Gênesis 45

José iꞌthán tsáa phú ñajuun

1 A̱ꞌkhue̱n rí José ná-táꞌngo̱o̱ gáꞌne gakhe̱ a̱kui̱i̱n inúú mbá xúgíin xa̱bo̱ tsí nuñajun inuu̱. A̱ꞌkhue̱n mbá gakhe̱ niꞌthée̱n: «A̱ga̱jnúú mbá xúgíin xa̱bo̱ tsí kachúún ge̱e̱». A̱ꞌkhue̱n rí nimbáa máꞌ yumbáá ná-táwanúu inuu̱ ído̱ rí ikhaa̱ niꞌnii̱ rí ma̱gu̱ma-nuwii̱n inúú a̱ngui̱i̱n. 2 A̱ꞌkhue̱n rí phú gakhe̱ ni̱mbi̱ye̱e̱ꞌ, rí asndo nidxawíín mbo̱ Ejípto̱, xúꞌkhue̱n máꞌ ni̱ga̱nú ajngáa asndo ná goꞌóo Faraón*45.2 «Faraón» nuxnáá mbiꞌyuu thúngaa mba̱a̱ ná Ejípto̱. mangaa. 3 A̱ꞌkhue̱n José niꞌthúún dxíyo̱o̱:

—Ikhúúnꞌ ñaju̱nꞌ José. Á xtáa xóó anu̱ꞌ rá dxe̱ꞌ.

Xómáꞌ dxíyo̱o̱ táma̱ñúú rí mu̱riꞌña̱a̱, numuu rí ni̱ka̱ a̱kuíi̱n inuu José. 4 A̱ꞌkhue̱n José niꞌthúu̱n:

—A̱gu̱xu̱ꞌma-mi̱jna̱laꞌ tháan ná inu̱ꞌ ge̱e̱.

Xómáꞌ ikhii̱n ni̱xu̱ꞌma-mi̱jne̱e̱. A̱ꞌkhue̱n ikhaa̱ niꞌthúu̱n:

—Ikhúúnꞌ ñaju̱nꞌ José, ge̱ꞌthia̱ꞌlaꞌ tsí ni̱ngu̱jua̱a̱laꞌ ma̱ꞌga Ejípto̱. 5 Ikhaa jngó xúge̱ꞌ rá, ma̱xájuwalaꞌ gaꞌkho̱, ni máꞌ ma̱xájiꞌná ju̱ya̱-mi̱jna̱laꞌ rí ni̱ngu̱júúnlaꞌ rí ma̱ꞌkha ge̱jioꞌ. Numuu rí Ana̱ꞌ-málóꞌ nixuꞌmúú wapha ginúú ná inalaꞌ, jngó ma̱goo ma̱jáwíin xa̱bo̱. 6 Tiriajma̱ máꞌ tsigu eꞌne rí ri̱ga̱ ewe inuu numbaa, jamí xóó ndaꞌyóo i̱mba̱á witsu tsigu rí ma̱xáríga̱ gidu ni máꞌ rí ma̱gi̱xi̱i̱. 7 Ikhaa jngó Ana̱ꞌlóꞌ nixuꞌmúú wapha máꞌ ginúú ná inalaꞌ, rí ma̱xámba̱a̱ ri̱jia̱ꞌlaꞌ ná inuu numbaa, jamí ma̱jáwia̱nꞌlaꞌ ga̱jma̱á rí wáá rí naꞌne Ana̱ꞌlóꞌ. 8 Rúꞌkhue̱n jngó Ana̱ꞌlóꞌ ñajuun tsí nixuꞌmúú rí ma̱ꞌkhalo̱ꞌ ge̱jioꞌ, ra̱ꞌkhá ikháa̱nꞌlaꞌ ne̱ne̱. Ikhaa̱ niꞌgiúu̱n rí ma̱nindxu̱ꞌ asndo xóo anu̱u̱ Faraón, jamí tsí na̱ru̱thuun xúgíí ñajun ná goꞌóo̱, xúꞌkhue̱n máꞌ niꞌgiúu̱n rí ma̱nindxu̱ꞌ thúngaa mbá xúgíí ná mbayuu Ejípto̱.

