1 Yisu ateeli bayihi ba nde kuumi na boole. Nde aviidi bo matwala ma ubinga mavupu ma mabi na ubeeloso mabeedu moosi na bipiha byosi. 2 Manduhi ma kuumi na biluumbi byole bi Yisu hasooli ni maniima: Watsomi, Simoni wu Yisu haviidi kuumbu Peetelo, na mwana a ngu a nde Andele. Yaki, na Yowani mwana a ngu a nde, bo baboole baana ba Zebedayi. 3 Filipo na Batolomayi, Tomasi na Mataayi mukaambi limandu. Yaki mwana a Alafe na Tadayi. 4 Simoni Muzeloti, na Yuda Isikaryoti, wu ayehuli Yisu.

5 Yisu atsindihi bakuumi na boole mo baana hu isalu, na nde aviidi bo matumili mo maniima: «A liyene hu bitaanzi bya ba baavele Bayudaayo ve. Na a likoto mu musyenge tso mumosi wa Samariya ve. 6 Ka yenaani huli mameme ma maadimbala ma buli la Isereli. 7 Taani ibila na baaleelaani mu nzila ti "Ipfumu hi mayulu hyaka bebele!" 8 Beeloswaani babeedu, suulaani baatu ba baakwa mu lipfu, tsyemesaani banga bwatsi, bingaani matengo. Benu limiiyaka mu bungodu, vaani kaka mu bungodu. 9 A libita tso wolo ve, tso mbongo ve, tso bakuta mu uvidaha mu mapoose ma benu ve. 10 Bu benu luuyene mu mudyenge, a libita tso koome ve, tso iyunga ikima ve. A livolo tso bikoodi ve, tso likaanda ve. Mu tooni ati, musali afwana ubaha byudya bya nde. 11 Ŋa benu luuto mu pasi musyenge, buuve mu pasi bula, sahaani tso hu li na muutu wu avangama mu uyaka benu. Tsahalaani huli nde, natee bu benu luumata ŋaana. 12 Ŋa benu luukoto mu pasi nzo, vaani mabwehe huli baatu ba bali mu nzo. 13 Tso baatu banga nzo bayaki benu, nyaha hyenze hya benu hiba ŋa yulu a bo. Ka bo baveleyaka benu, nyaha hyenze hya benu hifutaha huli benu mwakulu. 14 Ŋa baveliyaka benu, tso uveleyuhala benu, palaani mu nzo mo yiina buuve mu musyenge mo wuuna. Na kubalaani mufuundu a miilu mya benu*. 15 Mu mbuli me ndi mu undeele benu, mu ilumbu hya tsundusu, tsyembili yi buusyembe musyenge mo wuuna, sa yivyohelele ya Sodoomo na Ngomooro.»

16 Yisu abweleele: «Yuhaani! Me ndi mu utsindaha benu we mameme ŋa hati la miinzi. Ni mu buuna, baani na buyedi we bataadi, na baani ba baatsyeme we mabembe. 17 Baakelaani mu baatu mu tooni ati, bakima sa bayeholo benu mu manzo ma tsundusu, bo sa batete benu bikooti mu manzo ma bo ma lisambulu li Bayudaayo. 18 Bo sa babita benu ŋa busu bu bapfumu na ŋa busu bu batumi, mu tooni a me. Yiina sa yiba nzila yi benu luuta imbangi mu me, ŋa busu bwa bo na ŋa busu bwa ba baavele Bayudaayo. 19 Ka ŋa buuyeholo benu huli banzonzi, a limono boomo mu mambu ma benu luuleele ve, tso mu bitoyili bya benu. Ka Nzambi sa ava benu mambu ma benu luuleele mu taangu mo yiina. 20 Mambu ma benu luuleele, a muumata huli benu ve. Ka Livupu la Taata a benu, luukaayambila mu benu. 21 Mwana a ngu sa ayeholo mwana a ngu a nde mwakulu hu lipfu, na taata sa avaanga bumosi mu mwana a nde. Baana sa batelemene babuti ba bo, na buutuma ubelese bo mu lipfu. 22 Baatu boosi sa babelele benu mu tooni a nduhi a me. Ka woosi wu ukuunda natee hu tsukusu, nde wuuna sa afuuha. 23 Ŋa buutsuta benu mu musyenge mumosi, baataani hu musyenge mukima. Mu mbuli me ndi mu undeele benu, benu a luumana utaangila misyenge mya Isereli ve, teehele Mwana a muutu mu uyaafutaha. 24 Muyihi a haalutahala mulongisi a nde ve. Musalili a haalutahala pfumu a nde ve. 25 Humiikuha huli muyihi mu uba we mulongisi a nde, na huli musalili mu uba we pfumu a nde. Tso bateeli pfumu a nzo Belesebuli*, sa bafulala utuha baatu ba nzo.»

