1 Xómáꞌ a̱bo̱ꞌ rá, i̱tha̱n wiphii rí ma̱ꞌne nduwa xóo rí iꞌwíin xu̱kú-xáná tsí niꞌnii Ana̱ꞌlóꞌ Mikhuíí, ikhaa jngó niraxu̱u̱ a̱ꞌgo̱:

—Á gakon rí Ana̱ꞌlóꞌ niꞌthánlaꞌ rí ma̱xópholaꞌ asndo nimbá xndúu ixe̱ mbaa mitsaan rá dxe̱ꞌ.

2 A̱ꞌkhue̱n rí a̱ꞌgo̱ niriꞌñuu a̱bo̱ꞌ:

—Ma̱goo máꞌ mo̱phóxo̱ꞌ asndo náá máꞌ xndúu ixe̱. 3 I̱ndo̱ó ixe̱ rí wéje̱ ná ti̱kua̱pho̱o̱ mbaa, Ana̱ꞌlóꞌ niꞌthán rí ma̱xóphóxo̱ꞌ ni ma̱xáru̱gua̱xo̱ꞌ xndúu ne̱, ra̱ꞌkhá ma̱ja̱ñáxo̱ꞌ.

4 A̱ꞌkhue̱n rí a̱bo̱ꞌ niꞌthúun a̱ꞌgo̱:

—Ra̱gákon rí ma̱ja̱ñálaꞌ gáꞌne ne̱. 5 Ana̱ꞌlóꞌ phú ndaꞌyoo mújúun mbiꞌi rí mo̱pholaꞌ xndúu ixe̱ rúꞌkhue̱n ma̱ma̱ꞌthoo idalaꞌ, jamí ma̱nindxa̱ꞌlaꞌ asndo xóo Ana̱ꞌlóꞌ, numuu rí mo̱ne̱-núwíinlaꞌ rí máján jamí rí ra̱máján.

6 A̱ꞌkhue̱n a̱ꞌgo̱ niyaxu̱u̱ xndúu ixe̱ rí phú máján ndasko̱ꞌ rí mi̱khui̱i̱ ne̱, xúꞌkhue̱n máꞌ phú mitsaan jaꞌnii ne̱, jamí phú máján ma̱froꞌoo̱ gáꞌne ne̱ iꞌyoo̱. A̱ꞌkhue̱n rí niríguíi̱ xndúu ixe̱ niꞌkhui̱i̱, jamí nixnúu̱ a̱jmbaa̱ niꞌkho̱ mangaa. 7 A̱ꞌkhue̱n rí ni̱ma̱ꞌthoo idúu̱n ndiyáa̱ ná-a̱jmi̱i̱ rí tsaꞌtsii̱n, ikhaa jngó nixmíi̱ inúu ixe̱ rí mbiꞌyuu ígo̱, rí muruguáa̱ xuñúu̱.

8 Ído̱ na̱ꞌkha̱-raxa rí wakhíí, xa̱biya̱ ga̱jma̱á a̱ꞌgui̱i̱ nidxawíín rí nawán na̱ka̱-ranújngoo Ana̱ꞌlóꞌ Mikhuíí awúun mbaa mitsaan. A̱ꞌkhue̱n rí ni̱rka̱ꞌo-mi̱jne̱e̱ inuu Ana̱ꞌlóꞌ ná awúun ixe̱ mbaa mitsaan. 9 A̱ꞌkhue̱n rí Ana̱ꞌlóꞌ Mikhuíí niꞌthúun xa̱biya̱:

—Náá xtaa rá.

10 A̱ꞌkhue̱n xa̱biya̱ niriꞌña̱a̱:

—Ni̱dxawuun rí nawán nguaꞌáanꞌ ná mbaa, jamí phú nimíñu̱ꞌ. Numuu rí tsaꞌtsúún, ikhaa jngó ni̱rka̱ꞌo-mina̱ꞌ.

11 A̱ꞌkhue̱n Ana̱ꞌlóꞌ niraxu̱u̱:

—Tsáa niꞌtháanꞌ rí tsaꞌtsáán ján róꞌ. Á nitso xndúu ixe̱ rí ni̱tha̱a̱nꞌ rí ma̱xéꞌtso jngó.

12 Xómáꞌ xa̱biya̱ niriꞌña̱a̱:

—A̱ꞌgo̱ tsí niraxníꞌ ma̱ꞌne a̱ꞌgui̱ꞌ, ikhaa̱ nixníꞌ xndúu ixe̱, nikho.

13 A̱ꞌkhue̱n rí Ana̱ꞌlóꞌ Mikhuíí niraxu̱u̱ a̱ꞌgo̱:

—Díne ñajuun rí nithane̱ ján róꞌ.

Xómáꞌ a̱ꞌgo̱ niriꞌña̱a̱:

—Ikhaa a̱bo̱ꞌ neꞌne-nduwúún, ikhaa jngó nikho ne̱.