9 »Mbá nacha̱ máꞌ góne̱laꞌ, jamí aꞌgua̱a̱ꞌlaꞌ ná xtáa anu̱ꞌ, xúꞌkhue̱n máꞌ a̱gu̱tháa̱nlaꞌ: "Xáꞌnii iꞌthán a̱ꞌdeáaꞌ José: ‘Ana̱ꞌlóꞌ niꞌgiúún rí ma̱nindxu̱ꞌ thúngaa ná Ejípto̱. Aya̱ gátha̱yo̱ꞌ, ma̱xátha̱ne̱ gajíí-mina̱ꞌ-lá. 10 A̱ꞌkhue̱n rí ma̱ra̱xtaa ná mbaa Gosén, mijngi máꞌ ná inu̱ꞌ gára̱xtaa. Mi̱dxa̱ꞌ ikháán jamí i̱jia̱a̱nꞌ, jamí i̱jín-xíñaaꞌ máꞌ, xúꞌkhue̱n máꞌ xu̱kiáaꞌ tsí xtaꞌdiin, jamí xúgíí rí xtaꞌdáá. 11 Jamí ikhúúnꞌ máꞌ gáxna̱a̱ꞌ rí me̱ꞌtso, numuu rí xóó ma̱ri̱gá ewe i̱mba̱á witsu tsigu. Ikhaa jngó ma̱xámbáa̱nꞌlaꞌ awúun tsingíná ikháán jamí xa̱bia̱a̱ꞌ, xúꞌkhue̱n máꞌ mbá xúgíí rí xtaꞌdáá.’ " 12 Rí xúge̱ꞌ rá, inalaꞌ eꞌne jamí inuu máꞌ ge̱ꞌthe̱ꞌ Benjamín, rí ajngáa rawu̱nꞌ jmínu̱ú ñajuun rí na̱tha̱nꞌlaꞌ. 13 A̱gu̱tháánlaꞌ anu̱ꞌ mbá xúgíí xóo i̱tha̱n-nájun ikhúúnꞌ ná numbaa Ejípto̱, jamí mbá xúgíí rí ndi̱ya̱álaꞌ. Mbá nacha̱ máꞌ gágúne̱laꞌ, jamí a̱guwalaꞌ ju̱ya̱a̱ anu̱ꞌ ge̱jioꞌ.

14 A̱ꞌkhue̱n rí José ndiyá-raꞌaa̱ ge̱ꞌthe̱e̱, jamí ni̱mbi̱ye̱e̱ꞌ. Ikhaa máꞌ neꞌne Benjamín, jamí ni̱mbi̱ye̱e̱ꞌ ga̱jmáa̱. 15 Mangaa máꞌ niraꞌnuu̱ inúú mbá xúgíin a̱ngui̱i̱n, jamí ni̱mbi̱ye̱e̱ꞌ gajmíi̱. Asndo a̱ꞌkhue̱n rí nithan wáa a̱ngui̱i̱n ga̱jma̱á nindxu̱u̱.

16 A̱ꞌkhue̱n ni̱ga̱nú ajngáa ríge̱ꞌ asndo ná goꞌóo Faraón rí niguáꞌnú a̱ngui̱i̱n José. Nidxuun a̱kui̱i̱n Faraón jamí xúꞌkhue̱n máꞌ mangiin xa̱bo̱ ñajun drígo̱o̱. 17 A̱ꞌkhue̱n Faraón niꞌthúun José: «Arathúún dxíya̱a̱ꞌ: "A̱go̱ne̱laꞌ ríge̱ꞌ, a̱gu̱yaꞌdúúnlaꞌ xu̱kiálaꞌ, jamí a̱tangáa̱nꞌlaꞌ mu̱ꞌguaa̱ꞌlaꞌ ná mbaa Kanaán. 18 A̱guwa-ju̱ya̱a̱ ana̱ꞌlaꞌ jamí xúꞌkhue̱n máꞌ xa̱bia̱ꞌlaꞌ, a̱guwalaꞌ ge̱jioꞌ. Numuu rí ikhúúnꞌ ma̱xna̱ꞌlaꞌ mbaa rí i̱tha̱n máján rí ríga̱ ná numbaa Ejípto̱, jamí mo̱pholaꞌ mbá xúgíí rí najma̱a̱ máꞌ ná inuu mbaa ge̱e̱".

