1 Wunuuwu ni muhanda manduhi ma bakaaha ba Yisu Kristo, mwana a Davidi, mwana a Abrahami.

2 Abrahami abuti Isaki; Yakobi aba mwana a Isaki; Yuda na baana ba taata a nde aba baana ba Yakobi. 3 Yuda abuti Farese na Zera ngu a bo aba nduhi Tamare. Farese abuti Hesromi; Hesromi abuti Arami. 4 Arami abuti Aminadabi; Aminadabi abuti Nasoni; Nasoni abuti Salama. 5 Salama abuti Booze, Rahabi aba ngu a nde. Booze abuti Obedi, Luti aba ngu a nde; Obedi abuti Yese. 6 Na Yese abuti mutumi Davidi; Davidi abuti Salomooni, ngu a nde ni mukadi a Uri. 7 Salomooni abuti Robowami; Robowami abuti Abiya; Abiya abuti Asafi. 8 Asafi abuti Yosafati; Yosafati abuti Yoraami; Yoraami abuti Ozyasi. 9 Ozyasi abuti Yotami; Yotami abuti Akazi; Akazi abuti Ezekyasi. 10 Ezekyasi abuti Manase; Manase abuti Amoni; Amoni abuti Yosyasi. 11 Yosyasi abuti Yekonya na baana ba ngu a nde; mu taangu yi bisu Babylooni baakwamisi Isereli mu uyatsahala hu tsi a Babylooni✝.

12 Hu mbisa a palili a bisu Isereli hu Babylooni, Yekonya abuti Salatyeli; Salatyeli abuti Zorobabeli. 13 Zorobabeli abuti Abyudi; Abyudi abuti Elyakimi; Elyakimi abuti Azori. 14 Azori abuti Sadoki; Sadoki abuti Akimi; Akimi abuti Elyudi. 15 Elyudi abuti Elyazari; Elyazari abuti Matani; Matani abuti Yakobi. 16 Yakobi abuti Yosefi, mulumi a Mariya. Ni mu Mariya Yisu wu bubateele Kristo hapali. 17 Mu umata Abrahami natee Davidi, hu li matuungi kuumi mana. Umata Davidi natee palili a bisu Isereli hu Babylooni, kuumi matuungi mana. Kuumi matuungi mana maavyohi umata palili a bisu Isereli hu Babylooni natee mbutili a Kristo.

18 Mono buni mbutili a Yisu Kristo yaaba. Mariya ngu a nde aba mutangula a Yosefi. Ka tswamina bo bapfuuta nzo, Mariya abahi yimi mu matwala ma Livupu la Ngidi. 19 Yosefi, mutangula a nde aba muutu nga tsiki, na a hatoondi upalisa musamu mbadi ve. Nde abahi tsimi mu utsala itwadi hya bo mu tswehi. 20 Bu nde hakatsima buuna, pofi a Pfumu ayamonehele na nde mu ndoosi, na aleeli: «Yosefi, mwana a Davidi, abata boomo mu uvolo Mariya mukadi a we ve, mu tooni ati, mu Livupu la Ngidi nde amiibaha yimi. 21 Nde sa abuta mwana wa bahala, na we sa luha nde nduhi Yisu*, ni nde ufuuhasa baatu ba nde mu masumu ma bo.»

22 Mambu mo maana moosi maatswiihi, mana ma Pfumu hayabisi mu munywa mumbihuli, mayelemene:

23 «Nuumba wu aveleyaaba babahala sa abaha yimi,

nde sa abuta mwana wa bahala,

na sa baluha nde nduhi Emanweli✝».

Mbindulili ni ti: «Nzambi li na bisu.»

24 Bu Yosefi hasuuhi, nde avaangi moosi ma pofi a Pfumu hatumi nde. Nde avoli Mariya na asiidi nde mu nzo a nde. 25 Ka Yosefi a hapfuuti taangi na nde ve, natee bu Mariya habuuti mwana wa bahala, wu Yosefi haluhi nduhi Yisu.