18 A̱ꞌkhue̱n niꞌthán Ana̱ꞌlóꞌ Mikhuíí: «Ra̱máján ma̱xtáa xa̱biya̱ mbáwíi. Ma̱ni̱i̱ mbáa tsí phú jaꞌyoo rí mitambáyíi̱ gáꞌne». 19 Ana̱ꞌlóꞌ Mikhuíí niꞌnii mbá xúgíin xu̱kú ga̱jma̱á ju̱ba̱ꞌ, xúꞌkhue̱n máꞌ xúgíin ño̱ꞌo̱n mangiin. A̱ꞌkhue̱n rí ni̱ꞌkha̱ jagu̱u̱n xúgíin xu̱kú inuu Adán ikhaa jngó mba̱ꞌyoo̱ xáne gáxnée̱ mbiꞌyuu mbámbáa. Rí mbiꞌyuu mbámbáa xu̱kú rí nixná Adán, ikhaa máꞌ ñajuun mbiꞌñúu̱. 20 A̱ꞌkhue̱n rí Adán nixnúu mbiꞌyuu mbámbáa xu̱kú kiraꞌda jamí xu̱kú-xáná, xúꞌkhue̱n máꞌ ño̱ꞌo̱n mangiin. I̱ndo̱ó numuu rí na̱nguá nikujmaa tsí mitambáyíí Adán gáꞌne xóo rí phú jaꞌyoo.
21 A̱ꞌkhue̱n rí Ana̱ꞌlóꞌ Mikhuíí neꞌne rí mi̱gu me̱do̱ mi̱ndaꞌkho Adán. Awúun rí niꞌguii̱, a̱ꞌkhue̱n niríye̱e̱ꞌ mbá itso̱ xo̱xto̱o̱, xúꞌkhue̱n máꞌ nirugua̱a̱ ná niríye̱e̱ꞌ itso̱. 22 Itso̱ xo̱xto̱o̱ xa̱biya̱ rí niríya̱ꞌ Ana̱ꞌlóꞌ Mikhuíí, ikhaa ne̱ niꞌnii̱ mbáa a̱ꞌgo̱, jamí ni̱ꞌkha̱ jayáa̱ inuu xa̱biya̱. 23 A̱ꞌkhue̱n niꞌthán Adán: «Tsíge̱ꞌ tsí phú gakon rí ikhaa xuyu̱ꞌ ñajuun rá, jamí ikhaa máꞌ itsu̱ꞌ ñajuu̱n. Ma̱ꞌne mbiꞌyuu̱ "a̱ꞌgo̱", numuu rí nigájnuu̱ ná xo̱xto̱o̱ xa̱biya̱».2.23 Ná ajngáa ebréo̱, ajngáa «a̱ꞌgo̱» nawán xó iwán wáa ajngáa «xa̱biya̱».
24 Ikhaa jngó xa̱biya̱ naniñuu anu̱u̱ jamí ru̱dúu rí ma̱mba̱xúu̱ ga̱jmáa̱ a̱ꞌgui̱i̱, jamí naꞌni̱i̱ i̱mba̱wíi xa̱bo̱ ñajúu̱n.
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)