1 Bafarisi na Basaduki baayasusaha huli Yisu, mu utehele nde mweto. Bo baakasaha iliimbu hya kimuhili hi hyumata hu yulu. 2 Ka Yisu afutili bo: «Ŋa tsitsaha, benu libaaleele: "Tangu sa yiba yimbwe, mu tooni ati yulu laabeenge." 3 Na ŋa tsumba a ngwali, benu libaaleele: "Mvula mana unoho lolo yiniiyi, mu tooni ati, yulu laabeenge na laapiinda." Benu libaayaba utsikaha biliimbu bya toto na bya yulu, buni benu laaveletsikaha mambu ma mali mu uvyoho mu taangu mo yiniiyi? 4 Baatu ba tungi mo liniili bali ba babi na ba baavelekangama mu Nzambi. Bo bali mu usaha iliimbu, ka, a busiila bo iliimbu ikima ve ŋa yulu a hi mumbihuli Yonasi.» Titswene, nde asiisi bo na ayeni.

5 Ŋa bayihi baakayene hu simu lina la dyanga, bo baavusiini mapa mutima. 6 Yisu aleeli bo: «Kebaani! Baani na buyedi mu levure li Bafarisina na Basaduki.» 7 Bayihi baakatsundana hutso mitima na baakaleelesene: «Nde amiileele buuna, mu tooni ati, bisu a libehi mapa ve.» 8 Yisu a Yaabi mambu ma bo baakatsima, na nde afuuli bo: «Mu hima benu lili mu ulelesene ti: a lili na mapa ve? Benu baatu ba imiinu hya hi ikeehe! 9 Benu kini a laatsikaha ve? Benu a lili mu uyibwala moonyi mu mapa mataanu ma baakabili biveeve bitaanu (5 000) bi babahala na litangu li maponzi ma benu laabiti ve? 10 Na benu a lili mu uyibwala moonyi mu mapa tsambu ma baakabili biveeve bina (4 000) bi babahala na litangu la byebe bi benu laabiti ve✝? 11 Benu a laaveletsikaha ve? Me a hakanzambila benu mu mapa ve ŋa me akandeele benu: "Keebaani mu levure li Bafarisi na Basaduki!"»

12 Buuna, bayihi baatsikihi ti nde a haleeli bo mu ukebe mu levure* li bubaasalila mu uvaanga lipa ve. Ka mu ukebe mu ndongisili Bafarisi na Basaduki.

13 Yisu ayeni hu tsi a Sezare ya Filipo, nde afuuli bayihi ba nde: «Mu uyuha bitoyili bya baatu, Mwana a muutu na ali?» 14 Bo baafutili: «Bamosi bali mu uleele ti, we Yowani Mutondihi we li, bakima ti, we Eliya we li; bakima ti we Yelemiya buuve mumosi mu mimbihuli we li.» 15 Yisu ni ufuula bo: «Ka mu benu, me na ndi?» 16 Simoni Peetelo afutili: «We ni Masiya, Mwana a Nzambi a moonyi!» 17 Buuna, Yisu aleeli nde: «Kinya huli we Simoni, mwana a Yoona, mu tooni ati, a muutu miimweese we lo ve, ka Taata a me wu li hu mayulu miimweese we lo. 18 Eye, me, me ndi mu undeele ti Peetelo, we li manya, na ŋa yulu a manya mo linili me tsa tuunga libundu✝ la me. Lipfu lo mwakulu a luutwala pasi isiha usa lo ve. 19 Me tsa pa we batsaafi ba Ipfumu hi mayulu. Moosi ma we ukuta ŋa toto, Nzambi kaka sa akuta hu mayulu. Moosi ma we unyaangula ŋa toto, Nzambi kaka sa anyaangula mo hu mayulu*. Ma we ukuta...ma we unyaangulamambindulili makima ma we usiingasa sa basiingasa...ma we uliha sa baliha buuve ma we ukotese sa bakotese...ma we upalisa sa bapalisabuuve kaka Ma we usa kolo-kolo sa basa kolo-kolo...huuna hu we ubisa kolo-kolo, sa babisala kolo-kolo..» 20 Na Yisu alihi bayihi ba nde mu uvelebila uleele huli pasi muutu ti nde ni Masiya.

21 Umata taangu mo yiina, Yisu abandihi uyabisa huli bayihi ba nde ti hwafwana huli nde mu uyene hu musyenge a Yeruselemi, hu bakuutu ba bangaanga ba Nzambi, na milongisi mi Mikele buumweese nde pasi yi yaafulala. Nde sa akwa na sa asuuha mu ilumbu hi bitatu. 22 Buuna Peetelo abiti Yisu ŋa muvanga na abaandihi usyembe nde: «Nzambi akeelese we, Pfumu! Ubila ve! Liina a luuyiila we ve!» 23 Ka Yisu akinguhi na aleeli Peetelo: «Matila me, Saatana! We li baku mu nzila a me, mu tooni ati, matsimi ma we a mali matsimi ma Nzambi ve, ka mo mali ma baatu.»

24 Titswene, Yisu aleeli huli bayihi ba nde: «Tso muutu tondi uduukala me, anyaha ubwetsima mu nde mwakulu, atsyete kuruwa a nde*., na aduukala me. 25 Ni mu buuna, woosi wu tondi ufuuhasa muvumu a nde, sa anyambasana nde, ka woosi wu unyambasana muvumu a nde mu tooni a me, sa asoolo nde. 26 Ki kaluha muutu huubaha tso nde bahi tsi yoosi, na uvinda muvumu a nde? Hima muutu huutwala uva ŋa ikiisa hi idiingu hya nde? 27 Mwana a Muutu sa aya hutso muyusu a Taata a nde na bapofi ba nde, na buuna nde sa asyende pasi muutu we buubeedi mbiili a nde✝. 28 Mu mbuli me ndi mu undeele benu: mwana a baatu bakima mu ba bali ŋaniiŋa, a buukwa ve, teehele bo bamono Mwana a Muutu mu uya mu Ipfumu hya nde.»