1 Titswene, Livupu la Nzambi laabiti Yisu hu kumu a nzala, mana mukuyi alobese nde. 2 Hu mbisa udya ikaandi mu maku mana ma bilumbu bya nyangu na maku mana ma bilumbu bi butsuhu, Yisu amoni nzala. 3 Mukuyi, mulobisi, ayasusaha ŋa pedu a nde, na aleeli: «Tso we li Mwana a Nzambi, tuma mamanya mo maniima makituha mapa.» 4 Ka Yisu afutili: «Baasonehe: "Muutu a huubaha moonyi ndulu mu mapa ve, ka mu mambu moosi ma mu baapala mu munywa a Nzambi✝."» 5 Mukuyi abiti Yisu hu Yeruselemi, musyenge a ngidi, asuusi nde ŋa yulu mubundu a nzo a Nzambi, 6 na aleeli: «Tso we li Mwana a Nzambi, dumaha na bwa, mu tooni ati baasonehe:

"Nzambi utuma bapofi ba nde mu usyele we.

Bo buuyaka we mu myoho mya bo,

mana hulu hwa we a hukubaana manya✝."»

7 Yisu afutili nde: «Baasonehe kaka mu libuuku la Nzambi ti: "A lobese Pfumu Nzambi a we ve✝."»

8 Mukuyi abwebita nde ŋa yulu isyelo hi mutaabu, amweesi nde bipfumu bya tsi byosi na muyusu a byo, 9 na aleeli nde: «Me tsa pa we biniibi byosi, tso we kongimini ŋa busu bwa me mu ukuunda me.» 10 Yisu afutili nde: «Saatana, matila me! Mu tooni ati baasonehe: "We afwana ukuunda na usalila ndulu Pfumu Nzambi a we✝."» 11 Titswene, mukuyi ni usiisa nde. Na bapofi baayidi mu ukumbasa nde.

12 Bu Yisu haayuhi ti bamiikotese Yowani mu kondaayi, nde ayeni hu Ngalili. 13 Nde amati hu Nazareti, ni uyatsahala hu Kapernahumi, musyenge wa mu muvanga a dyanga la Ngalili hu itaanzi hya Zabuloni na Nafetali*, 14 mana mambu ma mumbihuli Esaya haabihuli mayelemene:

15 «Tsi a Zabuloni na tsi a Nafetali,

benu ba lili bebele na mubu,

hu simu lina la Yolodani,

Ngalili, itaanzi hya ba baavele Bayudaayo!

16 Baatu ba bali hutso a piipidi,

sa bamono liyalala li linene!

Mu ba bali mu utsahala mu tsi a posi yi lipfu,

liyalala sa liyalusa✝!»

17 Umata taangu mo yiina, Yisu abaandihi uyabisa na ubaaleele: «Sobwaani mbiili, mu tooni ati Ipfumu hi mayulu hyaaka bebele!»

18 Yisu akataangila simu la dyanga la Ngalili. Nde amoni baana ba ngu boole, Simoni nga kuumbu Peetelo na Andele, mwana a ngu a nde. Bo baaba mu ubwaha lihi mu dyanga, mu tooni ati, bo aba balobi. 19 Yisu aleeli bo: «Yaduukalaani me, me tsa kitusa benu balobi ba baatu.» 20 Masulubete, bo batiimbi malihi ma bo, na baaduukili nde. 21 Bu Yisu haasusihi mwana a lala, nde amoni baana ba ngu boole bakima, Yaki na Yowani, baana ba Zebedayi. Bo aba mu uloondo malihi ma bo mutso a luungu na taata a bo Zebedayi. Na Yisu ateeli bo. 22 Masulubete, bo baasiisi na luungu, napa taata a bo, titswene bo baaduukili nde.

23 Yisu akataangila tsi a Ngalili yoosi, nde akalongese mu manzo ma lisambulu ma Bayudaayo. Nde akayabisa Musamu wu Mubwe wu Ipfumu hi mayulu, na nde akabeeloso mabeedu moosi ma baatu na bipiha bya bo byosi. 24 Lidumu la Yisu laatsamuhi mu itaanzi hya Siriya hyoosi, na baatu baakabehele nde ba baaba na mabeedu na makenene ma pila mu pila. Banga matengo, banga mapuha, bikata, nde akabeeloso bo. 25 Makonge ma manene ma baatu maaduukili nde. Bo baakamata hu Ngalili, hu itaanzi hya Dekapoli, hu musyenge a Yeruselemi, hu tsi a Yude, na hu simu lina la Yolodani.