1 Bu Yisu hamoni makonge ma baatu, nde avaati ŋa yulu isyelo, na atsahili. Bayihi ba nde baayidi ŋa pedu a nde. 2 Na nde abandihi uva bo ndongisili mo yiniiyi:

3 «Kinya yili huli biyaha mu livupu,

ka Ipfumu hi mayulu hili hya bo!

4 Kinya yili huli ba bali mu ulila,

mu tooni ati, sa babombesele bo!

5 Kinya yili huli ba bali na kulimini,

mu tooni ati, bo sa bayaka mukobe a toto.

6 Kinya yili huli ba bubaakwa nzala na peyu a butsiitsa,

mu tooni ati, bo sa baywata!

7 Kinya yili huli banga a kwili lingebe,

mu tooni ati, sa bakwila bo lingebe!

8 Kinya yili huli ba batsyeme mu mitima,

mu tooni ati, bo sa bamono Nzambi!

9 Kinya yili huli ba bubaamweese hyenze ŋa hati la bo,

mu tooni ati, sa bateele bo baana ba Nzambi!

10 Kinya yili huli ba bali mu utsuta mu tooni butsiitsa bwa bo,

mu tooni ati, Ipfumu hi mayulu hili hya bo!

11 Kinya yili huli benu ŋa baatu bali mu utuha benu, bali mu utsuta benu na uta bimbangi bi mapfuta mu benu mu tooni a me. 12 Baani mu muyali na sangilaani hwa benu hu hulahi mu tooni ati, musyendo a benu li wu munene hu mayulu. Mu mbuli, ni buuna baatsuti mimbihuli mi myatswamini benu.»

13 Yisu abweleele: «Benu lili mungwa a toto. Ka tso mungwa diimbisi livu la nde, na ki isiha benu luufutala nde livu mo liina? Nde tsalu ka ve, isaali ndulu ka mu ubwaha nde hu mbadi mana baatu badyata nde.

14 Benu lili liyalala la tsi. Musyenge wu baatunga ŋa yulu isyelo utwala uswemene ve. 15 Na a bubaabangisa mwinda mu usuusa nde hutso ipaanyi ve, ka bubaasuusa nde ŋa isuusili hya nde hi hyasyenoho, mana nde ayalusa byosi bi bili mutso a nzo. 16 Ni mu buuna, liyalala la benu laafwana ubaamwedeme ŋa busu bwa baatu boosi, mana bo bamono mavaanga ma benu ma mabwe na bayuusa Taata a benu wu li hu mayulu.»

17 Yisu abweleele: «A litsima ve ti me miinza mu uyaamaasa Mikele mya Moose, na ndongisili yi mimbihuli. Me miinza a mu uyaamaasa ve, ka mu uyatswihasa myo. 18 Mu mbuli me ndi mu undeele benu, a yulu na toto bivyohi ve, isono tso imosi hi ikeehe, buuve iloho hi hyafulala, utwala umata mu Mikele ve, natee bu mambu moosi muutswiha. 19 Ni mu buuna, woosi wu uvelekiinza tso mukele mumosi wu afulala bukeehe mu Mikele mo minimi, na li mu ulongese baatu mu usa bumosi, sa bateele nde wu afulala bukeehe mu Ipfumu hi mayulu. Ka woosi wu ukiinza Mikele na ulongese baatu mu ubaakeelese myo, nde wuuna sa bateele mukuutu mu Ipfumu hi mayulu. 20 Mu mbuli me ndi mu undeele benu, tso benu a lifulili milongisi mi Mikele na Bafarisi mu ukiinza Mikele ve, benu a luutwala ukoto mu Ipfumu hi mayulu ve.»

21 Yisu abweleele: «Benu laayuhi baleeli huli bakaaha ba bisu ti: "A duba✝ ve; pasi muutu wu uduba ahwama na tsundusu ŋa busu bu banzonzi." 22 Ka me, me ndi mu undeele benu, muutu wu ukwila mwana a ngu a nde kesi, sa batsundasa nde ŋa busu bu banzonzi. Muutu wu utuha mwana a ngu a nde: "itsatsambi!" afwana mu uyaka tsundusu ŋa busu bu bakuutu ba Bayudaayo. Muutu wu utuha mwana a ngu a nde: "itsuudu!" bafwana ubwaha nde hu mbeenge a mbaahu. 23 Ni mu buuna, tso we behi bungodu ŋa diiku li bungodu, na tso we yibuhili moonyi ti mwana a ngu a we li na tooni na we, 24 maasiisa bungodu bwa we ŋa busu bwa diiku li bungodu, maayanoongo na mwana a ngu a we. Titswene, yaava bungodu bwa we.

