1 Hu mbisa a mbutili a Yisu hu musyenge a Betelemi hu tsi a Yude, mu taangu a mutumi Eloode, banga buyedi* baamati hu Esete, baayidi hu Yeruselemi. 2 Na baafuuli: «Mwana wu bamiibuta huni ali, Mutumi Bayudaayo? Ka bisu limiimono mvwelele a nde hu Esete, na bisu limiiya mu ukongemene nde.» 3 Bu mutumi Eloode hayuhi musamu mo wuuna, mutima aheliini nde, bumosi kaka mu baatu ba musyenge a Yeruselemi boosi. 4 Nde akuukihi bakuutu ba bangaanga ba Nzambi boosi na milongisi mi Mikele, na nde afuuli bo: «Huni baafwana ubuta Masiya?» 5 Bo baafutili nde: «Hu Betelemi a Yude. Mu tooni ati, mu buuku li mumbihuli baasonehe buunubu:

6 "We Betelemi, tsi a Yuda,

we a hali musyenge wu afulala bukeehe,

ŋa hati li misyenge mya Yuda ve,

mu tooni ati, mu we,

sa hupala mutumi wu utuma ibaandu hya me, Isereli✝."»

7 Na Eloode ateeli baatu banga buyedi mu tswehi, afuuli bo bubwe-bubwe: «Mu ki taangu mvwelele haamonihili?» 8 Titswene, nde atsindihi bo hu Betelemi na uleele: «Yenaani, yatsikahaani bubwe-bubwe mu tooni a mwana. Bu benu luusoolo nde, benu liyaayabisa me, mana me kaka nzakongemene nde.» 9 Bu baamani uyuha mambu ma mutumi, bo baayeni. Mvwelele wu bo baamoni hu Esete atswamini bo hu busu, natee bu haatsikimi ŋa mbuha yi yaaba mwana. 10 Bu baatalili mvwelele ŋaana, bo baasangili hu ulaahi: 11 Bo baakoti mu nzo, na baamoni mwana na ngu a nde Mariya. Bo baatsokimi mu ukongemene mwana. Bo baapalisi biloho bya talu, baabitili nde bungodu bwa wolo, bwa paha a tsulu yimbwe, na miire*. 12 Ka bu baayibusi bo mu ndoosi, mu uvelefutaha huli Eloode, bo baafutihi hu tsi a bo mu nzila kima.

13 Ŋa banga buyedi baayeni, pofi a Pfumu ayamonehele na Yosefi mu ndoosi na aleeli: «Teleme, volo mwana na ngu a nde, bata hu tsi a Ngipiti. We sa ba huuna, natee bu me undeele we mu uyafutaha, mu tooni ati, Eloode sa asaha mwana mu utuma uduba nde.» 14 Yosefi atelimi hutso butsuhu, avoli mwana na ngu a nde, ayasweme hu tsi a Ngipiti. 15 Yosefi atsahili huuna natee bu Eloode haakwidi, mana mambu ma Pfumu haayabisi mu libuuku li mumbihuli matswiha: «Me ateeli mwana a me mu upala mu Ngipiti✝.»

16 Bu Eloode haamoni ti banga buyedi a baayafutaha huli nde ve, nde abahi kesi yi mifudi. Na nde atumi uduba baana ba babahala boosi, hu Betelemi na itaanzi hya nde hyoosi, ba baavelekuhasa bilima byole. Nde hakesi bilima byole, mana biyelemene na taangu yi banga buyedi baayabisi nde. 17 Ni buuna, mambu ma mumbihuli Yelemiya haayabisi mayelimini:

18 «Baatu baayuhi bileele hu musyenge a Lama,

ni bililu na minyongo mi milahi.

Ni Laakeli li mu ulila baana ba nde,

na nde a hali mu usiinga mbombisili ve,

mu tooni ati bo bamiikwa✝.»

19 Hu mbisa lipfu la Eloode, pofi a Pfumu ayamonehele na Yosefi mu ndoosi hu Ngipiti. 20 Na aleeli nde: «Teleme, volo mwana na ngu a nde, na futaha hu tsi a Isereli. Mu tooni ati, ba bakasaha utuma uduba mwana, bamiikwa.» 21 Yosefi atelimi, avoli mwana na ngu a nde, afutihi hu tsi a Isereli. 22 Ka bu nde haayuhi ti Alakelawosi akiisini taata a nde Eloode ŋa ipfumu hu tsi a Yude, Yosefi amoni boomo bu uyene huuna. Baayibusi nde mu ndoosi, na nde ayasweme hu itaanzi hya Ngalili. 23 Huuna, nde ayatsahala hu musyenge wa nduhi Nazareti, mana mambu ma mimbihuli matswiha: «Sa bateele nde: musi Nazareti.»