1 Yisu apala hu nzo a Nzambi, na bu nde haakayene, bayihi ba nde baayasusaha huli nde na baamweesi nde buni baatuungi nzo a Nzambi yinene. 2 Ka Yisu afutili bo: «Benu lili mu umono bunene bwa nzo mo yiniiyi? Mu mbuli me ndi mu undeele benu, a huusaala ŋaniiŋa tso manya ŋa yulu a manya ve: byosi sa batsala.»

3 Yisu aba atsahala hu yulu isyelo hi miti mya Olive. Bayihi ba nde baayasusaha huli nde na ufuula nde ŋa muvanga: «Leele bisu ki taangu mambu mo maana muutswiha? Ki iliimbu hyuyabisa ti maana moosi muusuka?» 4 Yisu afutili bo: «Keebaani muutu a hadungasa benu.» 5 Mu tooni ati, ba balahi sa baya mu nduhi a me na ubaaleele: «Me ni Masiya!» Bo sa badungasa baatu ba balahi. 6 Ŋa benu luuyuha mu utoyo mu midiingu, na batsyetsye ba midiingu, a liba na boomo ve. Maana maafwana uvangama. A yumaaba tsukusu ve. 7 Tsi mosi sa yitelemene tsi yina, na ipfumu sa hitelemene ipfumu hina. Mu mambuha ma pila mu pila, toto sa yinyingama na limbunga sa liba. 8 Biliimbu mo biina byosi, sa biba we mbandihili misoongo mya mbutili. 9 Buuna sa bayeholo benu mu unyongese benu, na sa baduba benu. Mabuli moosi sa mabelele benu mu tooni a nduhi a me. 10 Mu taangu mo yiina, ba balahi sa batiimba imiinu hya bo. Bo sa batatasana, na sa babelesene. 11 Mimbihuli mi milahi mi mapfuta sa miteleme na sa midungasa baatu ba balahi. 12 Mu tooni a mambu ma mabi ma muufulala, litondo la baatu ba balahi sa livolo. 13 Ka wuuna wu uhwada natee hu tsukusu, sa afuuha. 14 Musamu wu Mubwe wu Ipfumu wunuuwu, sa bayabisa nde mu toto yoosi, mana nde aba imbangi huli mabuli moosi. Na buuna, sa buba tsukusu.

15 Yisu abweleele: «Ŋa benu luumono wu bali mu uteele ti "Musafuli wu Mutsali", wu mumbihuli Danyeli haayambili mu nde, wu aba atsahala ŋa mbuha ya ngidi, nyaha wu li mu utaanga atsikaha mo bubwe! 16 Buuna, ba buuba hu Yude, nyaha babata hu tsyelo bisyelo. 17 Woosi wu uba hu yulu ibaanga hya nzo a nde, avelesutaha mu uvolo isiha mutso a nzo. 18 Woosi wu uba hutso a ngundu a nde, avelefutaha hu nzo mu uvolo iyunga hya nde. 19 Ki pila lingebe luuba mu bakaasu banga mayimi, na mu ba buukaanwyasa baana mabeelo mu bilumbu mo biina! 20 Baasambilaani, mana mbatili a benu a yiyiila mu taangu a piyu yi mifudi, buuve mu ilumbu hya saba! 21 Mu tooni ati, mu bilumbu mo biina, sa huba na tsisu yi yaafulala bunene na matsisu ma laabwani na mo, umata mbaandu a tsi, natee lolo yiniiyi. Tsisu ya pila mo yiina, a yiubweba ve. 22 Na tso Nzambi a haavoli kesili yi ukuka bilumbu ve, muutu tso mumosi a haakiifuuha ve. Ka nde haakuki bilumbu, mu tooni a ba nde haamiisoolo. 23 Ni mu buuna, tso muutu leeli benu ti: "Monwaani, Masiya ndyowunuuwu ŋaniiŋa!" Buuve ti: "Monwaani, ndyowunuuwu hunuuhu!" A lisiila nde imiinu ve. 24 Mu tooni ati, bakristo ba mapfuta na mimbihuli mi mapfuta buuteleme. Bo sa bavaanga biliimbu bya kimuhili na bimangu mu udungasa tso huyelimini, napa ba Nzambi haamiisoolo. 25 Yuhaani! Me amiikwanzibusa benu.

