1 Mu taangu mo yiina, Yowani mutondihi abaandihi ulongese mu kumu a nzala a Yude*. 2 Nde akabaaleele: «Sobwaani mbiili, mu tooni ati Ipfumu hi mayulu hyaaka bebele!» 3 Yowani ni nde wuuna wu mumbihuli Esaya haayabisi, ŋa nde haaleeli:

«Yiniiyi ni ndaha a muutu wu li mu uta ibila mu kumu a nzala:

"Vangimasaani nzila a Pfumu,

suungahaani misoho mya nde✝!"»

4 Yowani aba alwata ikutu hi baatuunga mu myoso mya buuru nga irunga. Na mu luungu la nde, aba ahada mudi wu mukobo ibulu. Nde akabaadya makooko na maadi ma nyuhi a tsyehe. 5 Bisu Yeruselemi, bisu Yude yoosi na bisu itaanzi hyoosi hi hyabaambana na nzali a Yolodani, baakayabwana Yowani. 6 Bo baakasiinga masumu ma bo ŋa kuungi la baatu. Na Yowani akatondehe bo mu Yolodani.

7 Ka bu Yowani hamoni Bafarisi na Basaduki ba balahi mu uyaayaka tondihili huli nde, nde aleeli bo: «Benu ibaandu hi bapili! Na alongese benu mu ubata kesi a Nzambi yi yili mu uya? 8 Mwesaani mu mavaanga ti benu limiisobo mbiili. 9 Na a lilelesene mu mitima mya benu ve ti: "Bisu lili na taata a bisu Abrahami!" Ka me ndeele benu ti, Nzambi utwala ukitusa mamanya mo maniima baana ba Abrahami! 10 Pa pibi baamiivangimasa mu ukwanga miti mu manganzi. Ni mu buuna, pasi muti wu uvelebuta mbutu yimbwe, sa bakwanga nde na ubwaha nde hu mbaahu. 11 Me ndi mu utondehe benu mu mamba, mana benu lisobo mbiili. Ka nde wuuna wu li mu uya ŋa mbisa a me, sa atondehe benu mu Livupu la Ngidi na mu mbaahu. Nde afulala me matwala, na me a handi wu akuha mu umaasa bikoodi bya nde ve. 12 Nde li na iyengese hya nde ŋa hoho, mu ukahula mbutu na biimbu. Nde ukuukaha mbutu hutso iswehili hya nde, ka nde utsuha biimbu hu mbaahu yi yaaveledima.»

13 Mu taangu mo yiina, Yisu amati hu itaanzi hya Ngalili, ayidi hu nzali a Yolodani huli Yowani, mana Yowani atondehe nde. 14 Ka Yowani a hatoondi ve na aleeli: «Me ni wu li na nzala ati we tondehe me, ka we ni wu ubweya huli me!» 15 Ka Yisu afutili nde: «Siinga, nyaha buba buuna mu taangu mo yiniiyi. Ka hufwani ti, bisu a we likuhasa moosi ma Nzambi hatuma.» Na Yowani asiingili nde. 16 Bu baamani utondehe Yisu, nde apali mu mamba. Mu taangu mo yiina, mayulu maadibumi, nde amoni Livupu la Nzambi laayakulamana mu ifwafwani hi libembe ŋa yulu a nde. 17 Na ndaha mosi yaamati hu mayulu, yaaleeli: «Wunuuwu ni Mwana a me wu litondo, wu ubaakuhasa kinya a me✝.»