1 Bu Yisu hamani ulongese, nde amati hu Ngalili, na ayeni hu tsi a Yude yi yili hu simu lina la Yolodani. 2 Koonge a baatu yaakaduukala nde, na nde abeelusi babeedu. 3 Kabu li Bafarisi baayidi huli Yisu mu utehele nde mweto na baafuuli nde: «Baava muswa huli mulumi mu ubinga mukadi a nde mu pasi tooni?» 4 Yisu afutili: «Benu kini a laataanga mambu ma baasonehe mu Libuuku ve ti "ŋa mbandu, Nzambi avangi bahala na mukaasu", 5 titswene nde aleeli: "Ni mu buuna bahala sa lisiisa taata a nde na ngu a nde, na ukangama na mukadi a nde, bo baboole sa bakituha Nyutu mosi✝". 6 Ni mu buuna, bo a basaali boole ve, ka ndulu nyutu mosi. Ni mu buuna, muutu aveletahula ba Nzambi hamiipfuuta.» 7 Bafarisi baafuuli nde: «Ka mu hima Moose haviidi muswa huli bahala mu uva muhanda a ndubili makwele huli mukadi a nde, bu nde amibinga mukadi✝?» 8 Yisu afutili bo: «Moose haviidi benu muswa mu ubinga bakadi ba benu, mu tooni mitima mya benu mi minono. Ka hu mbandu a hwaba buuna ve. 9 Na me ndeele benu: Pasi muutu wu ubinga mukadi a nde tso a ni mu tooni bumbembo ve, na bwekwele mukima, nde miisa mayamba.»

10 Bayihi ba nde baleeli nde: «Tso ni buuna bahala lafwana mu usa ŋa busu bu mukadi a nde, bubwe hwa nde mu uvelekwele.» 11 Yisu afutili bo: «Baatu boosi utwala usiinga ndongisili mo yiniiyi ve. Ka ndulu ba Nzambi hamiiva bungodu mo buuna. 12 Bamosi baavelekwele mu tooni ipiha hi imbutala-ngu. Bakima baavelekwele, mu tooni ati baamiimasa bo mabuta. Bakima kaka baavelekwele, mu tooni ipfumu hi mayulu. Nyaha muutu wu utwala usiinga ndongisili mo yiniiyi, asiinga yo!»

13 Hu mbisa, baatu baabehili Yisu baana, mana nde asuusala bo myoho na usambila mu bo. Ka bayihi baasyembi baatu mo baana. 14 Buuna, Yisu aleeli: «Nyahaani baana baya huli me, na a liliha bo ve, mu tooni ati, Ipfumu hi mayulu hili hya boosi ba bali we bo.» 15 Nde asuusili bo myoho, na nde amati ŋaana.

16 Bahala limosi laayasusaha ŋa pedu a Yisu na ufuula nde: «Mulongisi, hima me apfwana usa lilibwe mana me mbaha moonyi wu bilima na bilima?» 17 Yisu ni ufutala nde: «Mu hima we li mu uva me byuhu mu mambu ma mabwe? Ndulu mumosi li wu mubwe. Tso we toondi ukoto hu moonyi, keelese matumili.» 18 Bahala laafuuli: «Ki matumili?» Yisu afutili nde: «A duba ve, a sa mayamba ve, a yiba ve, a tiila imbangi hi mapfuta mu muutu ve. 19 Kiinza taata a we na ngu a we, tondo muna a we, we we mwakulu✝.» 20 Mupfudu-mbahala ni uleele nde: «Me atsiingili matumili mo maana moosi. Hima me apfwana ubwe sa?» 21 Yisu afutili nde: «Tso we toondi uba wu asupaha, yene, yasumbasa byosi bi we li na byo na va mbongo yi we ubaha huli biyaha, na we ubaha busina hu mayulu. Titswene yaanga, duukala me.» 22 Ka humbisa uyuha mambu mo maana, mufudu mbahala ayeni na lingebe, mu tooni ati, nde aba na busina bu bulahi.

23 Yisu aleeli huli bayihi ba nde: «Mumbuli me ndi mu undeele benu, hu li pasi mu bisina mu ukoto mu Ipfumu hi mayulu. 24 Me ndi mu umbwendeele benu buunubu: Hwafulala uleenge huli buuru nga irunga mu uvyoho ŋa vulu la tsongi, ka a huli isina mu ukoto mu Ipfumu hya Nzambi ve.» 25 Bu bayihi baayuhi buuna, bo baasinzikimuha na baaleeli: «Buuna, ka na utwala uyoboho?» 26 Yisu atali bo na aleeli: «Huli baatu, myo utwala uvangama ve. Ka huli Nzambi, mambu moosi mu baavangama.» 27 Buuna Peetelo ni uleele nde: «Ka uto ti bisu, bisu laamiisiisa byosi mu uduukala we. Buni huuba mu bisu?» 28 Yisu aleeli bo: «Mumbuli, me ndi mu undeele benu: Ŋa Mwana a muutu hukatuma ŋa kiti a nde yi ipfumu yi muyusu mu tsi yi nyatihi✝, benu ba laaduukili me, benu kaka sa libaatuma ŋa makiti kuumi na moole mu utsundasa bibandu kuumi na byole bi Isereli. 29 Na pasi muutu wu usiisa manzo ma nde mu tooni a me, baana ba ngu a nde, bakedi ba nde, taata a nde buuve ngu a nde, baana ba nde, mangundu ma nde, sa ayaka kaluha kama (100) ŋa yulu, na sa abaha moonyi wu bilima na bilima. 30 Ka baatu ba balahi ba bali batsomi, sa baba batsukusu, na baatu ba bali batsukusu sa baba batsomi.»