25 Tso we li mu uyene huli banzonzi nzila moosi na muutu wu miikese we, sa mawasa mu noongo na nde bu benu likini mu nzila, mana muboho a we a hayeholo we huli nzonzi, na nzonzi a hava we huli masadaadu, na mo mabwaha we mu kondaayi. 26 Mu mbuli, me ndi mu undeele we: We a huupala huuna hwavele umaafuta mukanu a we woosi ve.»

27 Yisu abweleele: «Benu laayuha, baleele ti: "A sa mayamba ve✝." 28 Ka me ndeeli benu ti pasi nde wuuna wu li mu utala mukaasu na linyungi, amiikwasa mayamba na nde mu mutima a nde. 29 Ni mu buuna, tso diisu la we la mbahala libaabwisa we mu masumu, lobolo lo na buma lo lala na we. Hwafulala bubwe huli we mu ubungasana inama imosi hi linyutu la we, na mu uvelesa ti nyutu a we yoosi babwaha yo hu mbungulu. 30 Tso kaka la we la mbahala libaabwisa we mu masumu, kese lo na buma lo lala na we. Hwafulala bubwe huli we mu ubungasana inama imosi hi linyutu la we, ka a mu uyene hu mbungulu wu akuha ve*.»

31 Yisu abweleele: «Baaleeli kaka ti: "Woosi wu ubinga mukadi a nde afwana uva nde muhanda a ndubili makwele✝." 32 Ka me ndi mu undeele benu ti: Loosi bahala li luubinga mukadi a nde, tso a mu tooni bumbembo ve, nde li mu uvahula nde hu mayamba. Na bahala li luukwele mukaasu wu baabinga, miisa mayamba.»

33 Yisu abweleele: «Benu laayuhi kaka baleeli huli bakaaha ba bisu a benu ti: "A sa mulabu wu mapfuta ve, ka we afwana utswihasa mulabu wu we asa ŋa busu bwa Pfumu✝." 34 Ka me, me ndeeli benu mu ubaavelelaba tso hoole: A lilaba tso mu yulu ve, mu tooni ati, lo ni kiti-ipfumu hya Nzambi, 35 tso mu toto ve, mu tooni ati, yo ni isuusili hya miilu mya Nzambi. A laba tso mu Yeruselemi ve, mu tooni ati, Yeruselemi ni musyenge a Mutumi wu munene. 36 A laba kaka tso mu mutswe ve, mu tooni ati, we utwala ufuukasa buuve upiindasa linanga la we tso limosi ve. 37 Tso hu li eye leelaani "eye" tso hu li naana, leelaani "naana". Mambu makima ma bubaabwese ŋa yulu, mu baamata huli Nga Bubi.»

38 Yisu abweleele: «Benu laayuhi baleeli: "Tso muutu tubi diisu li muna a nde, baafwana utuba kaka la nde. Tso muutu kuuli diinyu li muna a nde, baafwana ukuula kaka la nde✝." 39 Ka me, me ndi mu undeele benu: mu ubaavelefutala piinga mu piinga. Tso muutu teti we lipali mu tama la mbahala, bwetehele nde kaka tama lina. 40 Tso muutu toondi ubita we ŋa busu bu banzonzi mu uvolo ikutu hya we hi butulu, nyaha nde avolo napa iyunga hya we. 41 Tso muutu tsukimisi we mu usa iveeve (1 000) hi mataka, sa biveeve byole (2 000) na nde. 42 Kabila huli wu li mu uvondo we isiha, na a miinguha nde wuuna wu toondi uyaasombo huli we ve.

43 Benu laayuhi baleeli ti: "We afwana utondo muna a we✝ na ubelele muboho a we." 44 Ka me, me ndi mu undeele benu: baatondwaani baboho ba benu, baasambilaani mu ba bali mu utsuta benu. 45 Ni buuna, benu luuba baana ba Taata a benu wu li hu mayulu. Nde ubaapalisa nyangu ŋa yulu a banga bukanyi, na ŋa yulu a baatu ba babwe. Nde ubaanohese mvula ŋa yulu baatu ba butsiitsa na ŋa yulu a baatu ba baavele butsiitsa. 46 Eye, tso benu libaatondo ndulu ba bubaatondo benu, buuna ki musyendo benu luutwala ubaha? Batsonzihi ba limandu kaka bali mu usa bumosi! 47 Na tso benu libaabila ndulu baana ba ngu a benu, ki dyambu la kimuhili benu libaavaanga? Bangoyi kaka bali mu usa bumosi! 48 Baani ba baasupaha we bu Taata a benu hu mayulu ali wu asupaha✝.»