14 A̱ꞌkhue̱n Ana̱ꞌlóꞌ Mikhuíí niꞌthúun a̱bo̱ꞌ:

—Numuu rí xáꞌnii nithane̱, kixná-maꞌáán inúú mbá xúgíin xu̱kú kiraꞌdiin, xu̱kú-xáná. Ikhaa jngó xúge̱ꞌ rá, awáanꞌ ma̱tha̱xma̱thá-mina̱ꞌ rí ma̱ngriga̱a̱ꞌ ga̱jma̱á, jamí yujnda̱ꞌ me̱ꞌtso mbá xúgíí mbiꞌi rí ma̱ra̱xtaa. 15 Ma̱ne̱ rí ikháán ga̱jma̱a̱ꞌ a̱ꞌgo̱ mu̱ꞌgua-rajuwalaꞌ sia̱nꞌ, xúꞌkhue̱n máꞌ ri̱jia̱a̱ꞌ ga̱jma̱á ri̱jiu̱u̱ꞌ a̱ꞌgo̱. Xa̱bo̱ ri̱jiu̱u̱ꞌ a̱ꞌgo̱ ma̱ꞌne̱-jámbi̱yu̱u̱ꞌ idxa̱a̱ꞌ, xómáꞌ ikháán ma̱ki̱jmáá me̱ꞌtso xtuun nakhúu̱.

16 Xómáꞌ a̱ꞌgo̱ niꞌthúu̱n:

—Ma̱ne̱ rí phú ma̱tha̱míni̱í rí mi̱da-éda, jamí ga̱jma̱á gaꞌkho̱ ma̱tha̱ne̱ xuajiin. Ma̱ꞌne máꞌ a̱kia̱a̱nꞌ xtayáá a̱jmbiaaꞌ, xómáꞌ ikhaa̱ maꞌthán-ñájuaa̱nꞌ.

17 Xómáꞌ xa̱biya̱ niꞌthúu̱n:

—Numuu rí ninimba̱a̱ꞌ rí niꞌtháanꞌ a̱ꞌgia̱a̱ꞌ, nitso xndúu ixe̱ rí ni̱tha̱a̱nꞌ ma̱xéꞌtso, ikhaa jngó xúge̱ꞌ rá, ga̱jma̱á numaaꞌ ma̱ꞌne kixná-maꞌáan ju̱ba̱ꞌ. Ma̱tha̱míni̱í, ma̱tiajun mi̱ndaꞌkho inuu ne̱ rí ma̱kujmaa rí me̱ꞌtso mbá xúgíí mbiꞌi rí ma̱ra̱xtaa. 18 Xómáꞌ inuu ju̱ba̱ꞌ mba̱ꞌya tsuwan jamí rí gíꞌdoo máꞌ ríꞌná, xúꞌkhue̱n máꞌ me̱ꞌtso ya̱ꞌo̱ rí ríga̱ xanáá. 19 Ga̱jma̱á iya gigaaꞌ ma̱tiajun rí ma̱tseꞌtso, asndo náá gáꞌni̱i̱ ju̱ba̱ꞌ ñajuaanꞌ. Numuu rí yujnda̱ꞌ ni̱gu̱máá ga̱jma̱á, jamí ikhaa máꞌ gáꞌni̱i̱ ñajuaanꞌ mbu̱jú.

20 A̱ꞌkhue̱n rí Adán niꞌthán rí Éba̱* gáꞌne mbiꞌyuu a̱ꞌgui̱i̱, numuu rí ikhaa̱ ñajuun ru̱dúún mbá xúgíin xa̱bo̱ tsí nduya. 21 Xómáꞌ Ana̱ꞌlóꞌ Mikhuíí neꞌne xtíñúu̱ ga̱jma̱á xtúún xu̱kú, rí majúwuun xa̱biya̱ ga̱jma̱á a̱ꞌgui̱i̱.

22 A̱ꞌkhue̱n niꞌthán Ana̱ꞌlóꞌ Mikhuíí: «Rí xúge̱ꞌ xa̱bo̱ numbaa nanindxu̱u̱ asndo xó rí ikháánlóꞌ, ndaꞌyoo̱ rí máján jamí rí ra̱máján. Jngó xúge̱ꞌ rá, ra̱máján rí maríguíi̱ mi̱khui̱i̱ mangaa xndúu ixe̱ rí naꞌne ma̱ju̱wá xa̱bo̱, xúꞌkhue̱n máꞌ ma̱xtáa̱ mbá jámuu». Niríya̱a̱ꞌ Ana̱ꞌlóꞌ xa̱bo̱ ná mbaa mitsaan.

23 A̱ꞌkhue̱n Ana̱ꞌlóꞌ Mikhuíí niríya̱a̱ꞌ xa̱bo̱ ná mbaa mitsaan ná Edén, jngó mañajuii̱n inuu ju̱ba̱ꞌ rí ni̱gu̱maa̱ ga̱jma̱á. 24 Ído̱ waxkriya̱a̱ꞌ xa̱bo̱ rixa̱á, Ana̱ꞌlóꞌ nitsuájuun tsí mu̱ña̱wa̱án mbiꞌñúú kerubín, ná na̱ꞌkha̱ a̱kha̱ꞌ inuu mbaa ixe̱ mitsaan. Ikhín máꞌ nitsijii̱ mbá chíde̱ rí jayá aguu jamí natuaꞌán-mina̱ꞌ mbá xúgíí, rí marogoo jambo̱o̱ ixe̱ rí naꞌne ma̱ju̱wá jámuu xa̱bo̱.