1 Bu Yisu haamani uva mandongisili mo maana moosi, nde aleeli huli bayihi ba nde: 2 «Benu liyaabi ti bilumbu byole bimiisaala, mu usa mukungi a Paake✝. Sa bayeholo Mwana a Muutu, mana bakomene nde ŋa kuruwa.»

3 Buuna, bakuutu ba bangu ba bangaanga na bakuutu ba Bayudaayo, baakuukimi hu litandala li mukuutu bangaanga ba Nzambi watsomi, Kayifa. 4 Bo baakuti pfuundu mu ukaanga Yisu mu tswehi, mana baduba nde. 5 Ka bo balelisini: «A luukaangaani nde mu taangu mukungi ve, kini baatu buutuumbaha.»

6 Yisu aba hu musyenge a Betanya, mu nzo a Simoni nga bwatsi. 7 Bu Yisu haaba haatsahala ŋa metse, mukaasu mumosi ayasusaha ŋa pedu a nde na itutu hya alabatere* hi hyaluula mu nyafi ya kaluha yinene. Nde apuupili nyafi mo yiina ŋa yulu mutswe a Yisu. 8 Bu bayihi baamoni buuna, bo baamoni pasi mu mutima, na baaleeli: «Ki tooni mu ubiiyasa nyafi mo yiniiyi? 9 Bakiisuumbasa yo mu talu yi yaafulala na uva mbongo mo yiina huli bapuumbu!» 10 Bu Yisu haayuhi nzambilili a bo, nde aleeli: «Nyahaani nde. Mu hima benu lili mu ukwamisa mukaasu mo wunuuwu? Ma nde amiivangila mu me, maafulala bubwe. 11 Mu tooni ati, benu luuba na bapuumbu taangu yoosi, ka uto ti me, benu a luuba na me taangu yoosi ve. 12 Nde miiteehele upuupala nyutu a me nyafi, mu uvangimasa yo mu kotili ya mu ngila. 13 Mu mbuli me ndeele benu: pasi tsyelo yi buukaayabisa Musamu wu Mubwe mu toto yoosi, buukaayambila mu mukaasu mo wunuuwu na buukaayibuhala moonyi mu ma nde amiivaanga.»

14 Buuna, Yuda Isikaryoti mumosi mu bakuumi na boole li bayihi, ayamono bakuutu ba bangaanga ba Nzambi. 15 Na nde aleeli huli bo: «Benu hima luuva me, tso me tsuumbisi benu Yisu?» Bo baataangi maku matatu ma mbongo a palata, na baaviidi nde mo✝. 16 Umata taangu mo yiina, Yuda akasaha buni nde huuyeholo bo Yisu mu taangu yi yaafwana.

17 Ilumbu hyatsomi hi mukungi wu mapa ma maaveledaana, bayihi baafuuli Yisu: «Huni we toondi ti bisu liyavangimasa we ilaambu hya Paake?» 18 Nde afutili bo: «Yenaani hu musyenge, huli bahala limosi, na leelaani lo ti mulongisi miileele: "Tangu a me yimiikuha, ni huli we me undya ilaambu hya Paake na bayihi ba me."» 19 Bayihi baasiidi bu Yisu haatumisi bo, na bo baavangimisi ilaambu hya Paake.

20 Bu tsitsaha yaatoodi, Yisu atsahili ŋa meetse na bayihi bakuumi na boole. 21 Bu bo baakadya, Yisu aleeli: «Mu mbuli me ndeele benu: mumosi mu benu sa asuumbasa me.» 22 Bayihi baasinzimono lingebe, na baabaandihi ufuula nde mumosi mumosi: «Pfumu! Ni me?» 23 Yisu afutili: «Nde wuuna wu li mu upfuuta myoho mu ikoombe na me, ni nde usuumbasa me. 24 Eye, Mwana a muutu mu ukwa ali, we bu Mabasonehe ma Ngidi mali mu uyabisa mu nde✝. Ka ki pila lingebe huli wu li mu usuumbasa Mwana a muutu! Beedi kini bubwe mu muutu mo wuuna, avelebutama hwa nde.» 25 Yuda wu akasuumbasa nde ni uleele: «Rabi! Ni me?» Yisu afutili nde: «We miileele lo.»

26 Bu bo baaba mu udya, Yisu avoli lipa. Hu mbisa ufutala matondo huli Nzambi, nde atabuli lo, na aviidi lo huli bayihi ba nde na aleeli: «Volwaani na dyaani, yiniiyi ni nyutu a me.» 27 Titswene, nde avoli mbuungu ya vinye. Hu mbisa ufutala matondo huli Nzambi, nde aviidi bo yo, na aleeli: «Nywaani yo benu boosi, 28 mu tooni ati, maniima ni makila ma me, makila ma nzuhisini a Nzambi✝. Makila ma maatsamuhi mu tooni a baatu ba balahi, mu tooni a kolo-kolo yi masumu ma bo. 29 Me ndeele benu lo, Me a umbwenywa vinye mo yiiniyi ve, natee ilumbu hi me unywa yo yi nyatihi na benu, hu Ipfumu hya Taata a me.» 30 Hu mbisa uyimba nyimbu*, bo baayeni hu isyelo hi miti mya Olive.

