1 Yisu abwesalila makuma mu yambila na bo. Nde aleeli: 2 «Ipfumu hi mayulu hyafwanina we mutumi mumosi wu asiidi mukungi makwele ma mwana a nde wa bahala. 3 Nde atsindihi basalili ba nde mu uyateele ba baatsihi hu mukungi makwele, ka bo a baasiingi uya ve. 4 Na nde abwetsindaha basalili bakima na tumili mo yiniiyi: "Yaleelaani huli ba baatsiha: Buunubu, ilaambu hya me hyamiivangama, bangombe ba me, na bibulu bya me bya maadi baamiiduba, byosi byamiivangama. Yaani hu makwele!" 5 Ka ba baatsihi baapenyi dyambu mo liina, na baayeni hu bisalu bya bo bikima: mumosi hu ngundu a nde, wuna hu mumbungu a nde; 6 bakima baakaangi basalili, baasiidi bo bubi na baadubi bo. 7 Buuna, mutumi abahi kesi: nde atsindihi masadaadu ma nde mu uyaduba badubi mo baana na utsuha musyenge a bo. 8 Titswene, nde aleeli basalili ba nde: "Ilaambu hi makwele hyamiivangama, ka ba baatsiha a baahwama mu udya hyo ve. 9 Yenaani mu manzila ma maayabahana na teelaani hu mukungi baatu boosi ba benu luumono." 10 Basalili baayeni mu manzila na baakuungi boosi ba bo baamoni, ba babi na ba babwe, na nzo mukungi yaaluuli mu baatu. 11 Mutumi akoti mu umono ba baatsihi. Mutumi amoni hutso a bo bahala limosi li laaveeli na mulwatu a nde wu mukungi makwele. 12 Nde afuuli bahala: "Mbaahi a me, buni we siidi mu ukoto huni hwavele mulwatu a mukungi makwele?" Ka bahala mo a laabahi dyambu li uleele ve. 13 Buuna, mutumi aleeli huli basalili ba nde: "Hadaani nde miilu na myoho na bwahaani nde hu mbadi, hutso a piipidi, ni huuna nde huuba mu ulila na ubaakwete miinyu." 14 Mu mbuli, ba balahi bali ba baatsiha, ka ndulu hoole bamiisoolo».

15 Buuna, Bafarisi baayeni hu uyasa pfuundu mu usaha buni buutehele Yisu mweto mu mambu ma nde. 16 Titswene, bo baatsindihi huli Yisu mwa litangu li bayihi ba Bafarisi na mwana a baatu ba kabu la Eloode, mu uyayebe nde mu mikuma mi nde haakiipalisa. Bu bo baayidi, bo baleeli nde: «Mulongisi, bisu liyaabi ti we nga imbuli; we li mu ulongese nzila a Nzambi mu imbuli hyoosi. We a hali na boomo bwa muutu tso mumosi ve, na we a hali na buraandu ve. 17 Bunuubu, leele bisu matsimi ma we mu dyambu mo liniili: Baava muswa mu ufuta limandu huli Kayisaali?» 18 Ka bu Yisu haaba haayaba dyeele la bo, nde akaali: «Banga muwala, mu hima benu lili mu utehele me mweto? 19 Mwesaani me likuta limosi la mbongo li bubaasalila mu ufuta limandu.» Bo baamweesi nde likuta limosi la mbongo, 20 na Yisu afuuli bo: «Hiinzi na bisono mo biniibi bya na?» 21 Bo baafutili ti bya «Kayisaali.» Buuna, Yisu aleeli bo: «A ka! Futalaani huli Kayisaali bya Kayisaali, na huli Nzambi bya Nzambi.» 22 Bu bo baayuhi mvutu mo yiina, bo baakimuhi. Bo baasiisi Yisu na baayeni.

23 Ilumbu ndulu ni hiina, Basaduki baayidi huli Yisu. Ni bo bali mu usilasa ti a yili ve. Bo baafuuli nde 24 bunuubu: «Mulongisi, Moose asiisa bisu mukele ti "tso bahala lili na mwana a ngu, lo limiikwa na lisiisi mukadi a nde wu avele na mwana, mwana a ngu mo wuuna afwana ukwele mukwili mana nde abutala wu akwa baana✝." 25 Kaahu, ŋa hati la bisu hwaba na baana ba ngu tsambu ba babahala. Watsomi akweli mukaasu na akwiidi hwavele usiisa imbisa. Na asiisi mukwili huli mwana a ngu a nde wa bahala. 26 Hwaba bumosi kaka mu waboole, na mu wu mutatu, natee mu bo batsambu boosi. 27 Hu mbisa a bo boosi, mukaasu kaka akwiidi. 28 Mu ilumbu hya tsuuhili a babaakwa, mu batsambu baana, mukadi mo wuuna wa na huuba? Mu tooni ati, bo boosi baakweli nde!»

29 Yisu akaali bo: «Benu laamiidunga, mu tooni ati, benu a lili mu utsikaha tso Mabasonehe ma Ngidi, tso matwala ma Nzambi ve. 30 Mu mbuli, ŋa babaakwa buusuuha, babahala na bakaasu a buubwekwelesene ve, ka bo buuba we bapofi hu yulu. 31 Mu li litali tsuuhili a babakwa, benu a laataanga ma Nzambi haaleele benu ve? 32 "Me, me ndi Nzambi a Abrahami, Nzambi a Isaki na Nzambi a Yakobi!" Nzambi a hali Nzambi a babaakwa ve, ka Nzambi a ba bali moonyi.» 33 Koonge a baatu ba baakayuha baakimuhi mu tooni a ndongisili a Yisu.

34 Bu Bafarisi baayuhi ti Yisu adibuhi Basaduki minywa, bo baakuukimi. 35 Na mumosi mu bo, mulongisi Mikele, atondi utehele Yisu mweto, na afuuli nde: 36 Mulongisi, «Ki tumili yi Mikele yi yaafulala mu bunene?»

37 Yisu afutili nde: «"We afwana utondo Pfumu Nzambi a we mu mutima a we woosi, mu muvumu a we woosi na mu buyedi bwa we bwosi✝." 38 Yiina ni tumili yatsomi na yi yaafulala bunene. 39 Ya moole yi yafwanina na yo, ni yiniiyi: "Tondo muna a we, we we mwakulu✝." 40 Mikele mya Moose myosi na ndongisili mimbihuli, byakangama mu matumili mo mamoole maniima.»

41 Bu Bafarisi baaba baakuukama, Yisu aviidi bo hyuhu mo hiniihi: 42 «Benu buni libaatsima mu Masiya? Nde mwana a na ali?» Bo baafutili nde: «Nde wu imbisa hya Davidi ali.» 43 Yisu aleeli bo: «Ka buni Davidi nde mwakulu hutso Livupu la Ngidi, haateeli nde "Pfumu"? Mu tooni ati Davidi aleeli:

44 "Pfumu miileele huli Pfumu a me:

Tsahala ŋa mbahala a me,

natee bu me utsuusa baboho ba we,

hu tsina a miilu mya we✝."

45 Ka tso Davidi li mu uteele nde "Pfumu", buni Masiya huutwala uba mwana a nde?» 46 A hu li tso mumosi mu bo, wu atwali ubakula ve, na muutu tso mumosi a haabwebila uva nde byuhu ve.