1 Bilumbu bisamunu bivyoho, Yisu avoli Peetelo, Yaki na Yowani, mwana a ngu a Yaki, na nde abiti bo ŋa muvanga, ŋa yulu isyelo hi mutaabu. 2 Nde akimbuhi ŋa busu bwa bo. Hiinzi hya nde hyakamwedeme we taangu, na bikutu bya nde byafuuki we liyalala li mifudi. 3 Masulubete, Moose na Eliya baayamonehele. Na bo baboole baakamoho na Yisu. 4 Buuna, Peetelo aleeli huli Yisu: «Pfumu, hu li bubwe ti bisu a benu libaani ŋaaniŋa. Tso we tondi, me tsa tuunga bitudu bitatu ŋaaniŋa: imosi hya we, imosi hya Moose, imosi hya Eliya.» 5 Bu Peetelo haaba kini mu uyambila, yidu li laakamwedeme laayafuha bo, na ndaha mosi yaapali hutso a yidu, na yaaleeli: «Wunuuwu ni Mwana a me wu litondo, wu ubaakuhasa kinya a me. Liyuhala nde!» 6 Bu bayihi baayuhi ndaha mo yiina, bo baabahi boomo bu bulahi na baabwidi biinzi mu toto. 7 Ka Yisu ayasusaha ŋa pedu a bo, abeembi bo na aleeli: «Telemaani, a liba na boomo ve!» 8 Buuna, bo baasiimbuli miisu, na baamoni ndulu ka Yisu siha. 9 Bu bo baakakulamana isyelo, Yisu akebisi bo na aleeli: «A lileele huli pasi muutu imono-miisu mo hiina ve, natee bu Mwana a Muutu husuuha mu tsi a ba bakwa.»

10 Titswene, bayihi baafuuli nde: «Mu hima milongisi mi Mikele mi baaleele ti Eliya afwana uya busu?» 11 Nde afutili bo: «Ni mbuli, Eliya afwana uya mu uyaasuungaha mambu moosi. 12 Ka me ndeele benu, Eliya amiikwaya, baatu a baadihuli nde ve. Ka bo baavangili nde moosi ma bo baatondi. Bumosi kaka, bo buukwamisa Mwana a Muutu nde mwakulu.» 13 Bayihi baatsikihi ti nde mu Yowani mutondihi haakatoyo na bo.

14 Bu bo baayato ŋa hwaba koonge a baatu, bahala limosi laayasusaha huli Yisu, laatsokimi ŋa busu bwa nde na laaleeli: 15 «Pfumu, kwila mwana a me wa bahala lingebe, nde li na puha, na nde li mu umono pasi yindahi. Matangu makima, nde ubaabwa hutso a mbaahu, buuve hutso a mamba. 16 Me ambiti nde huli bayihi ba we, ka bo a baatwali ubeeloso nde ve.» 17 Yisu afutili: «Benu baatu ba tuungi li libi, na balaavele imiinu! Matangu kwe me apfwana umabweba na benu? Matangu kwe me apfwana umaabwekunda benu? Behelaani me nde ŋaniiŋa.» 18 Yisu afwengili tengo, na lo laapali mu mwana na mwana abeeluhi masulubete. 19 Na bayihi baasusihi huli Yisu na baafuuli nde ŋa muvanga: «Mu hima bisu livelitwala ubinga livupu mo lilibi liniili?» 20 Yisu ni ufutala bo: «Mu tooni ati, imiinu hya benu hili ndulu hoole. Mu mbuli me ndi mu undeele benu, tso imiinu hya benu hili we libutu la mutade*, benu utwala uleele huli isyelo mo hiniihi: "Mata ŋaana na yene huna!" Isiha utwala ukondosono benu ve. [21 Ka ndulu mu lisambulu na ndiili ikaandi bubaatwala upalisa livupu lilibi la bunuubu.]»

22 Ilumbu imosi, bayihi baaba boosi itwadi hu Ngalili, Yisu aleeli bo: Mwana a Muutu baaka mu uyeholo ŋa myoho mya baatu. 23 Bo sa baduba nde, ka mu ilumbu hi bitatu nde sa asuuha mu babakwa. Bayihi baamoni lingebe li lilahi mu tooni a mambu mo maana.

24 Bu Yisu na bayihi ba nde baatoodi hu Kapernahumi, bakaambi ba limandu la nzo a Nzambi, baayasusaha huli Peetelo na bafuuli nde: «Mulongisi a benu a hufuta limandu la nzo a Nzambi ve✝?» 25 Peetelo afutili: «Eye! Nde ubaafuta lo.» Mu taangu yi Peetelo hakoti mu nzo, Yisu abaandihi utoyo na aleeli: «We buni li mu utsima, Simoni? Batumi ba toto bo mamaandu huli na ba baavolo? Huli baana ba bo vo huli byenyi?» 26 Nde afutili nde: «Huli byenyi.» Na Yisu afutili nde: «Baana kaahu a bubaafuta ve. 27 Ka bisu a benu mu uvelekubasa bo baku, yene hu dyanga, yabwaha lobo, na duta tswi watsomi wu uya, dibula munywa a nde, na we sa mono likuta la mbongo li luukuha mu ufuta limandu la me na la we; volo lo na futa bo limandu la bisu a we.»