31 Buuna Yisu aleeli huli bayihi ba nde: «Ndulu ni butsuhu mo bunuubu benu boosi luutimba me. Mu tooni ati, Mabasonehe ma Ngidi mu baaleele: "Me tsa nduba keedi wu biboodi, na koonge mandombo sa yitsaamuha pasi tsyelo✝." 32 Ka hu mbisa a tsuuhili a me mu babaakwa, me uteehele benu hu Ngalili.» 33 Peetelo aleeli nde: «Tso bakima baana boosi batiimbi we, me a utiimba we ve.» 34 Yisu akaali nde: «Mu mbuli me ndi mu undeele we: ndulu butsuhu mo bunuubu, teehele tsusu akohele, we utuna me tunala tatu.» 35 Ka Peetelo aleeli: «Tso hili ti me kwa itwadi na we, ubila ve, me utwala utuna we ve!» Na bayihi boosi baakaleele bumosi.

36 Yisu ayidi na bayihi ba nde ŋa mbuha yi bubaateele Ngetesemani*, na nde aleeli huli bo: «Tsahalaani ŋaniiŋa, bu me ka mu dwe huuna mu uyasambila.» 37 Titswene, nde avoli Peetelo na baana ba babahala baboole ba Zebedayi, nde abaandihi umono lingebe na mangoongo.

38 Buuna, nde aleeli bo: «Mutima a me amiiluula mu lingebe mu uto natee hu ukwa. Saalaani ŋaniiŋa, na baani likanda itwadi na me.» 39 Nde ayeni mwana a lala, atsokihi hiinzi mu toto, na asambili bunuubu: «Taata a me, tso huyelimini, tahusa mbuungu yi mapasi yiniiyi lala na me. A we bu hu li litondo la me ve, ka we bu we toondi.» 40 Titswene, nde ayafutaha huli bayihi babatatu, ba nde haabiisi tolo. Nde aleeli huli Peetelo: «Benu kaahu a litwali uba likanda na me tso mu ngunga mosi ve? 41 Baani likanda na sambilaani, mana benu a libwa mu lobese. Iluunzi hili hi hyahwada, ka imuutu hili hi hyakolo.» 42 Nde abwetahuha na bo, tahuha la yoole na asambili bunuubu: «Taata a me, tso huyelimini ti mbuungu mo yiniiyi yitahuha na me, hwavele ti me nywa yo, nyaha litondo la we livangama!» 43 Nde abweyafutaha huli bayihi, na abiisi bo boosi tolo. Miisu ma bo maabeedi maaleme. 44 Nde abwesiisa bo, abwetahuha na bo na abwesambila sambila li matatu na ubaafutahala mambu ni mo mamosi. 45 Titswene, nde abweyafutaha huli bayihi ba nde na aleeli bo: «Benu likini tolo, benu uvuuma libaavuuma? Bunuubu, ngunga yimiito. Mwana a Muutu bamiiyeholo ŋa myoho mya banga masumu. 46 Telemaani, tswendaani! Monwaani muutu wu uyeholo me aka bebele!»

47 Bu Yisu haaba kini mu utoyo, Yuda, mumosi mu bakuumi na boole li bayihi, ayato. Ŋa mbisa a nde, hwaaba na koonge a baatu baakaanga basabila na bimbondi. Bakuutu ba bangaanga ba Nzambi na mikukunyungu mya buli li Bayudaayo, ni ba baatsindihi bo. 48 Yuda, wu akayeholo bo Yisu, amweesi bo iliimbu hi nde huusalila: «Muutu wu me upiva, ni nde. Kaangaani nde.» 49 Masulubete, Yuda ayasusaha ŋa pedu a Yisu na aleeli nde: «Bwehe, Rabi!» Titswene, nde avivi nde. 50 Yisu afutili nde: «Mbaahi a me, li we miiyaavaanga, vaanga lo mu mawasa.» Buuna, bana baayasusaha, baabwidi mu Yisu na baakaangi nde. 51 Mumosi mu ba baabeedi na Yisu, apalisi sabila a nde mu isupu, ateti musalili wu mukuutu bangaanga ba Nzambi, na akesi nde tswi.

