí májáan ga̱jma̱á tsí ra̱májáan mangaa rá. 24 Gáꞌne xí júwa̱ꞌ a̱jma̱ skíñú gu̱wi̱inꞌ (50) xa̱bo̱ tsí májíin ná awúun xuajen. Á ma̱tha̱ne̱ gámba̱a̱ꞌ ne̱ rá. Á ma̱xátha̱ne̱-lá mba̱a̱ a̱kia̱a̱nꞌ xtayáá xuajen, numuu rí nañáwíin a̱kia̱a̱nꞌ xtañúú tsí a̱jma̱ skíñú gu̱wi̱inꞌ rá. 25 Ra̱jáꞌyoo rí ma̱tha̱ne̱ xkuaꞌnii, rí ma̱ja̱ñúu tsí májáan ga̱jma̱á tsí ra̱májáan, jamí ikhaa máꞌ gágu̱míi̱ ná-a̱jmi̱i̱. Ninguánáá ma̱tha̱ne̱ rí xkuaꞌnii ján. Ikháán tsáán naraꞌdáá awan numuu mbá xúgíí numba̱a̱, á ra̱ꞌkhá ma̱tra̱jua̱ꞌ jmbu ján rá dxe̱ꞌ.

26 A̱ꞌkhue̱n rí Ana̱ꞌlóꞌ Mikhuíí niriꞌña̱a̱:

—Xí ná xuajen Sodóma̱ ma̱xkamii a̱jma̱ skíñú gu̱wi̱inꞌ (50) tsí májíin, ma̱ne̱ mba̱a̱ a̱kui̱nꞌ ja̱yo̱o̱ mbá xúgíí xuajen, numuu rí nañáwíin a̱kui̱nꞌ ja̱ñúu̱.

27 A̱ꞌkhue̱n Abraám niꞌthán:

—Athane̱ mba̱a̱ a̱kia̱a̱nꞌ rí ma̱tha̱a̱nꞌ xóó, Táta̱ Mikhuíí, maske xóo yujnda̱ꞌ jamí idi-madi jaꞌñúúlo̱ꞌ. 28 Gáꞌne xí mba̱ꞌñúú witsuun awúun tsí a̱jma̱ skíñú gu̱wi̱inꞌ tsí májíin rá. Á ma̱tha̱ne̱ gámba̱a̱ꞌ xúgíí xuajen ga̱jma̱á numúú tsí witsuun ndaꞌñúú rá.

A̱ꞌkhue̱n Ana̱ꞌlóꞌ niriꞌña̱a̱:

—Ma̱xáne̱ gámba̱a̱ xí ma̱xkamii tsí a̱jma̱ skíñú witsuun (45).

29 Niꞌthán mbu̱júu Abraám:

—Gáꞌne xí júwa̱ꞌ a̱jma̱ skíñúu̱ (40) rá.

Xómáꞌ Ana̱ꞌlóꞌ niriꞌña̱a̱:

—Ma̱xáne̱ gámba̱a̱-málo̱ꞌ, numuu rí nañáwíin a̱kui̱nꞌ ja̱ñúú tsí a̱jma̱ skíñúu (40).

30 A̱ꞌkhue̱n niꞌthán Abraám:

—Ma̱xájiꞌnáá-lá, Táta̱ Mikhuíí, rí ma̱tha̱a̱nꞌ xóó. Gáꞌne xí júwa̱ꞌ ikhín mbá skíñú gu̱wi̱inꞌ (30) rá.

Xómáꞌ Ana̱ꞌlóꞌ niriꞌña̱a̱:

—Ma̱xáne̱ gámba̱a̱-málo̱ꞌ xí ma̱xkamii tsí mbá skíñú gu̱wi̱inꞌ.

31 Xómáꞌ Abraám niꞌthán:

—Athane̱ mba̱a̱ a̱kia̱a̱nꞌ, Táta̱ Mikhuíí, rí ma̱tha̱a̱nꞌ xóó. Gáꞌne xí júwa̱ꞌ i̱ndo̱ó mbá skíñúu (20) rá.

—Ma̱xáne̱ gámba̱a̱ numuu rí nañáwíin a̱kui̱nꞌ ja̱ñúú tsí mbá skíñúu —niriꞌña̱a̱ Ana̱ꞌlóꞌ.

32 A̱ꞌkhue̱n niꞌthán xóó Abraám:

—Ma̱xájiꞌnáá-lá, Táta̱ Mikhuíí, rí i̱mbo̱ó máꞌ gátha̱a̱nꞌ. Gáꞌne xí júwa̱ꞌ mbá gu̱wi̱inꞌ rá.

—Ma̱xáne̱ gámba̱a̱ numuu rí nañáwíin a̱kui̱nꞌ ja̱ñúú tsí mbá gu̱wi̱inꞌ —niriꞌña̱a̱ Ana̱ꞌlóꞌ.

33 A̱ꞌkhue̱n rí Ana̱ꞌlóꞌ Mikhuíí ni̱ka̱a̱, ído̱ rí wámbo̱o̱ nindxákuu̱n ga̱jmáa̱ Abraám. Xúꞌkhue̱n máꞌ Abraám nitanga̱a̱ ná xtáa.