19 »Jamí araxná-ñájúu̱n dxíya̱a̱ꞌ: "A̱go̱ne̱laꞌ ríge̱ꞌ, aꞌgua-ju̱ya̱ꞌlaꞌ ixe̱ rí naxmáthaa guáyo̱ rí ríga̱ ná Ejípto̱, jngó ma̱guwá i̱jia̱nꞌlaꞌ awúun ne̱, xúꞌkhue̱n gu̱ꞌya̱ꞌlaꞌ. Xúꞌkhue̱n máꞌ a̱guwa-ju̱ya̱a̱ ana̱ꞌlaꞌ mangaa. 20 Ma̱xáꞌthúun a̱kia̱nꞌlaꞌ numuu dríga̱ꞌlaꞌ, numuu rí xúgíí rí i̱tha̱n máján rí ríga̱ ná mbaa Ejípto̱ ma̱ꞌne máꞌ dríga̱ꞌlaꞌ"».

21 Xkuaꞌnii nene̱ i̱ji̱i̱n Israél. Xómáꞌ José nixnúu̱ ixe̱ rí nu̱xma̱thaa guáyo̱, xómá nixná-ñájun Faraón, xúꞌkhue̱n máꞌ nixnúu̱ ganitsu rí mu̱phi̱i̱ ná jamba̱á mangaa. 22 Mbámbáa̱ rí mbá xúgíi̱n nixnúu̱ mbámbá xa̱bi̱i̱ xtíin, xómáꞌ Benjamín nixnúu̱ mbá atsú siénto̱ mbúkha̱a̱ ajua̱nꞌ rí miꞌxá, jamí mbá witsu xa̱bi̱i̱ xtíin. 23 Xómáꞌ inuu anu̱u̱ nixuꞌmee̱ ríge̱ꞌ: mbá gu̱wi̱inꞌ xtá-ngidi tsí jmba̱ꞌo̱ juda rí i̱tha̱n máján rí ríga̱ ná Ejípto̱, jamí mbá gu̱wi̱inꞌ xtá-ngidi tsí iꞌgú juda ixí iña, xúꞌkhue̱n máꞌ wopho jamí iꞌwá inii ganitsu rí me̱kho̱ anu̱u̱ ná jamba̱á. 24 A̱ꞌkhue̱n rí José niꞌthán-ngawúún a̱ngui̱i̱n, jamí niꞌthúu̱n: «Ma̱xúꞌgua̱a̱ꞌ-lálaꞌ ra̱tsa̱ña̱ꞌlaꞌ ná jamba̱á».

25 A̱ꞌkhue̱n rí nigájnáa̱ ná Ejípto̱, jamí niguáꞌnúu̱ ná mbaa Kanaán, ná xtáa máꞌ anúu̱. 26 A̱ꞌkhue̱n nitháa̱n ajngáa nuxe̱ꞌ: «Xtáa-lá xóó José ndaꞌya. Ikhaa̱ iꞌthán-nájuun mbá xúgíí mbaa Ejípto̱». Xómáꞌ Jakób mbá ni̱ka̱ a̱kui̱i̱n, numuu rí tsínembo̱o̱ꞌ rí nitháa̱n. 27 Xómáꞌ ikhii̱n nitháa̱n mbá xúgíí ajngáa rí xóo niꞌthán José. Jamí ído̱ ndiꞌyoo Jakób ixe̱ rí kixmáthaa rí nixuꞌma José rí ma̱ꞌgee̱ ga̱jma̱á, a̱ꞌkhue̱n phú neꞌne gagi̱i̱ a̱kui̱i̱n. 28 A̱ꞌkhue̱n niꞌthán Israél: «¡Máján, naꞌne jañii a̱kui̱nꞌ máꞌ! ¡A̱ꞌdéꞌ José xtáa ndaꞌya xóó! Ma̱ꞌgá gáyu̱u̱lo̱ꞌ rí inu máꞌ ma̱ja̱ñúꞌ».