1 Yisu abweleele: «A litsundasa muutu ve, mana Nzambi uveletsundasa benu. 2 Mu tooni ati, bu benu libaatsundasa bana, ni buuna kaka Nzambi hutsundasa benu. Hyetso hi benu lili mu usalila, sa basalila hyo kaka mu benu. 3 Mu hima we ubaatala isyesyele hya hiimbu hi hili mu diisu la mwana a ngu a we, hwavele utsikaha kuunzi li lili mutso a diisu la we? 4 Buuve, buni we utwala uleele huli mwana a ngu a we: "Nyaha me maasa hiimbu hya mu diisu la we", bu we mwakulu li na kuunzi mu diisu la we? 5 We, muutu nga muwala, teehele umaasa kuunzi li lili mu diisu la we, na hu mbisa, we sa mono bubwe mu umaasa hiimbu hi hili mu diisu la mwana a ngu a we. 6 A liva bisiha bya ngidi huli bamvwa ve, mana bo a bakinguhala na ukaha benu. A libwahila bangulu bisiha bya benu bya talu ve, mana bo a badyata byo.»

7 Yisu abweleele: «Vondwaani, na benu sa liyaka. Sahaani na benu sa lisoolo. Doodwaani, na sa badibula benu munywa a nzo. 8 Eye, pasi muutu wu ubaavondo, ubaayaka. Pasi muutu wu ubaasaha, ubaasoolo. Na bubaadibula munywa a nzo huli wu ubaadoodo. 9 Hu li na muutu ŋa hati la benu, wu uva manya huli mwana a nde tso mwana vondi nde lipa? 10 Buuve, na uva mwana a nde taadi, tso nde vondi nde tswi? 11 Tso benu ba lili baatu ba babi, liyaabi uva baana ba benu bisiha bi bibwe, tandisini a Taata a benu wu li hu mayulu sa ava bisiha bi bibwe huli ba buuvondo nde byo!

12 Mambu moosi ma benu libaatondo ti babaasiila benu, benu kaka baasiilaani mo huli baatu bakima, mu tooni ati, mo mali mambu ma mu baalongese Mikele mya Moose na libuuku li Mimbihuli✝.»

13 Yisu abweleele: «Kotwaani mu munywa a nzo wu aswekeme! Mu tooni ati, munywa a nzo wu ataanyuha, na nzila yi yaavele a pasi yibaabita baatu hu ubungana. Na baatu ba balahi bubaavyohele muuna. 14 Ka nzila yi yibaavyohele mu munywa a nzo wu aswekeme, yili ya pasi. Yo yibaabita baatu hu moonyi. Baatu ndulu hoole bali mu usoolo yo.»

15 Yisu abweleele: «Kebaani mu mimbihuli mi mapfuta. Bo bubaavolo ifwaani hi mameme mu uya huli benu, ka hu hati a bo, bo bali miinzi mi bukanyi. 16 Benu sa liyaaba bo mu ndyatili a bo. A bubaakoolo mbutu a vinye mu miti mi matsyende ve, tso mbutu mufiinge mu ifuundi ve. 17 Muti wu mubwe ubaabuta mbutu yimbwe. Ka muti wu mubi ubaabuta mbutu yimbi. 18 Muti wu mubwe utwala ubuta mbutu yimbi ve. Ni bumosi kaka, muti wu mubi utwala ubuta mbutu yimbwe ve. 19 Pasi muti wu uvelebuta mbutu yimbwe, sa bakwanga nde na ubwaha nde hutso a mbaahu. 20 Buuna, benu sa liyaaba mimbihuli mi mapfuta mu mavaanga ma myo.»

21 Yisu abweleele: «A baatu boosi ba bubaateele me "Pfumu, Pfumu" buukoto hu Ipfumu hi mayulu ve. Ka ndulu bo baana ba bubaasa litondo la Taata a me wu li hu mayulu. 22 Mu ilumbu hya tsundusu, baatu ba balahi sa baleele: "Pfumu, Pfumu, bisu laabihuli mu nduhi a we. Bisu laabingi matengo mu nduhi a we. Bisu laasiidi bipadi mu nduhi a we". 23 Na me tsanzabisa bo: "Bisu a benu huni laaba, matilaani me, benu ba libaavaanga ma mabi✝!"»

24 Yisu abweleele: «Ni mu buuna, woosi wu uyuha mambu ma me ndi mu undeele na usalila mo, nde li we muutu nga bungeele, wu atunga nzo a nde ŋa yulu a manya. 25 Mvula anohi, banzali baaluuli, ifula hyanyingisi nzo, ka yo a yaabwidi ve, mu tooni ati ibeene hya yo hyaba ŋa yulu a manya. 26 Ka muutu wu ubaayuha mambu ma me na uvelesalila mo, nde afwanina na muutu wu itsuudu, wu atunga nzo a nde ŋa yulu musyeŋunyu. 27 Mvula anohi, banzali baaluuli, ifula hyanyingisi nzo. Nzo yaabwidi, na yo yaatsamuhi yoosi.»

28 Bu Yisu hamani uleele mambu mo maana, baatu boosi baakimuhi mu ndongisili a nde. 29 Mu tooni ati, nde akalongese na matwala, ka a we milongisi mi Mikele ve.