26 Ni mu buuna, tso muutu leeli benu ti: "Monwaani, nde hu kumu a nzala ali," a liyene huuna ve. Buuve nde aleele benu ti: "Monwaani, nde ndyowunuuwu asweme ŋaniiŋa," a lisiila nde hiitu ve. 27 Ni mu buuna, we bu muvedyavedi ubaamwedeme hu mayulu, umata hu nyangu ubaapala natee hu nde ubaadyama, ni buuna kaka buuba mu nziili a Mwana a muutu. 28 Ŋa mbuha yi yuuba mvumbi, ni ŋaana kaka bambida buukaakuukama.»

29 Yisu abweleele: «Masulubete, hu mbisa a tsisu yi bilumbu mo biina, taangu sa yikituha piipidi, tsuungi a huubweva mweede ve, bamvwelele buubwa umata hu mayulu, na matwala ma mali hu mayulu muunyingama. 30 Buuna, iliimbu hya Mwana a Muutu sa himonehele hu yulu. Mabuli moosi ma ŋa toto, sa maba hutso lingebe. Mo sa mamono Mwana a Muutu mu uya hutso mayidu na matwala na muyusu a nde woosi. 31 Kulambeete yinene sa bafula, nde sa atsindaha bapofi mu ukuukaha ba nde haamiisoolo mu bituungu bibina bya tsi, umata tsoso a toto natee tsoso mayulu.»

32 Yisu abweleele: «Tsikahaani ndongisili a kuma yi mufiinge. Bu bitabi bya nde bimiikolo, na bu makaya ma nde mamiifula, benu limiiyaaba ti kwanga yaaka bebele. 33 Ni bumosi kaka huli benu, ŋa benu luumono misamu mo miniimi mu utswiha, yaabaani ti Mwana a Muutu aka bebele, ŋa munywa a nzo a benu. 34 Mu mbuli, me ndi mu undeele benu: tuungi mo liniili a luuvyoho ve, tswamina maana moosi matswiha. 35 Yulu na toto byuvyoho, ka mambu ma me a muuvyoho ve.»

36 Yisu abweleele: «Mu ma mali mu utala ilumbu na ngunga yi mambu mo maana muutswiha, pasi muutu a hayaabi ve, tso bapofi hu yulu, tso Mwana kaka; ka ndulu Taata siha yaabi byo. 37 Mambu ma maabwidi mu taangu a Nowa, sa mavyoho bumosi kaka we mu bilumbu bya nziili a Mwana a Muutu. 38 Mu mbuli, mu bilumbu bi byateehili nyamba, baatu baakadya na baakanywa, baakakwele na baakakwelese baana ba bo, natee mu ilumbu hi Nowa haakoti mutso likuumbi. 39 Na bo a baakayaaba li luuyiila bo ve, nyamba yaayidi na yaanyambisini bo boosi. Sa huba bumosi kaka mu ilumbu hya nziili a Mwana a Muutu. 40 Buuna, mu baatu boole ba buuba mu ngundu: mumosi sa babita, na mukima sa basiisa. 41 Bakaasu boole ba buuba mu unyiha mbutu mu inyihulu: mumosi sa babita, na mukima sa basiisa. 42 Buuna, baani likanda, mu tooni ati, benu a liyaabi ilumbu hi Pfumu a benu huuya ve. 43 Yaabaani lo bubwe, tso nga nzo ubaayaaba ki taangu yi butsuhu yi muyibi huuya, kini nde ubaaba likanda na uveleva nde nzila yi ukoto mu nzo a nde. 44 Ni mu buuna benu kaka, baavangamaani, mu tooni ati, benu a liyaabi ki taangu Mwana a Muutu huuya ve.»

45 Yisu abweleele: «Ki musalili wu lili mu usiila hiitu na nga buyedi? Ni nde wuuna wu mukuutu a nde amiiva isalu hyubaava basalili bana byudya mu taangu yi yaafwana. 46 Kinya yili na musalili mo wunuuwu, tso mukuutu mu pfutihili a nde, yabiisa nde mu usa isalu hi nde hasiila nde! 47 Mu mbuli me ndeele benu, mukuutu sa ava nde lituma ŋa yulu bisiha bya nde byosi. 48 Ka tso nde li musalili wu mubi, wu ubaaleele hutso mutima a nde ti: "Mukuutu a me li mu utaamba mu uyaafutaha", 49 nde sa abaabeete bambaahi ba nde ba isalu, sa abaadya na ubaanywa na bikolo-mbungu. 50 Buuna mukuutu sa ayaafutaha mu ilumbu hi musalili haavelekeele nde, na mu taangu yi nde haaveleyaaba. 51 Nde sa abinga musalili mo wuuna, na uva nde tsyembili ya banga muwala, ni huuna huuba bililu na kwetili a minyu.»