26 Yisu abweleele: «Ni mu buuna, a libata boomo bwa baatu mo baana ve. Mu tooni ati, mambu moosi ma maaswemene, mu umonehele. Na mambu ma tswehi muuyabahana. 27 Ma me ndi mu undeele benu hutso a pipidi, leelaani mo ŋa nyangu. Na mambu ma bali mu uleele benu mu mapfuundu, taani mo ibila mu mifudi myosi ŋa kuungi la baatu. 28 A libata boomo bwa ba bubaaduba nyutu na uveletwala uduba muvumu. Ka baataani boomo bwa nde wuuna wu utwala ubungasana muvumu na nyutu hutso a mbeenge a mbaahu✝. 29 Benu liyaabi ti masyehe moole bubaasumbasa mu likuta limosi. Ka tso limosi mu mo, a libaabwa ŋa toto hwavele litondo la Taata a benu ve. 30 Uto ti benu, napa naanga mitswe mya benu yoosi yili yibaatanga. 31 Ni mu buuna, a liba na boomo ve, benu lafulala masyehe ma malahi tsoongo.»

32 Yisu abweleele: «Ni mu buuna, woosi wu ubinuha mu me ŋa busu bwa baatu, me kaka tsa mbinuha mu nde ŋa busu bwa Taata a me wu li hu mayulu. 33 Ka pasi nde wuuna wu utuna me ŋa busu bwa baatu, me kaka tsa tuna nde ŋa busu bwa Taata a me wu li hu mayulu.»

34 Yisu abweleele: «A litsima ve ti me anza mu ubehe hyenze ŋa toto. Me a hanza mu ubehe hyenze ve, ka mudingu. 35 Me anzatsuusa kabuhili ŋa hati la bahala na taata a nde, ŋa hati la mwana wu mukaasu na ngu a nde. Me anzatsuusa kabuhili ŋa hati li mukaasu na buko bwa nde bu mukaasu. 36 Baboho ba benu sa baba baatu ba ibaandu hya benu mwakulu✝. 37 Woosi wu ubaatondo taata a nde buuve ngu a nde bele a me, a hafwana mu uba muyihi a me ve. Woosi wu ubaatondo mwana a nde wa bahala buuve wu mukaasu bele a me, a haafwana mu uba muyihi a me ve. 38 Woosi wu uvelevolo kuruwa a nde na uduukala me, a haafwana mu uba muyihi a me ve. 39 Woosi wu atondo ufuuhasa muvumu a nde, sa anyambasana nde. Ka nde wuuna wu unyambasana muvumu a nde mu tooni a me, sa abwesoolo nde.»

40 Yisu abweleele: «Woosi wu uyaka benu miiyaka me, na wuuna wu uyaka me, miiyaka wu atsindaha me. 41 Woosi wu uyaka mumbihuli mu biita li bumbihuli, sa ayaka musyendo wu mumbihuli huyaka. Na woosi uyaka muutu wu asungama, sa ayaka musyendo wu muutu wu asungama huyaka. 42 Mu mbuli me ndi mu undeele benu, pasi muutu wu uva tso mbuungu a mamba ma piyu huli mumosi mu bangebe mo baniiba ŋa hati li bayihi ba me, mu tooni a bu nde ali muyihi a me, nde sa ayaka musyendo a nde.»