1 Bu Yisu hakulimini hu tsina isyelo, makonge ma baatu ma manene maaduukili nde. 2 Muutu mumosi nga bwatsi ayasusaha, akongimini ŋa busu bwa Yisu, na aleeli: «Pfumu, tso we tondi, we utwala utsyemese me!» 3 Yisu alabi kaka, abembi nde na aleeli: «Me tondi buuna, nyaha we tsyeme.» Mu mawasa, bahala mo laatsyemi mu bwatsi bwa nde. 4 Titswene, Yisu ni uleele: «Kele, a yabisa mambu mo maniima huli pasi muutu ve! Ka yene yamonehele huli ngaanga a Nzambi, na we va bungodu bu Moose hatumi, mu umweese ti we miibeeloho✝.»

5 Bu Yisu haakakoto hu musyenge a Kapernahumi, mukuutu a kama li masadaadu, ayasusaha ŋa pedu a nde, alembisini nde na aleeli: 6 «Pfumu, musalili a me wu abwamina ali hu nzo, linyutu laamiivolo nde, na nde li mu umono pasi yindahi.» 7 Yisu aleeli nde: «Me unzambeeloso nde.» 8 Mukuutu a kama li masadaadu afutili: «Pfumu, me a handi wu akuha ti we koto mu nzo a me ve. Ka leele ndulu dyambu limosi, na musalili a me sa abeeloho! 9 Mu tooni ati, me ndi me mwakulu hutso lituma li bakuutu na me ndi na masadaadu hutso lituma la me. Tso me ndeeli huli mumosi: "yene!" nde uyene. Tso me ndeeli huli mukima: "yaanga", nde uya. Na tso me ndeeli huli musalili a me: "sa bunuubu", nde usa buuna.» 10 Bu Yisu haamani uyuha mambu mo maana, nde akimuhi, na nde aleeli huli ba baakaduukala nde: «Mumbuli me ndi mu undeele benu: Me kini a hamoni imiinu hya pila yiniiyi, huli muutu tso mumosi mu Isereli ve. 11 Me ndi mu undeele benu lo, baatu ba balahi sa bamata hu Esete na hu Wesete, na sa batsahala ŋa metse na Abrahami, na Isaki na Yakobi hu Ipfumu hi mayulu. 12 Ka sa babwaha ba baakiikoto hu Ipfumu hutso a piipidi ya hu mbadi, hu bo buuba mu ulila na ubaakwete miinyu.»

13 Titswene, Yisu aleeli huli mukuutu a kama li masadaadu: «Futaha hu nzo a we, mambu ma we miivondo, sa mavangama we bu hu li imiinu hya we!» Na mu taangu yiina, musalili a nde abeeluhi.

14 Titswene, Yisu ayeni hu nzo a Peetelo, nde abiisi buko bwa Peetelo bu mukaasu alambama ŋa taangi: nde aba na bahu. 15 Yisu abeembi kaka la nde, na bahu laafwidi. Nde atelimi na akabili bo byudya.

16 Bu tsitsaha yaatoodi, baabehili Yisu babeedu ba balahi ba matengo maakakwamisa. Mu leele limosi, Yisu apalisi mavupu ma mabi, na nde abeelusi babeedu boosi, 17 mana dyambu li mumbihuli Esaya haleeli, litswiha: «Nde avoli bipiha bya bisu, na abiti mabeedu ma bisu✝.»

18 Yisu amono koonge a baatu yaadiinga nde, nde atumi bayihi ba nde mu uyene na nde hu simu lina la dyanga. 19 Mulongisi Mikele mumosi ayasusaha na aleeli nde: «Mulongisi, me tsa nduukala we pasi tsyelo yi we uyene!» 20 Yisu ni ufutala nde: «Mibahu na biswemili bya myo, na banyunyi bubaaba na byanza bya bo. Ka Mwana a muutu a hali na mbuha yi uvumasa mutswe a nde ve.»

21 Mukima mu bayihi ba nde aleeli nde: «Pfumu, va me muswa me maanzandiiha taata a me.» 22 Yisu afutili nde: «Duukala me✝, nyaha babaakwa badiiha babaakwa ba bo.»

23 Yisu akoti mu bootehe, bayihi ba nde baaduukili nde. 24 Masulubete, ifula hi mifudi hyatelimi mu dyanga, na mapo maakabwa hutso a bootehe, na bwo bwabaandihi uluula mamba. Ka Yisu aba tolo. 25 Bayihi baayasusaha ŋa pedu a Yisu na baasuuli nde na ubaafulaha: «Pfumu, fuuhasa bisu! Bisu laaka mu ukwa!» 26 Yesu ni ufutala bo: «Mu hima benu lili na boomo, benu baatu ba imiinu hi ikeehe?» Na nde ni uteleme, ni ufwengele ifula na mamba ma dyanga. Na bisiha byosi ni usa na swii. 27 Boosi baaba mu kimuhili yinene, na baakaleele: «Wu ki pila a muutu wa tso ifula na mapo ni ubaasiingala nde✝?»

28 Bu Yisu hatoodi hu simu lina la dyanga, hu tsi a bisu Gadare*, babahala boole ba baaba na matengo, baapali hutso mangila na baayabwana Yisu. Bo baaba na tsisu, na muutu tso mumosi a haakamese uvyoho tsyelo mo yiina ve. 29 Bo baakafulaha: «Mwana a Nzambi, we ki lo na bisu? We yidi huni mu unyongese bisu hwavele taangu umaato?»

30 Ka ŋa pedu a ŋaana, hwaba na koonge yinene yi bangulu yi yaaba mu udya. 31 Matengo maakayayahana Yisu na ubaaleele: «Tso we tondi ubinga bisu, tsindaha bisu hutso a koonge bangulu mo yiniiyi.» 32 Yisu ni uleele bo: «Yenaani.» Buuna matengo maapali mu baatu mo baana, na maayakoto mu bangulu. Masulubete, koonge bangulu yoosi yaahidumini umata hu yulu isyelo natee hutso a dyanga, na yanyambihini hutso a mamba. 33 Ba baakakeelese bangulu baabati. Bo baayeni hu musyenge na uyayabisa musamu woosi, na mambu ma maavyohi mu baatu baboole banga matengo. 34 Ni buuna, baatu boosi ba hu musyenge baayabwana Yisu. Bo bamono nde, bo baayayiini nde mu apala mu tsi a bo.