52 Buuna Yisu aleeli nde: «Futala sabila a we hutso isupu hya nde. Ka boosi ba bubaasalila sabila, buukwa mu sabila. 53 We kaahu a hayaabi ve ti me utwala uvondo likumbasa huli Taata a me, na masulubete, nde utsindaha me bapofi ba balahi ba baalutahala makonge kuumi na moole ma balwani? 54 Ka buni, Mabasonehe ma Ngidi muutwala uyelemene? Mo mali mu uleele ti, ni buuna maafwana uvangama.» 55 Titswene, Yisu aleeli huli koonge a baatu: «Me kaahu ipuumbulu mbeedi, bu benu luuya na basabila na bimbondi mu uyakaanga me? Bilumbu byosi, me mbeedi atsahala mu nzo a Nzambi mu ubaalongese, benu a laakaangi me ve. 56 Ka maana moosi mali mu uvangama, mana mambu ma mimbihuli ma mali mu Mabasonehe ma Ngidi, mayelemene.» Buuna, bayihi boosi baatiimbi nde na baabati.

57 Ba baakaangi Yisu, baabiti nde huli Kayifa mukuutu bangaanga ba Nzambi, hu milongisi mi Mikele na mikukunyungu baaba baakuukama. 58 Peetelo akaduukala Yisu hu lilalala, natee hu litandala la nzo a mukuutu bangaanga ba Nzambi. Nde akoti hu litandala na atsahili itwadi na bakeedi, mu umono buni musamu haakisuka.

59 Bakuutu ba bangaanga ba Nzambi na pfuundu lituma yoosi, baakasaha imbangi, tso hi mapfuta mu Yisu, mu uva nde tsyembili yi lipfu. 60 Ka bo a baabahi imbangi ve, tso bu baatu ba balahi baatiidi bimbangi bi mapfuta mu nde✝. Ka hu tsyelele, babahala boole baayamonehele 61 na baaleeli: «Muutu mo wunuunu aleeli: "Me utwala utsala nzo a Nzambi na ubwetuunga yo mu bilumbu bitatu."» 62 Buuna, mukuutu bangaanga ba Nzambi atelimi na afuuli Yisu: «We a hali mu ukaala pasi lo ve? Lima we leeli, mu bimbangi bi baatu mo baniiba bali mu uta mu we?» 63 Ka Yisu abeedi swii. Mukuutu bangaanga ba Nzambi abwefuula nde: «Me pondi huli we mu ulaba mulabu mu nduhi a Nzambi a moonyi: We ni Masiya, Mwana a Nzambi?» 64 Yisu akaali: «We mwakulu miileele lo! Ka me ndeele benu lo: Bunuubu, benu luumono Mwana a muutu atsahala ŋa mbahala a Pungu Matwala na uya hutso mayidu ma yulu✝.» 65 Buuna mukuutu bangaanga ba Nzambi akasuli bikutu bya nde mwakulu na aleeli: «Nde miibaaya Nzambi. Bisu a lisaali na nzala bambangi ve! Benu limiiyuha nde mu utuha Nzambi. 66 Benu buni lili mu utsima?» Bo baakaali: «Nde li na tooni, na baafwana uduba nde✝.» 67 Titswene, bo baatuuli nde maate mu mbalanga na baateti nde makome. Bamosi baateti nde mapali✝ 68 na ubaaleele: «Bihula, we wu li Kristo, leele bisu na miitete we!»

69 Peetelo aba atsahala hu mbadi ŋa litandala. Musalili mumosi wu mukaasu ayidi ŋa pedu a nde na aleeli nde: «We kaka, we beedi na Yisu musi Ngalili.» 70 Ka Peetelo atuni ŋa kuungi la baatu na aleeli: «Me a hanzaabi li we li mu ukana uleele ve.» 71 Titswene nde ayeni hu tsyelo munywa a litandala. Musalili mukima wu mukaasu amoni nde na aleeli huli ba baaba ŋaana: «Nde wunuuwu beedi itwadi na Yisu musi Nazareti.» 72 Na Peetelo abwetuna mu mulabu na aleeli: «Me a hanzaabi hwa me muutu mo wunuuwu ve.»

73 Hu mbisa a mwana a taangu hoole, baatu ba baabeedi ŋaana baayasusaha ŋa pedu a Peetelo na baaleeli nde: «Ni mbuli, we li mumosi mu baatu mo baana, mu tooni ati bitoyili bya we bili mu umweese huni we amata.» 74 Buuna Peetelo ufulihi: «Nyaha Nzambi asyembe me tso me ndi mu upfuta! Mu mbuli a Nzambi, me a hanzaabi muutu mo wunuuwu ve!» Masulubete, tsusu akohili, 75 na Peetelo ayibuhili moonyi mu mambu ma Yisu haaleeli nde: «Tswamina tsusu akohele, we utuna me tunala tatu.» Peetelo apali na atudili nzwenge.